Isaias 30 - Maung A Balita Biblia

Say Andi-kakanaan ya Impipakna ed Egipto

¹ Say Katawan nansalita: “Pangaskasiyan iray manooley ed Juda lapud linmaban irad siak. Totombuken da ray ag ko implano, tan akipakna ra sumpad linawak; pantatabunan day kasalanan a gagawaen da.

² Oonla rad Egipto ya onkerew na tulong balet ag ira kinmerew ed siak na simbawa. Labay dan iyagel ira na Egipto, kanyan nanmatalek ira ed ari na Egipto.

³ Balet anggapoy pakayari na ari ya ontulong ed sikara, tan saray panangyagel na Egipto et mansumpal ed kaderal da.

⁴ Anggaman ya akasabi lad saray siudad na Soan tan Hanes na Egipto iray opisyal ya imbaki na Juda,

⁵ magbabawi ray totood Juda diad impanmatalek dad ag napampiaan a bansa, say bansan ag makatulong no ag ingen mangipelag ed sikarad kababaingan.”

⁶ Sikato yay sinalita na Dios nipaakar ed saray ayayep ed kalawakan diad abalaten: “Saramay imbaki ondadalan irad maatap a kalawakan a panaayaman na saray lion tan wala ray maditan oleg tan mantikyab a dragon. Saray beneg na saray asno tan saray kamilyo et pinano ra na saray mabmablin rigalo ya iter dad bansan ag makatulong ed sikara.

⁷ Andikakanaan a tulong so iter na Egipto. Lapud saya pinangaranan koy Egipto na ‘Say Maamon Dragon.’”

Saray Totoon Matonganga

⁸ Imbagad siak na Dios ya isulat kod sakey a libro no antoy kipapasen da ray totoo, pian mansiansian walay pakaamtaan na ontan lan kaogsan da.

⁹ Sikaray totoon onsusumlang lawas ed Dios, matila ra lawas, tan ag da labay lawas so ondengel ed saray bangat na Katawan.

¹⁰ Ibabaga rad saray propita a mandeen ira. Kuanda, “Ag yo sasalitaen ed sikamiy nipaakar ed kaptekan. Ibaga yod sikamiy labay min dengelen. Pansiasia yod sikami ray balibali ran kogip.

¹¹ Ekal kayod dalan mi; ag yo kami sasaraan. Ag mi labay a dengelen itay nipaakar ed masanton Dios na Israel.”

¹² Balet say masanton Dios na Israel kuanto: “Ag yo labay a dengelen iray ibabagak, no ag ingen manmamatalek kayod panagduksa tan panagpalikdo.

¹³ Nankasalanan kayo. Singa kayo sakey ya atagey a padir a linmetak manlapud tagey ya anggad leksab; ag mabayag bigla kayon nageba.

¹⁴ Nabetag kayon singa banga, tan diad kamisimisi yo anggapoy langa a nayarin panginan na ngalab o pangaur na danum ed bobun.”

¹⁵ Say Katawan a Dios a Masanto na Israel kuanto ed saray totoo, “Pawil kayo tan mandeen kayon manmatalek ed siak. Diad ontan ombiskeg kayo tan niarawi kayod kaatapan.” Balet ag yo labay a gawaen.

¹⁶ Ingen, plano yon ibatikan iray kalaban yo diad ikabayo yod saray mabatik a kabayo. Kanyan say ibatik yo so pilalek yon gawaen. Abaloan yon mabatik la ray kabayo yo, balet mabatik ni ray kabayo na onosil ed sikayo!

¹⁷ Ombatik, so sanlibod sikayo no nanengneng yoy sakey a sondalon kalaban, et masarag lay limaran sondalo a mamabatik ed sikayon amin. Anggapoy natilak ed saray sondalo yo likud ed begbegtew a bandira ya akabitin ed sakey a tiken a walad tapew na pokdul.

¹⁸ Anggaman ontan, manaalagar so Katawan a mangasid sikayo. Sipaparaan a mangasid sikayo lapud matonung lawas so gagawaen to. Maliket iray totoon manmamatalek ed Katawan.

Bindisionan na Dios iray Totoo to

¹⁹ Ag kayo la onakis, sikayo ran totoon manaayam ed Jerusalem. Mapangasi so Katawan, et no onkerew kayod sikato na tulong, ebatan to kayo.

²⁰ Say Katawan abuloyan to kayon manliknay kairapan, balet wadtan a mangibangat ed sikayo; ag la nakaukolan ya anapen yo.

²¹ No onsuawi kayod dalan, narengel yod benegan yo so bosis to a mankuan, “Saya so dalan. Tombuk yo.”

²² Alaen yo ray talintao yo a naokupan na pilak tan saray naokupan na balituk, insan yo ra ibantak a singa dotak, tan iyeyag yo, “Ag mi kayo la labay a nanengneng!”

²³ Kapag mantanem kayod kaalogan yo, paoranan na Katawan, pian ontubo ray tanaman yo et dakel so naani yo; saray baka yo et nawalaan met ira na maawang tan marikan pastolan.

²⁴ Mangan na sankaabigan tan sankalangweran a dika iray bakan kalakyan tan saray asnon mambaka na saray kaalogan yo.

²⁵ Diad agew a nadakep iray tirinsira na saray kalaban yo tan napatey iray totoo ra, onagos iray sobul a manlapud balang palandey tan balang pokdul.

²⁶ Say bulan magmaliw a maliwawan singa agew, tan say agew magmaliw a mamimpitoy kinaliwawa to, a singa kinaliwaway pitoran agew a nankakasakey. Nagawa ra yan amin no berberen tan paabigen na Katawan iray sinusugat tod saray totoo to.

Dusaen na Dios so Asiria

²⁷ Nanengneng ed arawi so pakayari tan kagalangan na Katawan. Ipapanengneng na apoy tan asewek so pasnuk to. Mansasalita et ondadalang a singa apoy iray salita to.

²⁸ Ibabaki toy walad arap ton dagem a singa delap a mangyaanur ed amin a bengatla. Ipapalanas ton deralen iray bansa tan patotondaen to ray maoges a plano ra.

²⁹ Balet sikayo ran totoo na Dios, manliket tan mankanta kayo a singa gagawaen yo no labi no masanton pista. Manliket kayon singa saray manaakar legan a totogtogen iray plauta diad pamapaarap dad Timplo na Katawan a manangyagel na Israel.

³⁰ Iparengel na Katawan ed balang sakey so mapagalang a bosis to tan ipalikna tod sikaray biskeg na pasnuk to. Wala ed satan so manliub ya apoy, ompelag iray makapal a lorem, oran a kristal, tan mapalalon nepnep.

³¹ Nataktakot iray taga Asiria no narengel day bosis na Katawan tan nalikna ray biskeg na pananusa to.

³² Legan a say Katawan et kakabilen to ya andi-tonda iray taga Asiria, andi-tonda met so panogtog na saray totoo na saray tambol tan saray arpa. Say dilin Katawan so onlaban ed saray taga Asiria.

³³ Abaybayag la a niparaan so sakey a pasen a walay baleg ya apoy a mamool ed ari na Asiria. Aralem yan pasen tan maawang tan atagtagey so nibonton a kiew. Isibuk na Katawan so singa onaagos ya apoy a mamool ed samay kiew.