Genesis 4 - Maung A Balita Biblia

Si Cain tan si Abel

¹ Inakdulan nen Adan si Eva ya asawa to. Nanlokun si Eva tan nananak na sakey a laki. “Diad tulong na Katawan,” kuanen Eva, “akaanak ak na sakey a laki.” Kanyan inngaran to na Cain imay ogaw.

² Et nananak lamet na sakey a laki a si Abel. Nagmaliw a pumapastol si Abel, balet sakey a dumaralus si Cain.

³ Kalabas na pigaran taon, angyakar si Cain na pigaran naani to tan imbagat tod Katawan.

⁴ Insan angyakar met si Abel na kordiron besag na sakey ed saray karniro to, pinatas to, tan imbagat to ray sankaabigan a parti. Akaliket so Dios ed kinen Abel tan samay bagat to,

⁵ balet ag akaliket ed kinen Cain tan samay bagat to. Mapalaloy pasnuk nen Cain tan binmilonget so lupa to.

⁶ Inkuan na Katawan ed kinen Cain, “Akin et mamapasnuk ka? Akin et ambilonget so lupam?

⁷ No maung so ginawam, manimimis ka komun; balet lapud maoges so ginawam, say kasalanan et sisiliban to kan tekmelan. Labay to kan oleyan, balet nepeg mon taloen.”

⁸ Insan inkuanen Cain ed kinen agi ton Abel, “Mamasyar ta ed kaalogan.” Nen wadman la ra, tinekmelan nen Cain si agi to tan pinatey to.

⁹ Tinepet na Katawan ed kinen Cain, “Kawalaan nen Abel ya agim?” Inmebat, “Ag ko amta. Siak tay managasikasod agik?”

¹⁰ Insan inkuan na Katawan, “Akin et onyay ginawam? Manlapud dalin, manakakis ed siak so dala na agim; singa bosis ya onkekerew na bales.

¹¹ Nisamba ka; ag mo la nadalusan so dalin a singa inlokas toy sangi to nen inesep toy dala na agim a pinatey mo.

¹² No ondalus ka, anggapoy naanim; magmaliw kan anggapoy abung tan akar-akar ka diad tapew na dalin.”

¹³ Inkuanen Cain ed Katawan, “Ambelat a tuloy yan dusa; ag ko nasungdoan.

¹⁴ Patataynanen mo ak ed dalin tan diad arap mo. Magmaliw ak ya anggapoy abung tan akar-akar diad tapew na dalin, tan pateyen ak na siopaman a makalmod siak.”

¹⁵ Balet inmebat so Katawan, “Andi! No walay mamatey ed sika, pitoran totoo so pateyen a pinagkabales to.” Kanyan minarkaan na Katawan si Cain a pamasakbay ton ag pateyen na siopaman a makabet ed sikato.

¹⁶ Tinmaynan si Cain ed arap na Katawan tan nanayam ed dalin a tatawagey “Akar-akar,” diad bokig na Eden.

Saray Kabyangay Boleg nen Cain

¹⁷ Inakdulan nen Cain so asawa to, et nanlokun tan inngaran toy Enoc. Insan amaalagey na siudad si Cain tan inngaran tod ngaran na sayan anak to.

¹⁸ Walay lakin anak nen Enoc a manngaray Irad ya ama nen Mehujael, say ama nen Metusael ya ama nen Lamec.

¹⁹ Duaray inasawa nen Lamec, si Ada tan si Zilla.

²⁰ Inyanak nen Ada si Jabal a sengeg na boleg da ray totoon walaan na ayayep tan diad saray tulda so panaayaman da.

²¹ Say agi to si Jubal a sengeg na boleg da ray managtogtog na arpa tan plauta.

²² Inyanak nen Zilla si Tubal-cain a nanggawa na amin a klasiy kagawaan a gansa tan balatyang. Say biin agi nen Tubal-cain et si Naama.

²³ Inkuanen Lamec ed saramay asawa to, “Ada tan Zilla, dengel yo ak: Pinatey koy sakey a lakin tubon-balo, ta kinabil to ak a sinugatan.

²⁴ No pitoran totoo so pateyen a pinagkabales na impamatey ed kinen Cain, Pitomplo tan pito a totoo so pateyen a pinagkabales na pamatey ed siak.”

Si Set tan si Enos

²⁵ Inakdulan nen Adan so asawa to, et nananak na sakey a laki ya inngaran to na Set. Inkuan na asawa to, “Initdan ak na Dios na anak ya onsalat ed kinen Abel a pinatey nen Cain.”

²⁶ Walay anak nen Set ya inngaran to na Enos. Diad sayan panaon, inggapo na katoowan so ontawag ed masanton ngaran a Yahweh.