Genesis 37 - Maung A Balita Biblia

Si Jose tan saray Agagi to

¹ Nanayam si Jacob diad dalin na Canaan a nanayaman met nen ama to.

² Sikato yay istoria na pamilya nen Jacob. Si Jose a mantaoy labimpito so manaasikaso ed saray karniro tan kanding. Kaiba to ray agagi ton lalaki ya anak di Bilha tan Zilpa, ya asawa met ira nen ama to. Indalem tod kinen ama to ray maoges a gagawaen da ray agagi to.

³ Inararo nen Jacob si Jose nen saray arum ya anak to, ta nianak nen masiken lay Jacob. Inggawaan toy Jose na kawes ya andokey so taklay to.

⁴ Nen anengneng na saray agagi nen Jose ya inaro ni nen Jacob ya ama ra nen say sikara, aliwa-liway pitotongtong dad sikato lapud kabkabosul da.

⁵ Aminsan a labi nankogip si Jose, et tinongtong to ya ed saray agagi to.

⁶ Inkuanto, “Dengel kayod kogip ko.

⁷ Wala tayon amin ed kaalogan a mambeberber na trigo. Inmalagey imay binerber ko tan nantanyareg; saray binerber yo et niliber da tan tinmuek ira.”

⁸ “Anto? Abaloan mo sirin manari kad sikami?” tepet na saray agagi to. Kanyan lalon binosul da, lapud saray imbagbaga ton nipaakar ed kogip to.

⁹ Insan nankogip lamet si Jose tan inkuantod saray agagi to, “Nankogip ak lamet. Anengneng koy agew, bulan, tan labinsakey a bitewen a tinmuek irad siak.”

¹⁰ Imbaga to met yan kogip to ed kinen ama to, et nampasnukan da. “Anto tan a kogip?” inkuanen ama to. “Abaloan mo sirin si inam, saray agagim, tan siak et ondago kamin ondakmomod sika?”

¹¹ Mangimon iray agagi nen Jose ed sikato, balet ninudnunot ira ya nen ama to.

Inlako ray Jose tan Niakar ed Egipto

¹² Aminsan ya agew, nen saray agagi nen Jose et linma rad Sikem a mampastol na saray karniro nen ama ra,

¹³ inkuanen Jacob ed kinen Jose, “Laen mo ra may agagim dimad Sikem a kawalaan dan pampapastolan.” Inmebat si Jose, “On, ama.”

¹⁴ Inkuanen ama to, “Nengneng mo no antoy kipapasen da ray agagim tan saray karniro, insan pawil ka dia tan ibagam ed siak.” Kanyan pinasiput nen ama to ed Patar na Hebron. Sinmabiy Jose ed Sikem,

¹⁵ tan manliliber-liber diman nen anengneng na sakey a too a nantepet, “Antoy aanapen mo?”

¹⁶ “Aanapen ko ray agagik a mampapastol na karniro,” ebat to. “Ibagam pad siak no iner so kawalaan da.”

¹⁷ Inkuanto may too, “Andi la ra dia. Arengel kon ibabaga ra ya onla rad Dotan.” Kanyan tinombuk ira nen Jose ed Dotan, et nalmo to rad man.

¹⁸ Anengneng da nen arawi ni tan kasakbayan to ran naasinggeran, nantotongtongan dan pateyen.

¹⁹ Inkuan na sakey tan sakey ed sikara, “Nia la may managkogip.

²⁰ Pateyen tayo, insan tayo ibantak ed bobun so bangkay to. Ibaga tayon pinatey na ayep ed katakelan. Nengnengen tayod satan no antoy pagmaliwan na saray kogip to.”

²¹ Nadngel ira nen Ruben, kanyan labay ton iyagel si Jose. “Ag tayo ekalay bilay,” inkuanto.

²² “Ibantak yo labat ed sayay bobun diad kalawakan, balet ag yo didiwiten.” Inkuanto ya, pian niagel tod sikara tan nipawil tod kinen ama to.

²³ Nen sinmabiy Jose, inekal day kawes ton andokey so taklay.

²⁴ Insan siningkat da tan imbuntok dad bobun a nakatan.

²⁵ Nen mangakan ira, anengneng day olup na saray Ismaelita a nanlapud Galaad tan mamapaarap irad Egipto. Napnoy beneg na kamilyo ra na pasas tan rikado.

²⁶ Inkuanen Juda ed saray agagi to, “Antoy nagunggona tayod pamatey ed agi tayo, insan tayo ibori?

²⁷ Ilako ti lad saray Ismaelita. Diad ontan ag ti la napasakitan; agi tayo ni met, kalamanan tan kadalaan tayo.” Inmabubon ira may agagi to.

²⁸ Nen onlalabas iray komirsiantin Madianita, inagwat na saramay sanaagi si Jose, insan da inlakoy duamplon kuartan pilak ed saray Ismaelita; inawit da sirin si Jose ed Egipto.

²⁹ Nen pinmawil ed samay bobun si Ruben tan anengneng ton anggapo lad may Jose, pinilat toy kawes to diad ermen to.

³⁰ Linmad saray agagi to tan inkuanto, “Andid man si Jose! Antoy gawaen ko?”

³¹ Amatey iray sakey a kanding, tan insawsaw dad dala to so kawes nen Jose.

³² Inyakar da may kawes ed kinen ama ra tan inkuanda, “Nalmo mi ya. Nengneng yo pa no kayaryan nen anak yo.”

³³ Abirbir to tan inkuanto, “On, kawes to! Pinatey na sakey ya ayep ed katakelan. Abingbingkas si Jose ya anak ko!”

³⁴ Pinilat nen Jacob so kawes to diad ermen to tan nansolung na sako. Abayag a nanermen lapud si anak to.

³⁵ Dinmagon amin iray anak ton lalaki tan bibii a manligliwad sikato, balet ag to labay so naligliwa tan inkuanto, “Anggan wala ak lad pasen a panaayaman da ray inaatey, panermenan ko ni so anak ko.” Kanyan ag to tinondaan ya inermenan si anak ton Jose.

³⁶ Leleg a nagagawa ra ya, inlako na saramay Madianita si Jose ed kinen Potifar diad Egipto. Sakey ed saray opisyal na ari si Potifar tan pangulo na saray guardia ed palasio.