Genesis 16 - Maung A Balita Biblia

Si Agar tan si Ismael

¹ Anggapoy anak nen Sarai ya asawa nen Abram. Walay aripen ton bii ya Egipsia a manngaray Agar,

² kanyan inkuantod kinen Abram, “Ag inyabuloy na Katawan a nawalaan ak na anak. Anta no akdulan mo may biin aripen ko? Nayarin makaanak na para siak.” Inmabuloy si Abram ed imbaga nen Sarai;

³ kanyan inter nen Sarai ed sikato si Agar a piakdulan to. (Agawa ya nen samploy taon lan manaayam ed Canaan si Abram.)

⁴ Inakdulan nen Abram si Agar, et nanlokun. Nen naamtaan nen Agar a malokun, nagmaliw a mapasirayew tan nilemlemew toy Sarai.

⁵ Inkuanen Sarai ed kinen Abram, “Kasalanan mo so panlelemlemew nen Agar ed siak. Siak a dili so angiter ed sika na saman ya aripen ko, tan nanlapud naamtaan ton malokun la lelemlemewen to ak. Say Katawan lay manintinsia no siopay nalilingod sikatan dua.”

⁶ Inmebat si Abram, “Aripen mo tan walad silong na pakayarim; gawam ed sikatoy labay mo.” Pinapairap nen Sarai si Agar, kanyan tinmaynan.

⁷ Inabet na anghil na Katawan si Agar ed abay na sobul a walad kalawakan, diad dalan a mamaarap ed Sur,

⁸ tan inkuanto, “Agar ya aripen nen Sarai, nanlapwan mo tan iner so laen mo?” Inmebat, “Ibabatikan koy amok a bii a si Sarai.”

⁹ Inkuanto may anghil sa Katawan, “Pawil ka, tan paaripen kad sikato.”

¹⁰ Insan inyarum ton inkuan, “Itdan ta ka na saray kabyangay boleg mo a diad karakel da et anggapoy makabilang.

¹¹ Mananak kay sakey a laki, tan ingaran mo na Ismael, ta nadngel na Katawan so tagleey mo.

¹² Balet mambilay a singa atap ya asno so anak mo; magmaliw a kalaban toy amin a too tan labanan dan amin. Siyanan to ray amin a kakanayon to, ta kabosul to ra.”

¹³ Tinepet nen Agar ed sikaton dili, “Anengneng ko tan talaga so Dios, et mabilay ak ni?” Inngaran to sirin so Katawan ya akisalitad sikato na, “Dios a Mannenengneng.”

¹⁴ Kanyan tatawagen na saray totoo imay bobun a walad nanleetay Cades tan Bered na “Say Bobun na Mabilay a Nanenengneng to Ak.”

¹⁵ Nananak si Agar na sakey a laki, tan inngaran to na Ismael.

¹⁶ Wa lomplo tan anem lay taon nen Abram nen naanakan to si Agar.