FILIPOS 2 - Maung A Balita Biblia

Say Oliran ya Intilak nen Cristo

¹ Pabibiskegen kayo kasiy bilay yod Cristo? Liligliwaen kayo kasiy aro to? Wala kasiy pikakasakey yod Ispirito? Mankakasiyan tan manaarowan kayo kasi?

² No ontan kayo, gawa yon sigput sirin so liket ko—mankakasakey kayod kanunotan, manaarowan kayo, tan mankakasakey kid getma tan kalakal.

³ Ag kayo manggagaway antokaman lapu labat ed siblet yo o lapud labay yoy mampasirayew; mampaabeba kayo ingen tan ipasen yo ray arum a totoo a maung ira nen say sikayon dili.

⁴ Nengneng yoy pankaabigay arum, aliwan say pankaabigan yo labat.

⁵ Nepeg yon aligey ogali nen Cristo Jesus:

⁶ Anggaman a walad sikatoy inka-Dios, ag to impasoot a mansiansian kaparay Dios.

⁷ Nilakseb to ingen so inka-Dios to, tan inala toy kipapasen na aripen nen nagmaliw a too.

⁸ Nampaabeba tan maonur ya anggad patey— on, anggad ipapatey ed krus.

⁹ Kanyan say Dios intanduro to ed sankatageyan, tan initdan toy ngaran a matalonggaring nen say dinan man a ngaran.

¹⁰ Diad ontan, amin da ray apalsan walad tawen, diad mundo tan dalem na dalin. ontalimukor iran mangigalang ed ngaran nen Jesus.

¹¹ Ibawag met ed satan na amin a katoowan a si Jesu-Cristo so Katawan. Lapud saya, say Dios Ama so nagalang.

Onliwawa kayon singa Silew

¹² Kanyan, inararon agagi, bangta maonur kayo lawas nen kaiba yo ak, nepeg a lalon maonur kayo natan ya andid tan ak ed sikayo. Mankimey kayon katekep na takot tan giwgiw anggad nagnagnap lay kilalaban yo,

¹³ ta say Dios so mangiiter ed sikayoy panlabay tan pakayarin manggawad linawa to.

¹⁴ Gawa yo ray amin a kimey ya anggapoy ngorongoro tan sangsangan,

¹⁵ pian nipanengneng yon anak kayoy Dios, malinis tan anggapoy pakabalawan yod saray pilimugan yon totoon maoges tan makasalanan. Nepeg a liwawaan yo ra a singa panliliwaway bitewen ed tawen,

¹⁶ legan yon ipupulong ed sikaray salitan mangiter na bilay. No onyay gawaen yo, nayarian ta kin ikinun no Agew nen Cristo, ta ag adarak iray sagput tan kimey ko.

¹⁷ Panliketan ko tan pinabangen ta kin amin ed sayan liket ko, anggaman bilang ya onterter so dalak tan onarum ed bagat ya isasaklang na pananisia yo ed Dios.

¹⁸ Ontan met sirin a nepeg yoy manliket, tan pinabang yo ak met ed liket yo.

Si Timoteo tan si Epafrodito

¹⁹ Maniilalo ak ed Katawan a Jesus a nibakik lad tan a tampol si Timoteo, pian napabiskeg so linawak no naamtaan kod sikatoy kipapasen yo.

²⁰ Anggapo lay miparad pililikna tod siak tan panangisakit tod sikayo.

²¹ Ta anggapoy aanapey balang sakey no ag say pankaabigan ton dili, aliwan say pankaabigan nen Jesu-Cristo.

²² Sikayo lay mamaneknek ed katooran nen Timoteo. Tinulongan to ak ed impangikayat na Maung a Balita; singa anak a tinmulong ed ama to.

²³ Kanyan iilaloan kon ibakid tan a tampol no naamtaan ko lay peteg a kipapasen ko dia.

²⁴ Maniilalo ak a diad tulong na Katawan magano lay pakakar kod tan.

²⁵ Ninunot ko a nakaukolan a pasempeten ko lad tay Epafrodito, ya agi tid Katawan tan kaparak a kumikimey tan sondaloy Dios. Imbaki yon ontulong ed pankaukolan ko.

²⁶ Makakailiw lad sikayon amin tan mapagpaga, ta nadngelan yoy impansakit to.

²⁷ Tuan nansakit tan inatey lawari, balet kinasiay Dios tan pati siak so kinasian to. Pati siak kuanko, ta diad inyabig to nipaliis ak ed pinasyan ermen komun.

²⁸ Kanyan maseet ak a mangibakid sikatod tan, pian makaliliket kin makanengneng ed sikato lamet. Maung met pian nabawasay pagak.

²⁹ Manliket ki sirin ed pangawat yod sikato a singa pangawat yod sakey ya agid Katawan. Pagalangan yo ray totoon singa sikato,

³⁰ ta imposta toy bilay to tan inatey lawari makasengeg ed kimey lapud Cristo nen tinulongan to ak ed pasen yo, lapud sikayon dili et ag yo ak natulongan.