Isaias 34 - Maung A Balita Biblia

Dusaen na Dios iray Kalaban to

¹ Gali dia, sikayon totood amin a bansa! Mantitipon kayo tan dengel kayo. Singger tan dengel kayo, amin yon manaayam ed intiron mundo.

² Mamapasnuk so Katawan ed amin da ray bansa tan amin a sondalo ra. Sinintinsiaan to la ran napatey.

³ Ag nikotkot iray bangkay da, no ag ta kitongilang iran naboluk tan ombanget; nabalangaan na dala iray kapalandeyan.

⁴ Ondapul so agew, bulan, tan saray bitewen diad kapelag da. Naandi so tawen a singa kalokut na ikamen, tan napelag iray bitewen a singa kapelag na saray bolung a manlapud sangay ubas odino sangay kiew ya igos.

⁵ Say Katawan imparaan tod tawen so ispada to, tan natan nitipas ed Edom, diad saray totoon sinintinsiaan ton ompatey.

⁶ Naames so ispada to na dala tan taba ra a singa dala tan taba na saray nibagat a kordiro tan kanding. Mangibagat so Katawan ed siudad na Bosra; gawaen to ya a pamatey na dakerakel a totoo ed dalin na Edom.

⁷ Saray totoo napelag iran singa saray bakad katakelan tan saray kilaw a bakan kalakyan tan nabalangaan na dala so mundo tan nalayanapan na taba.

⁸ Sikato yay panaon na pangyagel na Katawan ed Sion tan ibawi tod saray kalaban to.

⁹ Magmaliw ya alkitran iray ilog na Edom, tan magmaliw ya asupri so dalin. Napoolan a singa alkitran so intiron bansa.

¹⁰ Ondalang ed agew tan labi, tan ando lan ando a manlapud sikato so asewek ya ontagey. Mansiansian andi-kakanaan so dalin na Edom, tan anggapo la dian balut so malabay ya ondalan.

¹¹ Saray kulayot tan saray wawak la so onsalat a manayam ed saman a dalin. Say Katawan pagmaliwen ton bunton na deral-deral tan kitongilang ya amiy ganagana.

¹² Anggapoy arin manoley ed bansa, tan naandi ray pangulo.

¹³ Saray masabit a tanaman et ontubo rad saray palasio tan saray baley ya aliber na padir, tan panayaman ira na saray asod katakelan tan saray kulayot.

¹⁴ Manliber-liber diman iray ayayep ed katakelan, tan mantatawagan iray dimonyod man. Onlad man so dragon ed labi, ta diman mananap na pampainawaan to.

¹⁵ Manobung irad may kulayot, maniknul irad man, pusnakan da rad may sibong da, tan diman da ra asikasoen. Mantitipon irad may buitri, a mansosoblayan iran onsabi.

¹⁶ Sokimat yod libro na Katawan a nipaakar ed saray mabilay a pinalsa tan basa yoy ibabaga to. Anggapoy anggan sakey ed sarayan pinalsa so nabalang, tan walay asawa so balang sakey ed sikara. Say Katawan a dili so angiganggan ed saya; say ispiritu to so manipon ed sikara.

¹⁷ Say Katawan so mangapag ed sikara na dalin tan itdan toy balang sakey na apag. Mansiansia ran manayam ed dalin, tan kayaryan da ya anggad angga.