Genesis 29 - Maung A Balita Biblia

Say Insabi nen Jacob ed Abung nen Laban

¹ Intuloy nen Jacob so akar to tan amaarap ed dalin a bandad Bokig.

² Kabebekta anengneng toy sakey a bobun ed alog a walay taloran simpok na karniron mandokdokul ed abay to. Diay inoman da tan walay baleg a batod sangab to.

³ Kapag mantitipon irad may karniro, ekalen na saray pastol imay bato, painomen da ra, insan da ipawil imay bato ed pasen to.

⁴ Tinepet nen Jacob ed saray pumapastol, “Kakaaro, taga iner kayo?” “Taga kami Haran,” ebat da.

⁵ Tinepet to, “Kabat yoy Laban ya anak nen Nacor?” “On,” ebat da.

⁶ “Maksil ni?” tepet to. “On,” ebat da, “Nengneng mo, nia lay Raquel ya anak to, a kaiba to ray karniro nen ama to.”

⁷ Inkuanen Jacob, “Atagey niy agew tan aliwa nin oras na panangisempet na karniro, akin et ag yo ra painomen, insan yo ra ipawil ya ipastol?”

⁸ Inmebat ira, “Ag mi tan nagawaan ya anggad wadya la ran amin so karniro tan nakal lay bato; insan mi la rad satan painomen.”

⁹ Legan nen Jacob a mitotongtong ed sikara, sinmabiy Raquel a kaiba to ray karniro nen ama to.

¹⁰ Nen anengneng nen Jacob si Raquel a kaiba to ray karniro nen pangamaen ton Laban, inmasingger ed samay bobun, inekal to may bato, tan pinainom to ra.

¹¹ Insan to inanguban si Raquel, tan manakis ed liket to.

¹² Inkuantod sikato, “Kanayon ak nen amam; anak ak nen Rebeca.” Batik si Raquel ta imbaga tod kinen ama to so insabi nen Jacob.

¹³ Nen nadngel nen Laban so balitan nipaakar ed kinen kaanakan ton Jacob, binatik ton inabet, nilakap to tan inanguban to, insan to intagar ed abung to. Nen imbaga nen Jacob so amin ya agawa,

¹⁴ inkuanen Laban, “On, andi-duaruwa a sikay dilin laman tan pokel ko.” Nanayam dimay Jacob na sakey bulan.

Nanlingkur si Jacob lapud si Raquel tan si Lea

¹⁵ Inkuanen Laban ed kinen Jacob, “Anggaman kaanakan ta ka, tumangan ta kad pankikimey mo. Pigaray labay mon iyupak ed sika?”

¹⁶ Walay duaran bibiin anak nen Laban: Lea so pangulowan, tan Raquel so yogtan.

¹⁷ Balibali ray mata nen Lea, balet maung ya impanlaman tan maganggana si Raquel.

¹⁸ Walay panibeg nen Jacob ed kinen Raquel, kanyan inkuanto, “Manlingkur ak ed sikayo a pitoy taon, no paasawa yod siak si Raquel.”

¹⁹ Inmebat si Laban, “Labay ta ka nin mangasawad sikato nen say arum; sigi, manayam ka dia.”

²⁰ Nanlingkur sirin a pitoy taon si Jacob pian naasawa toy Raquel, balet singa pigpigaran agew imay pitoy taon, lapud panangaro tod kinen Raquel.

²¹ Insan inkuanen Jacob ed kinen Laban, “Sinmabi lay panaon a pangasawak ed anak ko.”

²² Kanyan namponsiay Laban tan inimbitaan toy amin a totoo.

²³ Balet diad saman a labi si Lea, aliwan si Raquel, so inter nen Laban, tan sikatoy inakdulan sirin nen Jacob. (

²⁴ Inter nen Laban si aripen ton Zilpa ed kinen Lea, pian walay katulong to.)

²⁵ Diad kabwasan labat so impakaamta nen Jacob a si Lea manayay kaakdul to. Linmad kinen Laban tan inkuanto, “Akin et ginawa yo yad siak? Si Raquel so nansagputan ko. Akin et pinalikdo yo ak?”

²⁶ Inmebat si Laban, “Aliwan kaogaliyan dia ya ononay yogtan a miasawa nen say pangulowan.

²⁷ Manalagar ka na sakey simba. Asumpal lad satan so ponsia, insan iter kod sikay Raquel, no manlingkur ka nid siak na pitoy taon.”

²⁸ Inmabubon si Jacob, tan kalabas na sakey simba, inter nen Laban ed sikato si Raquel. (

²⁹ Inter nen Laban si aripen ton Bilha ed kinen Raquel, pian walay katulong to.)

³⁰ Inakdulan met sirin nen Jacob si Raquel, tan inaro to ni nen si Lea. Insan nanlingkur ni na pitoy taon ed kinen Laban.

Saray Anak nen Jacob

³¹ Nen anengneng na Katawan ya ag inaro nen Jacob si Lea, inabuloyan ton makapananak; si Raquel, balet, ag mananak ta lepes.

³² Nanlokun si Lea tan nananak na sakey a laki. Inkuanto, “Anengneng na Katawan so segsegang ko; natan aroen ak la nen asawak”; kanyan inngaran to na Ruben imay ogaw.

³³ Nanlokun lamet tan nananak na sakey nin laki. Inkuanto, “Inter met na Katawan yan anak ko, ta arengel ton ag ak inaroy asawak”; kanyan inngaran to na Simeon.

³⁴ Nanlokun a pitlo tan nananak na sakey nin laki. Inkuanto, “Natan magmaliw a lalon maasingger so asawak, ta inyanakan koy taloran lalaki”; kanyan inngaran to na Levi.

³⁵ Nanlokun a pipat tan nananak na sakey a laki. Inkuanto, “Natan idayew koy Katawan”; kanyan inngaran to na Juda. Nanlapud saman, tinmonda lan mananak.