Isaias 45 - Maung A Balita Biblia

Tinoro na Katawan si Ciro

¹ Say Katawan pinili ton manari si Ciro. Tinoro to a manakep ed saray bansa; ibabaki ton mangekal na pakayari da ray arari; ilokas na Katawan iray puirta na saray siudad a looban nen Ciro. Say Katawan kuantod kinen Ciro.

² “Siak a diliy mangiparaan na dalan mo, pataren ko ray kapalandeyan tan saray kapokdulan. Igebak iray gansan puirta tan poteren ko ray balewet a balatyang.

³ Itdan ta ka na saray kayamanan a manlapud saray ambilonget tan maamut a pasen; naamtaan mod satan a siak so Katawan, say Dios na Israel ya anawag ed sika ed ngaran mo.

⁴ Totoroen ta kan ontulong ed aripen kon Israel, saray totoon pinilik. Initdan ta kay baleg a kagalangan anggaman ya ag mo ak kabat.

⁵ “Siak so Katawan; anggapo lay arum a Dios. Itdan ta kay biskeg a nakaukolan mo, anggaman ya ag mo ak kabat.

⁶ Gagawaen ko ya pian naamtaan na amin a katoowan ed sankamundoan a siak so Katawan tan anggapo lay arum.

⁷ Papalsaen ko so liwawa tan kabilongetan; iiter koy bindision tan ipapadalan koy deral. Siak a Katawan so manggagawa ed sarayan amin.

⁸ Mangiter ak na pananalon singa oran a manlapud tawen; onsangiy dalin a mangawat ed oran et manrosas na kilalaban tan inkatonung. Siak, say Katawan, so mangyabuloy a nagawa ya.”

Say Katawan na Pinalsa tan Nagagawa

⁹ Makasopyat kasiy banga ed nanggawad sikato, say banga ya iyaliling to ray arum? Nayari kasin tepeten na banga no antoy gagawaen na dumadamilid sikato? Nayari kasin manriklamoy banga ya aliwan marunong so nanggawad sikato?

¹⁰ Nitepel kasi na sakey a too ya ikuan ed saray atateng to, “Akin et onyay impanggawa yod siak?”

¹¹ Say Katawan a masanton Dios na Israel, a walad lima toy nagawad arapen, kuanto: “Anggapoy kanepegan mon manepet na nipaakar ed saray anak ko odino ibagam ed siak so nepeg kon gawaen!

¹² Siak so nanggawad mundo tan amalsad too a manayam ed tapew na dalin. Lapud pakayarik impanat koy katawenan; siak so makaoley ed agew, bulan, tan saray bitewen.

¹³ Siak a dili so anogsog ed kinen Ciro a manumpal na getmak tan mangoksuy ed amin a bengatla. Peteken koy amin a dalanen to. Ipaalagey to lamet so siudad kon Jerusalem, tan ibolus to ray totook ya adakep. Anggapoy angupa odino amasoksok ed impanggawa tod saya.” Say Katawan a Makapanyarin-amin so nansalita.

¹⁴ Say Katawan kuantod Israel, “Kayaryanen mo ray kayamanan ed Egipto tan Sudan, tan magmaliw ya aripen mo iray atatagey a totood Seba; akagolunggolung iran ontombuk ed sika. Ondakmomo rad sika tan ibawag da, ‘Walad sika so Dios—sikato labat so Dios.

¹⁵ Say Dios na Israel a mangilalaban ed saray totoo to et Dios ya iyaamut toy sikaton dili.

¹⁶ Nabaingan ya amin iray managgaway talintaoy diriyos; napelag iran amin ed kababaingan.

¹⁷ Balet ta inlaban na Katawan so Israel, tan mansiansiad ando lan ando so impanalo to; ag balut napelag ed kababaingan iray totoo to.’”

¹⁸ Say Katawan pinalsa toy katawenan— sikato so Dios! Tinibokel tan ginawa toy mundo— ginawa ton malet tan mansiansia lawas. Ag to ginawan anggapoy kabaliksan to, no ag ingen ginawa ton pasen a panayaman na saray totoo. Sikato so angikuan, “Siak so Katawan, tan anggapo lay arum.

¹⁹ Ag ak nansalita ed maamut odino inamut koy getmak. Ag ko imbagad saray totood Israel ya anapen da ak ed maamut a pasen. Siak so Katawan, sasalitaen koy katwaan; Ipapaamtak no antoy maptek.”

Say Katawan na Mundo tan saray Talintaoy Diriyos na Babilonia

²⁰ Say Katawan kuanto, “Mantitipon kayo, sikayon totood saray bansa, amin yon nilaban nen atalo so impirio; mamparontal kayod panalaysay ed sikayo! Saray totoon mampaparadan awit da ray talintao ra tan mampipikasi rad saray diriyos ya ag makapangilaban ed sikara— totoo ran anggapon balut so amta!

²¹ Dago kayo tan iparontal yod korti so dalem yo; mampapanonan komun iray nidalem. Siopay abayag lan angipasakbay ed agawa? Aliwa tan siak, say Katawan, say Dios so mangilalaban ed saray totoo to? Anggapo lay arum a Dios likud ed siak.

²² “Pawil kayod siak natan, et nilaban kayo, amin yon totoo ed intiron mundo! Siak labat so Dios, anggapo lay arum.

²³ Tua so sipan ko, tan ag balut naoman. Sasambaan kod siak a dili; Ondagod siak so balang sakey tan ontalimukor irad arap ko tan sambaan dan matoor irad siak.

²⁴ “Ibaga ra a diad siak labat so pakalmoan na pananalo tan biskeg; balet amin da ray mamobosul ed siak et napelag irad kababaingan.

²⁵ Siak, say Katawan, ilaban ko ray amin a kabyangan na boleg nen Jacob, et idayew da ak.