Isaias 21 - Maung A Balita Biblia

Say Pasingayew a Nipaakar ed Katalo na Babilonia

¹ Sikato yay propisiya a nipaakar ed Babilonia. Say deral a manlalapud makapatak-takot a pasen et onsabin singa alimbusabos ya ombebeltang ed kalawakan.

² Nipasingayew ed siak so nipaakar ed saray maruksan nagawa a nipaakar ed panagtraidor tan panagderal. Sondalo na Elam, dogpa kayo! Sondalo na Media, looban yo ray siudad! Panganggaen la na Dios so panamairap na Babilonia.

³ Lapud samay anengneng tan nadngel ko ed samay pasingayew, ataktakot ak tan nairapan ak tan singa ak biin mampapasakit.

⁴ Nanaelaw ak tan manggiwgiw ak ed takot ko. Nampilalekan kon onsabi lay kabwasan, balet lalon baleg a takot so inter tod siak.

⁵ Diad samay pasingayew, sakey a baleg a ponsia so akaparaan. Akaaplag lad datal so alpombra a yorunga na saray bisita. Manaakan tan maniinom ira. Kabebekta nieyag so sakey a ganggan, “Sikayo ran opisyal na saray sondalo! Iparaan yo ray samper yo!”

⁶ Insan inkuan ed siak na Katawan, “Laka a mangipasen na guardia, tan ibagam ed sikaton ibawag toy nanenengneng to.

⁷ No nanenengneng to ray onsasabin lalaki ya akakabayo a manoolup so kapag duara, tan saray lalakin akalogan ed asno tan kamilyo, nepeg to ran imanoen a maung.”

⁸ Insan say guardia iyeeyag to, “Wadya ak, katawan, a mambabantay ed agew tan labi.”

⁹ Kabebekta nitan la ray lalaki, akakabayo ra tan sanderwa ran nanoolup. Imbawag na samay guardia, “Atalo lay Babilonia! Walad dalin tan atemektemek iray amin a talintaoy diriyos a gagalangen da.”

¹⁰ Totook a taga Israel, singa kayo trigon nailik-ilik, balet natan imbawag kod sikayo so maung a balitan nadngel ko ed Katawan a Makapanyarin-amin a Dios na Israel.

Say Propisiya a Nipaakar ed Edom

¹¹ Sikato yay propisiya a nipaakar ed Edom. Walay nanlapud Edom ya ontatawag ed siak, “Guardia, mabayag niy labi? Magano lay isabiy kabwasan?”

¹² Ebat ko, “Onkakabwasan la, balet onsabi lamet so labi. No labay mo lamet so ontepet, pawil ka dian ontepet.”

Say Propisiya a Nipaakar ed Arabia

¹³ Sikato yay propisiyan nipaakar ed Arabia. Sikayo ran taga Dedan, a nanoolup a mankakampod kalawakan ed Arabia,

¹⁴ itdan yoy danum iray totoon napgaan ya onsisingger ed sikayo. Sikayo ran taga Tema, itdan yoy nakan iray pasasayakup ed sikayo.

¹⁵ Ibabatikan na saray totoo iray ispadan akaparaan a pamatey ed sikara; ibabatikan da ray panan akaparaan a pamanad sikara. Ibabatikan day kaatapan na bakal.

¹⁶ Insan inkuan ed siak na Katawan, “Diad loob na duga-rugan sakey taon mangangga so inkatalonggaring na saray tribu na Kedar.

¹⁷ Dagdaiset so natilak a mabilay ed saray masesebeg a pumapana na Kedar. Siak, say Katawan a Dios na Israel, so nansalita.”