Filemon 1 - Maung A Balita Biblia

¹ Sayan sulat nanlapud kinen Pablo, sakey a priso makasengeg ed Cristo Jesus, tan nanlapu met ed kinen Timoteo ya agi ta— Diad kinen Filemon ya inararo min kakimeyan,

² tan diad iglisia a mantitipon ed abung to, diad kinen Apia ya agi min bii, tan diad kinen Arkipo a kapara min sondalo:

³ Itdan kayo komun na Dios ya Ama tayo tan say Katawan a Jesu-Cristo na bindision tan kareenan.

Say Panangaro tan Pananisia nen Filemon

⁴ Agin Filemon, misasalamat ak lawas ed Dios kapag nanunotan ta ka ed saray pikakasik,

⁵ ta nadngelan koy panangarom ed saray totooy Dios, tan say pananisiam ed Katawan a Jesus.

⁶ Pikakasik a say pankakaiba tayod saksakey a pananisia et mambungay pakatalus ed amin a kaabigan a nanaawat tayo, lapud pikakasakey tid Cristo.

⁷ Pinablin agi, aliketan tan aligliwa ak a maung lapud panangarom, ta apabiskeg moy linawa na amin da ray totooy Dios.

Say Kerew a para si Onesimo

⁸ Lapud Cristo, nayarin mataletalek ak a mangiganggan ed sikay nepeg mon gawaen.

⁹ Balet say aro so anagdag ed siak a mikasid sika. Gagawaen koy onya, anggaman siak si Pablo, say ibabaki nen Cristo Jesus, tan natan apriso lapud sikato.

¹⁰ Kanyan walay kerewen kod sika, nipaakar ed kinen Onesimo ya anak kod pananisia, ta atanggoyur kon manisia legan ya apriso ak.

¹¹ Anggapoy kana tod sika nen saman balet natan, dakel lay nayarian ton itulong ed sika tan siak.

¹² Papapawilen ko natan ed sika tan singak impitaruk ed sikato so pusok.

¹³ Labay ko komun a patilaken dia, pian alaen toy pasen mon ontulong ed siak legan kon apriso lapud Maung a Balita.

¹⁴ Balet ag ko labay a gawaen ya no anggapoy abuloy mo, pian aliwan pasootan, no ag ingen mabolbolus, so pananulong mo.

¹⁵ Angangko, niarawin agano ed sika si Onesimo, pian diad ipawil tod sika et nakaibam ya anggan kapigan.

¹⁶ Aliwan sakey ya aripen labat natan, no ag ingen sakey lan inararo ya agid Cristo. No panoy panangarok ed sikato, lalon inararom, ta sikatoy aripen mo tan agim ed Katawan!

¹⁷ No tuan ipapasen mo ak a kaiba, awat mo a singa pangawat mod siak.

¹⁸ No akagaway makapoy odino akautang ed sika, siak lay paningilan mo.

¹⁹ Siak so mangisusulat ya: Siak, a si Pablo, so mambayar ed sika. (Ag ko la nepeg ya ipanunot ed sikan utang mod siak so anggan say bilay mo.)

²⁰ Kanyan, lapud Katawan, ag mo ak papabaingan ed sayan kerew ko. Paliket mo kariy pusok, siak ya agim ed Cristo!

²¹ Ag ko panduaruwaan, legan kon isusulat ya, a gawaen mo ray kekerewen kod sika, tan amtak a pasolukan mo ni ingen.

²² Iparaanan mo ak pa met na natuloyan ko, ta iilaloan kon iyabuloy na Dios a makapawil ak ditan onung na ipipikasi yon amin.

Saray Kaonuran a Pabano

²³ Papaibanoay Epafras a kaibak dian apriso, lapud Cristo Jesus.

²⁴ Ontan met a papaibanoan ira di Marcos, Aristarco, Demas, tan Lucas a kakimeyan ko ra.

²⁵ Nawalaan kayon amin komuy bindision na Katawan a Jesu-Cristo.