Isaias 28 - Maung A Balita Biblia

Say Pasakbay ed Nanarian ed Baybay

¹ Pangaskasiyan so nanarian na Israel! Onkukupas so kagalangan to a singa koronan rosas ya akatoon ed olo da ray abuek a pangulo to. Dugad pabalingit iray kaoloan da, balet kidokul-dokul ira lapud mapalalon inkabuek da.

² Say Katawan walay too ton mabiskeg tan makapanyari ya akaparaan ya ondogpa ed sikara; sikatoy onsabi a singa oran a kristal, singa mapmaples ya oran, singa mabiskeg tan maples ya agos na delap, tan lanayapan toy dalin.

³ Nagatin-gatinan so panagpaatagey na saray pangulo.

⁴ Say onkukupas a kagalangan da ra may mapaatagey a pangulo et naandipat a singa saray onaan a bungay igos, naborbor ira tan naakan iran tampol no kaloto ra.

⁵ Onsabiy agew a say Katawan a Makapanyarin-amin et magmaliw a singa mapagalang a koronan bolung a para saray totoo ton akapaliis ed patey.

⁶ Itdan to na maung a pakatalus ed katonungan iray huis, tan biskeg na linawa iray mangyaagel ed saray puirta na siudad pian ag nadogpaan na saray kalaban.

Si Isaias tan saray Abuek a Propita na Juda

⁷ Abuek iray pati propita tan saray papari, kanyan mandongilngil ira. Mapalaloy karakel na nainom dan alak, kanyan mantumba ra tan ag da amtay gagawaen da. Akainom a maung iray propita, kanyan ag da natalusay pasingayew na Dios, tan saray papari et mapalaloy inkabuek da, kanyan aliway sintinsia ra ed saray kason niaapireng ed sikara.

⁸ Napno na ota iray lamisaan ya yoyorungan da, tan anggapoy atilak a pasen a malinis.

⁹ Manririklamo ra nipaakar ed siak. Kuanda, “Siopa ray abaloan na satan a too a babangatan to? Siopa ray mankaukolan na saray ibabangat to? Onkana ra labat ed saray kapamakson ogogaw!

¹⁰ Labay to itayon ibangat diad panamegley na tonggal litra, tonggal linya, tan tonggal liksion.”

¹¹ No ag yo ak dengelen, ikana na Dios sirin iray totoon taga arum a bansa a domay panagsalita diad pangibangat to na sakey a liksion ed sikayo.

¹² Imbaga to ya itdan to kayon amin na inawa tan ligliwa, balet ag kayo dinmengel ed sikato.

¹³ Lapud saya ibangat kayo na Katawan diad panamegley na tonggal litra, tonggal linya, tan tonggal liksion. Diad satan niparokul kayo diad balang ikupbang yo. Nasugat kayo, napatitan kayo, tan nadakep kayo.

Say Sakey a Pundasion a Para Sion

¹⁴ Dengel yoy ibabaga na Katawan, sikayo ran mapaatagey a totoon manooley ed sarayan totoo diad Jerusalem.

¹⁵ Ipapanta yo ya akisipanan kayo ed patey tan akipaknaan kayod pasen a panaayaman da ray inaatey. Ag yo panduaduarowaan a napaliisan yoy deral no onsabi, lapud manmamatalek kayo ya iyagel kayo na saray tila tan saray palikdo.

¹⁶ Balet natan saya so kuan na Katawan a Dios; “Mangipapasen ak ed Sion na mabiskeg tan baleg a pundasion. Mangililira ak ed pundasion na baleg a baton suyok ya akapangisulatan na sarayan salita, ‘Maanos met so malet a pananisia.’

¹⁷ Say inkatonung so mitro a panukat ed samay pundasion, tan say kaptekan so patawin to.” Say oran a kristal so mangyanur ed saray tilan panmamatalkan yo, tan deralen na delap so salimbengan yo.

¹⁸ Magmaliw ya andi-kana so impisipanan yod patey, tan naderal so impipaknaan yod pasen a panaayaman da ray inaatey. Natumba kayon nibasig, no ondalan ed sikayoy deral.

¹⁹ Ondalan lan ondalan ed sikayo so deral, kapag kabwasan. Nepeg yo yan liknaen ed agew tan labi. Mangiter na balon takot ed sikayo so kapag balon balita na Dios.

²⁰ Singa kayo samay too ed sakey a probirbio ya ondokul ed sakey a katrin antikey a tuloy, tan makisir a tuloy so oles.

²¹ Mibakal so Katawan a singa ginawa tod Palandey na Perazim tan diad patar na Gabaon, pian nasumpal toy ginetma ton gawaen—anggaman a singa nidoman tuloy so gagawaen to. Sigput a sumpalen toy makapakelaw a kimey to.

²² Ag yo eelekan so pasakbay ya iiter kod sikayo. No elekan yo lalon nairapan kayon ompaliis. Nadngel koy getma na Katawan a Makapanyarin-amin a deralen toy intiron bansa.

Say Kakabatan na Dios

²³ Dengel yoy ibabagak; asikaso yo no antoy sasalitaen kod sikayo.

²⁴ Wala tay dumaralus a mambaka tan mansagar lawas so gawaen tod daralusan to?

²⁵ Ag ta no niparaan to lay dalin et isibwag to la ray bokel na anis tan komino, tan idasig to lan itanem iray trigo tan sibada tan diad gilig-gilig na alog to et taneman to na saray arum a tanaman?

²⁶ Amta ton gawaen iray kimey to, ta say Dios so angibangat ed sikato.

²⁷ Ag ton balut ikana so pekpek a panmaso ed bokel na anis tan komino, no ag ingen ikana toy bislak a dugarugay kabaleg to.

²⁸ Ag to deralen so trigo diad panilik to lan panilik; amta toy gawaen to diad pangipadalan tod kariton tan baka ed saray trigo, ya ag to ra temeken.

²⁹ Amin ira yan kakabatan et nanlapud Katawan a Makapanyarin-amin. Saray plano na Dios et napno ra na kakabatan, tan aligwas lawas so pansumpalan da.