Habacuc 3 - Maung A Balita Biblia

Say Pikakasi nen Habacuc

¹ Sikato yay pikakasi nen propita Habacuc:

² O Katawan, nadngelan ko so ginagawam, et mapalaloy pankelaw ko. Diad sayan panaon mi gawam pa natan ira may makapakelaw a ginagawam nen saman. Mangasi ka pa, anggan mamapasnuk ka.

³ Onsasabi lamet a manlapud Edom so Dios; onsasabin manlapud kapokdulan na Paran so masanton Dios. Akobutan na kagalangan to so katawenan, tan napno na dayew to so sankamundoan.

⁴ Onsasabin maliwliwawa a singa kirmat; mankikidyam ed lima to so silew, a diay akaiyamutan na pakayari to.

⁵ Papaonaen tod arap to so salot tan gangganen ton ontombuk ed sikato so patey.

⁶ No sikatoy ontonda, nayegyeg so mundo; diad ilinggis to onggiwgiw iray bansa. Abuybuyak iray andi-anggaan a kapalandeyan; linmereg iray ag manganggan kapokdulan, saray kapokdulan a nanaakaran to ra nen saman.

⁷ Anengneng kon antakot iray totood Cusan tan manggiwgiw iray totood Madian.

⁸ Saray ilog so amapasnuk ed sika, Katawan? Say dayat so amapetang na olom? Linmogan kad tapew na kaloreman; karwahim so lorem ya ipapalir na bagyo, nen inyakar moy pananalo ed saray totoom.

⁹ Imparaan mon ikana so panam; akaparaan kan mangibolus na balay panam. Papalduaen na kirmat mo so mundo.

¹⁰ Nen anengneng ka na kapalandeyan ginmiwgiw ira; naibung so danum manlapud saray tawen. Inmungol iray danum ed dalem na dalin, tan binmabaleg iray daluyon da.

¹¹ Lapud kidyam na maples iran panam tan say siayap na makasileng a pikam, nantanyareg so agew tan say bulan.

¹² Sipapasnuk kan binmeltang ed mundo; diad gaway sanuk mo ginagatinan mo ray bansa.

¹³ Pinmaway kan mangilaban ed saray totoom, tan mangiliktar ed pinilim ya ari. Kinabil moy pangulo da ray totoon maoges tan sigput mon dineral iray totoo to.

¹⁴ Tinoruk na saray panam so pangulo da ray sondalo to, nen sinmabi ran singa bagyo ya angikayat ed sikami, malikeliket iran singa saray totoon maamut a mamapairap ed saray mairap-bilay.

¹⁵ Impagatin-gatinan mod saray kabayom so dayat, et binmora-bora so mabiskeg a danum.

¹⁶ Narerengel ko ra yan amin, et manggiwgiw ak; manggigiwgiw ed takot iray bibil ko. Paligpalig so laman ko, mankitakit iray salik. Mandeen ak a manalagar ed isabiy panaon a dusaen na Dios iray ondodogpad sikami.

¹⁷ Anggan anggapoy bungay igos tan saray kaubasan, anggan anggapoy naborbor ed kaolibaan tan anggapoy naanid kaalogan, anggan ompatey ya amin iray karniro tan naandian na baka iray koral,

¹⁸ manliket tan manggayaga ak nin siansia, lapud say Katawan a Dios so manangilaban ko.

¹⁹ Pinabiskeg ak na Katawan a Dios. Patalabiten to ray salik a singa sali na ulsa tan iyarawi to ak ed kaatapan diad kapalandeyan.