Genesis 39 - Maung A Balita Biblia

Si Jose tan say Asawa nen Potifar

¹ Saramay Ismaelita inyakar dad Egipto si Jose tan inlako rad kinen Potifar, sakey ed saray opisyal na ari tan kapitan na saray guardiad palasio.

² Walad si Jose sa Katawan, kanyan maaligwas so bilay to. Nanayam ed abung na amo ton Egipsio.

³ Anengneng na amo to a walad si Jose so Katawan, tan maung so pansusumpalay amin a gagawaen to.

⁴ Makaliliket ed sikato si Potifar, kanyan ginawa to a dilin aripen to. Impasen ton inkargado na abung to tan amin a kayaryan to.

⁵ Nanlapud saman, binindisionan na Katawan so sankapamilyaan nen Potifar, lapud kinen Jose. Binindisionan na Katawan ya amin iray walad abung to tan amin a walad saray kaalogan to.

⁶ Impia tod kinen Jose ya amin iray kayaryan to, kanyan anggapoy nepeg ton asikasoen, likud labat ed pampili toy kanen to. Maung ya impanlaman si Jose tan guapo.

⁷ Ag abayag, naibegan na asawa to may amo to. Kinerew ton manakdul ira,

⁸ balet ag labay nen Jose tan inkuantod sikato, “Anggapoy nepeg ya asikasoen nen amok, lapud wadya ak. Impasen to ak ya inkargado na amin a kayaryan to.

⁹ Nampara lay pakaoley mi ed sayan abung tan anggapoy ag to inter ed siak, likud ed sika. Ag ko nayarian a gawaen itan a kabandayan, ta mankasalanan ak ed Dios.”

¹⁰ Anggaman ya inagew-agew ton kerewen a manakdul ira, ag labay nen Jose.

¹¹ Balet aminsan ya agew nen linmoob ed abung nen Potifar si Jose a manumpal a kimey to, nibanan andi rad may aripen.

¹² Siningkat na samay asawa nen Potifar so saloy na kawes nen Jose tan inkuanto, “Akdulan mo ak la.” Balet akaokpus si Jose tan batik ed paway; atilak ed lima to may bii so kawes ton kolibemben.

¹³ Nen anengneng ton akabatik ed paway si Jose tan atilak so kawes tod lima to,

¹⁴ tinawag to ray aripen to tan inkuanto, “Nengneng yo ya! Eekalan itayoy kagalangan na samay Hebreo ya insempet na asawak. Linmoob ed kuartok tan labay to ak ya akdulan, balet inmeyag ak na anggaay nayarian ko.

¹⁵ Nen nadngel ton inmeyag ak, batik ed paway, et atilak tod abay ko so kawes to.”

¹⁶ Insinup to may kawes, anggad sinmempet so amo nen Jose.

¹⁷ Insan inkuan na samay bii, “Samay aripen a Hebreo ya insempet mo dia et linmoob ed kuartok tan papasooten to ak.

¹⁸ Balet nen inmeyag ak, batik ed paway, tan atilak toy kawes to ed abay ko.”

¹⁹ Mapalaloy pasnuk nen Potifar,

²⁰ kanyan impaerel toy Jose tan impaikolung to a kaiba to ray priso na ari.

²¹ Balet walad kinen Jose so Katawan tan binindisionan to, kanyan akaliket ed sikatoy inkargadod prisowan.

²² Impasen toy Jose ya inkargado ed amin da ray arum a priso tan amin a nagagawad prisowan.

²³ Anggapo lay sakit na olo to may inkargadoy prisowan ed antokaman a nipiad kinen Jose, ta walay Katawan ed kinen Jose tan pinaaligwas tod amin a gagawaen to.