Isaias 29 - Maung A Balita Biblia

Say Pansumpalan na Jerusalem

¹ Say altar na Dios, say dilin Jerusalem et pangaskasiyay kipapasen to! Kaskasian so siudad a nankampoan nen David! Palabasen niy sakey o duaran taon, a pati saray pista to,

² insan say Dios iyakar toy deral ed siudad a tatawagey “altar na Dios.” Niwalad satan so panakis tan panagugol, tan say intiron siudad et magmaliw a singa altar a naames na dala.

³ Dogpaan na Dios so Jerusalem, lakoben to, tan looban to.

⁴ Say Jerusalem ed satan et magmaliw a singa anyani a pipiliten toy mansalita diad dalem na dalin, a singa sakey ya esaes a manlalapud dabuk.

⁵ Jerusalem, amin da ray taga arum a bansan ondodogpad sika et singa ra dabuk ya ontikyab ed arawi, tan saray makapataktakot a sondalo ra et ontikyab iran singa taep. Insan diad ag iilaloan tan bigla-biglan nagawa,

⁶ say Katawan a Makapanyarin-amin iyagel to ka diad panamegley na saray karul tan yegyeg. Mangibaki na saray alimbusabos tan say manliub ya apoy;

⁷ naandipat ed satan a singa kogip, singa pasingayew ed labi, iray amin a sondalo na saray bansan dinmodogpa ed siudad na altar na Dios tan amin da ray armas tan saray kagawaan da.

⁸ Amin da ray bansan nankakasakey ya ondogpad Jerusalem et magmaliw iran singa sakey a toon narasan tan mankokogip a mamangan, kanyan kabangon to narasan ni lamlamang, odino singa sakey a toon ompapatey ed inkapgaan tan mankokogip ya oniinom, kanyan kabangon to amagaay kolu-kolung to ni lamlamang.

Saray Pasakbay ya ag Inkabkabilangan

⁹ Mankulang-kulangan kayo, et magmaliw kayon makulang-kulang. Manbulag-bulagan kayo, et magmaliw kayon bulag. Magmaliw kayon abuek, anggaman ya anggapoy alak! Mandongilngil kayo, anggaman ya ag kayo akainom na anggan sankaakmon ya alak!

¹⁰ Impantemeg kayo na Katawan, ngalngali kayo la makalirep na malmalet. Saray propita so nepeg komun a pinagkamata na saray totoo, balet pinerengan ira na Dios.

¹¹ Niamut ed sikayo iray amin a pasingayew a nipaakar ed arapen; magmaliw a singa sakey ya atimbrian a nilokut a babasaen. No iyakar yod siopaman ya amta toy mambasa tan kerewen yod sikaton ibasa tod sikayo, ibaga ton ag to nayarian a basaen lapud atimbrian.

¹² No iyakar yod siopaman ya ag to amtay mambasa tan kerewen yod sikaton ibasa tod sikayo, onebat ya ag to amtan basaen.

¹³ Inkuan na Katawan, “Igagalang da ak ira yan totoo diad panamegley na bibil da, balet arawdawid siak so puso ra. Say rilihion na sarayan totoo et say panagpatlep da labat ed saray abangonan tan saray totontonen ya impaakseb na too.

¹⁴ Kanyan pakelawen ko ra yan totoo diad panggawak ed sikara na mantotombukan a pakelaw. Saray makabat magmaliw iran makulang-kulang, tan say inkasilib da magmaliw ya andi-kana.”

Say Ilalod Arapen

¹⁵ Pangaskasiyan iray totoon mangyaamut ed Katawan na saray plano ra! Maamut a gagawaen da ray getma ra, tan abaloan da ya anggapoy makanengneng ed sikara o makaamta na saray gagawaen da.

¹⁶ Babaligtaren day amin a bengatla. Siopay manona, say dumadamili o say pitek? Say ginawa nayarian to kasin ibaga ed nanggawad sikato, “Ag mo ak ginawa?” Odino nayarian to kasin ibagad sikato, “Ag mo amtay gagawaen mo”?

¹⁷ Onung na ibabaga ra, ag mabayag magmaliw a daralusan so makdel a takel, tan magmaliw a takel so daralusan.

¹⁸ No onsabi tan ya agew, say telek nayarian ton dengelen so libron nibasa ed maksil, tan say bulag ya abayag lan mambibilay ed kabilongetan et nalokasan iray mata to tan makanengneng.

¹⁹ Saray duruka tan mapaabeban totoo et narumog da lamet so liket ya iiter na Katawan a masanton Dios na Israel.

²⁰ Sayan agew balet so anggaan da ray mamapairap ed saray arum a totoo tan mangipapanengneng na ag da pangingalngalep ed Dios. Naderal ya amin iray makasalanan.

²¹ Deralen na Dios iray mamapaoges na kapara ran too, saray manesebel na pakadusa da ray kriminal, tan saray mantatasiy tila pian ag niiter so katonungan da ray maptek so kabibilay da.

²² Kanyan natan say Katawan a Dios na Israel, ya angyagel ed kinen Abraham nen walad gunigon, kuanto, “Sikayo ran totook, ag kayo la napelag ed kababainngan, ag kayo la mampabalangay lupa.

²³ No nanengneng yo ray ogogaw ya iter kod sikayo, nabirbir yod satan a siak so masanto a Dios na Israel. Igalang yo ak tan mankelaw kayon manalagey ed arap ko.

²⁴ Naaralan na saray makulang-kulang so ontalus, tan manliket a paibangat iray mariklamo lawas.”