Isaias 36 - Maung A Balita Biblia

Tinaktakot na saray taga Asiria iray taga Jerusalem

¹ Diad kumalabinapat a taon na panooley nen Ari Ezekias, dinogpaan nen Senakerib ya impirador na Asiria iray aliber na padir a siudad na Juda tan adakep to ra.

² Nen walad Lakis so ari, imbaki tod Jerusalem so manonan opisyal to tan saray amayamay a sondalo to, ta ibaga rad kinen Ari Ezekias ya onsuko la. Kasabi rad Jerusalem, nanayam irad dalan a pankikimeyan da ray managgaway abel, diad abay na banawang ya aagosay danum a manlalapud dipositoway danum a walad nipokdul.

³ Taloran opisyal na Juda so inmabet ed samay manonan opisyal nen Senakerib: di Eliakim a lakin anak nen Helcias tan sikatoy makaoley ed palasio, Sebna a sikritario na korti, tan Joa a lakin anak nen Asaf tan makaoley ed saray nepeg ya isulat.

⁴ Samay opisyal na Asiria inkuantod sikara a say ari na Asiria et labay ton amtaen no antoy makasengeg na pambabaleg-balegan nen Ari Ezekias.

⁵ Inkuanto, ‘Abaloan mo amon naala na saray salita so pasen na talonggaring tan biskeg na saray sondalo? Siopay abaloan mon ontulong ed sika ed ilaban mod Asiria?

⁶ Iilaloan moy Egipton ontulong ed sika, balet saman a bansa et singa labat bastun a bulawit—napoter tan nasakitan niy limam. Onyay kapara na ari ed Egipto no walay siopaman a manmatalek ed sikato.’”

⁷ Insan inkuan na samay opisyal na Asiria, “Nayarin ibaga yod siak a manmamatalek kayod Katawan a Dios yo. Balet, ag ta dineral nen Ezekias iray altar na Katawan tan saray pasen a panangigalangan ed sikato nen imbaga tod saray totood Juda tan Jerusalem a diad altar ed Jerusalem labat so pangigalangan da?

⁸ On, sigi, diad ngaran na ari palugaran ta kayo. Itdan ta kayoy duan libon kabayo no makalmo kayoy lalakin mankabayod sikara!

⁹ Ag kayo makasimbang ed anggan sankaabebaan lan opisyal na Asiria, balet iilaloan yo a saray Egipsio et itdan da kayo na saray karwahi tan saray sondalon kumakabayo.

¹⁰ Abaloan yo ag ak tinulongan na Katawan ed indogpak ed bansa yo tan dineral ko? Say dilin Katawan so angibagad siak a dogpaan koy bansa yo tan deralen ko.”

¹¹ Insan inkuan di Eliakim, Sebna, tan Joa ed samay opisyal, “Mansalita kad sikamiy Aramaica, ta natalusan mi. Ag ka mansasalitay Hebreo, ta ondedengel iray totoon walad tapew na padir.”

¹² Inmebat imay opisyal, “Abaloan yo amon sikayo tan say ari yo labat so angibakian na impirador ed siak a pangibagaan kod sarayan amin a bengatla? Andi, mitotongtong ak met ed saray totoon manyodyorung ed tapew na padir, a kapara yo ran mangan na dilin tai ra tan oninom na dilin sirit da.”

¹³ Insan inmalagey imay opisyal tan ineyag tod salitay Hebreo, “Dengel yoy ibabagad sikayo na impirador na Asiria.

¹⁴ Ipapasakbay tod sikayon ag yo aabuloyan a palikdoen kayo nen Ezekias, ta ag to kayo lamlamang niagel.

¹⁵ Ag yo aabuloyan a tanggoyuren to kayon manmatalek ed Katawan. Ag yo nununoten ya iyagel kayo na Katawan tan ag to abuloyan a dakepen na saray sondalo na Asiria so siudad yo.

¹⁶ Ag yo dedengeley Ezekias. Igaganggan na impirador na Asiria a paway kayod siudad tan suko ki la. Naabuloyan kayon mangan na ubas ed dilin kaubasan yo, mangan na igos ed dilin kaigosan yo, tan oninom na danum ed dilin bobun yo—

¹⁷ anggad panayamen kayo na ari ed sakey a bansa, a singa met lamlamang say bansa yo, a wala ray kaubasan a mangiter na alak, tan wala ray trigo a gawaen a tinapay.

¹⁸ Ag yo dedengeley Ezekias no ibaga tod sikayon iyagel kayoy Katawan, ta papalikdoen to kayo labat. Wala tay dios na dinan man a bansa ya inyagel tod impirador na Asiria so dalin to?

¹⁹ Iner la natan so kawalaan da ray diriyos na Hamat tan Arpad? Iner so kawalaan da ray diriyos na Sefarvaim? Wala tad sikaray angyagel ed Samaria?

²⁰ Siopad sarayan diriyos da so angyagel ed bansa ra ed impirador mi? Panon sirin so pannununot yon iyagel na Katawan so Jerusalem?”

²¹ Ag inmeseesel iray totoo, onung na ingganggan ed sikara nen Ari Ezekias; ag met ira anggan inmebat.

²² Diad ermen di Eliakim, Sebna, tan Joa, pinilat day kawes da, linma la ra, insan imbalita rad ari so imbaga na samay opisyal na Asiria.