Isaias 48 - Maung A Balita Biblia

Say Dios et Katawan na Arapen

¹ Dengel yo ya, sikayo ran totood Israel, sikayo ran totoon say sengeg yo et si Juda: Mansasamba kayod ngaran na Katawan tan ibabaga yon igagalang yoy Dios na Israel— balet anggapoy kabaliksan iray salita yo.

² Anggaman ontan ikikinon yon ibaga a mibabaley kayod masanton siudad tan manmamatalek kayod Dios na Israel, a say ngaran to et Yahweh a Makapanyarin-amin.

³ Say Katawan kuantod Israel, “Abaybayag ko lan impasakbay no anto ray nagawa; insan kabebekta, ginawak ira.

⁴ Amtak ya anawet so olom, anaweawet a singa balatyang tan ag napiklon singa gansa.

⁵ Lapud saya impasakbay ko lan abayag so nagawad sika ed arapen; kasakbayan a nagawa ray bengatla imbabawag ko la ra, pian ag mo ipasen a saray talintao tan saray imahin na diriyos mo so angyabuloy a nagawa ra ya.

⁶ “Agawa la ray amin ya impasakbay ko; nepeg mon birbiren yan katwaan. Natan ibagak ed sikay balon bengatla ya onsabi, bengatla ran nagawa ya ag ko impaamta nen saman.

⁷ Natan ko labat iyaabuloy a nagawa ra; ag mo ni nadngelan ya agawa lay onya. Ta no agawa la nen saman, ibagam ya amtam lay nipaakar ed saya.

⁸ Amtak ya ag ka napanmatalkan, a sika lawas so bantug a mananumpa. Sikato yay makasengeg ya ag mo yan balut nadngelan nen saman, ya ag mon balut naamingaw.

⁹ “Pian idayew na saray totoo so ngaran ko, popokpokan koy pasnuk ko, ag ko la idapo tan ag ta kayo la pateyen.

¹⁰ Sinubok ta kayod apoy na kairapan, singa pakalinis na pilak ed palbaan. Balet apapaway kon andi-kakanaan kayo.

¹¹ Lapud siak so makasengeg na panggagawak ed gagawaen ko— ag ko abuloyan a nalemlemew so ngaran ko odino abuloyan koy siopaman a minabang ed kagalangan a siak labat so akankayaryan.”

Si Ciro, say Pangulon Pinili na Katawan

¹² Say Katawan kuanto, “Dengel kad siak, Israel, saray totoon pinilik! Siak si Siak, say sankaonaan, tan say sankaonuran!

¹³ Inlira na limak so pundasion na mundo tan impanat koy katawenan. No tawagen ko ray mundo tan saray katawenan, ondago ran tampol tan iparontal day sikaran dili.

¹⁴ “Mantitipon kayo, amin yo, tan dengel yo ak! Anggapod saray diriyos so makapangipasakbay a say toon pinilik et dogpaan toy Babilonia; sumpalen to so labay kon pagawad sikato.

¹⁵ Siak so nansalita tan anawag ed sikato; inwanwan ko tan impanpalabok.

¹⁶ “Singger kad siak natan tan dengel moy ibagak. Nanlapu lad gapo anggapoy iyaamut kod panagsalitak tan tinmua ya amin iray salitak.” (Natan say Katawan a Dios initdan to ak na pakayari to tan imbaki to ak.)

Say Plano na Katawan ed saray Totoo to

¹⁷ Say masanton Dios na Israel, say Katawan a Mananondon yo, kuanto: “Siak so Katawan a Dios yo, say Dios a mangibangat ed sikayo ed pankaabigan yo tan sikatoy mangiwanwan ed dalan na panagbilay a nepeg yon tombuken.

¹⁸ “No komun ta dinmengel kayo ed saray ganggan ko, inmagos komun ed sikayo ray bindision a singa kolus ya ag balut naekatan. Sinmasabi komun ed sikayoy pananalo a singa saray daluyon ya onsisipwak ed gilig na dayat.

¹⁹ Singa la komun karakel na buer so karakel na saray kabyangay boleg yo, tan andi-duaruwa komun ya ag ko ran balut impapatey.”

²⁰ Paway kayod Babilonia, taynanan yo man a pasen! Maliket yon ibawag so balita; ipaamta yod amin a pasen: “Dinondon la na Katawan so aripen ton Israel!”

²¹ Nen inwanwan na Katawan ed kalawakan iray totoo to, ag da asaliy napgaan. Pinapaway ton para sikara so danum ed baton-dampay; nilengat toy baton-dampay, et inmagos so danum.

²² “Anggapoy kareenan so bilay da ray managkasalanan,” kuay Katawan.