Isaias 40 - Maung A Balita Biblia

Saray Salita a Makapangiter na Ilalo

¹ Say Dios tayo kuanto, “Ligliwa yo ray totook, Ligliwa yo ra!

² Pabiskeg yoy linawa da ray totoo ed Jerusalem. Ibaga yod sikaran andokey lay paniirap da tan apirdona la ray kasalanan da. Sigput ko la ran dinusa lapud amin a kasalanan da.”

³ Sakey a bosis so mankelyaw, “Iparaan yod kalawakan so sakey a dalan a para Katawan! Linisan yo so dalan ed kalawakan a para Dios tayo!

⁴ Tabunan yo so kapag patar; patar yo so kapag palandey. Saray pokdul magmaliw iran patar, tan say matibagkul a kaomaan et magmaliw a palanas.

⁵ Insan nipaamta ed satan so kagalangan na Katawan, tan nanengneng na amin a katoowan. Say Katawan a dili so angisipan ed saya.”

⁶ Sakey a bosis so mankelyaw, “Ibawag moy balita!” “Antoy balitan ibawag ko?” tepet ko. “Ibawag mo ya amin a katoowan et singa ra dika; ag ira mansiansian singa saray rosas ed uma.

⁷ No ibakid sikara na Katawan so dagem nalenes iray dika tan nalaylay iray rosas. Saray katoowan et singa la ra dikan maganoy bilay.

⁸ On, nalaylay iray dika tan onkupas iray rosas, balet mansiansiad ando lan ando so salita na Dios tayo.”

⁹ Jerusalem, tatdang kad atagey a palandey, ta ipulong moy maung a balita! Kolyaot ka, Sion, ibawag moy maung a balita! Ag ka ontatakot, mansalita ka. Ibagam ed saray baley na Juda ya onsasabi lay Dios da!

¹⁰ Onsasabi so Katawan a Dios a makapanyarin manoley, onsasabin kaiba to ray totoon inyagel to.

¹¹ Asikasoen to ray karniro to a singa panagkomponi na pumapastol; tiponen to ray kordiro tan ampopoen to rad taklay to; anosan ton iwanwan iray kainaan da.

Say Anggapoy Kaparan Dios na Israel

¹² Nasukat na siopaman so dayat ed panamegley na dakolap to odino say tawen diad panamegley na lima to? Nikarga na siopaman so dalin na mundo ed sakey a kupa odino naala so belat na saray palandey tan saray pokdul diad panamegley na simbangan?

¹³ Walay makapangibaga ed Katawan no antoy gawaen to? Siopay makapangibangat odino makasimbawad sikato?

¹⁴ Siopay pangipanonan na Katawan pian naamtaan, natalusan tan naaralan to no panoy panggawa tod antokaman?

¹⁵ Anggapoy wala ed Katawan iray bansa, singa ra labat sankaterter a danum; singa labat kalemew na dabuk iray ararawin isla.

¹⁶ Amin da ray ayayep ed katakelan na Libano et kulang iran ibagat ed Dios tayo, tan kulang iray kiew ton pamool.

¹⁷ Diad sikato tuan anggapoy kakanaan da ray bansa.

¹⁸ Siopay nayarin pangiparaan ed Dios? Antoy kapara to?

¹⁹ Sikatoy ag mipara ed talintaon gagawaen na iskotur, a say platiro et okupan to na balituk tan ipatoon tod pilak.

²⁰ Say toon ag to nayarian ya ikanay pilak o balituk lapud kairapay bilay to, et pilien to lay kiew ya ag naboluk. Manaanap na marunong ya iskotur a manggawa na talintaon ag natumba.

²¹ Ag yo amta? Ag ni asalitad sikayo nen saman? Ag yo ni nadngelan no panoy inggapo na mundo?

²² Ginawa na samay manyodyorung ed trono to diad tagey na mundo tan labas na tawen; singa kamelag na gilata so nengneng da ray totoo diad leksab. Impanat ton singa kortina so tawen, singa sakey a tuldan panayaman.

²³ Papaabebaen to ray makapanyarin manoley, pagmamaliwen to ran anggapoy kabaliksan.

²⁴ Singa ra malangwer a tanaman; katubo-tubo ra tan kakkapanlamut da. No say Katawan et paragemen to, namagaan ira tan nitikyab iran singa dayami.

²⁵ Siopay nayarin pangiparaan ed Dios? Walay siopaman a singa sikato?

²⁶ Tangay kayo pa ed tawen! Siopay amalsad saray sankanengneng yon bitewen? Say mangiwawanwan ed sikaran singa saray sondalo et amta toy karakel da tan tatawagen tod ngaran so balang sakey ed sikara. Ontan lay kabaleg so pakayari to— anggapoy nabalang ya anggan sakey ed sikara!

²⁷ Totood Israel, akin et manririklamo kayo ya ibabaga yon ag amta na Katawan iray gunigon yo odino anggapoy walad sikato no nalalames kayo?

²⁸ Ag yo amta? Ag yo ni nadngelan? Say Katawan so andi-anggaan a Dios; pinalsa to so sankamundoan. Ag balut nakesawan odino napunaw. Anggapoy makatalus na kanunotan to.

²⁹ Pabibiskegen to ray makapoy tan saray naksawan.

³⁰ Onkapoy iray anggan malangwer ni; napunaw iray totoon kabisbiskegan da.

³¹ Balet napasimbalo so biskeg na saray manmamatalek ed Katawan. Onalagey iran nampayak a singa agila; mambatik ira, et ag ira napunaw; manakar ira, et ag ira onkapoy.