Ezekiel 9 - Maung A Balita Biblia

Adusa so Jerusalem

¹ Insan nadngel kon ineyag na Dios, “Gali dia, sikayon totoo a manusad siudad. Awit yo ray armas yo.”

² Tampol a sinmabi ray anemiran lalaki ya akaarmas a nanlapu rad puirtad paway diad bandad baybay na Timplo. Kaiba ray lakin akakawes na linen a sankaawit toy sakey a pansulatan. Dinmago ra tan nanalagey irad abay na gansan altar.

³ Insan say kagalangay Dios na Israel inmatagey a nanlapud saray kirubin a kawalaan ton gendat, insan dinmere ed lolooban na Timplo. Say Katawan tinawag to may toon akakawes na linen tan inkuantod sikato,

⁴ “Lakad intiron siudad na Jerusalem, ta markaan moy muling na balang sakey a toon maermen tan magunigon, lapud amin a makapaingungot a nagagawad siudad.”

⁵ Insan nadngel kon inkuan na Dios ed saramay arum a lalaki, “Tombuk yod siudad tan mampatey kayo. Anggapoy pipirdonaen yo; ag yo kakasiay siopaman.

⁶ Patey yo ray matakken, malangwer a lalaki tan bibii, saray ina, tan saray anak. Balet ag yo didiwiten so siopaman a walay marka to ed muling. Igapo yo diad Timplok.” Kanyan inggapo rad saray pangulon manalalagey diman ed Timplo.

⁷ Inkuan na Dios ed sikara, “Dotakan yoy Timplo. Pano yo na bangkay iray patio to. Igapo yo lay kimey yo!” Kanyan inggapo ray nampapatey na saray totoo ed dalem na siudad.

⁸ Legan a nagagawa so pampapatey, wadman ak a mambukbukor. Intiblak ko, insan ko ineyag, “Katawan a Dios, diad ontan lan pasnuk mod Jerusalem pateyen mon amin iray totoon atilak ed Israel?”

⁹ Inmebat so Dios, “Baleg a tuloy so kasalanan na saray totood Israel tan Juda. Nampapatey irad inerman a pasen na dalin na Israel tan pinano ray Jerusalem na amin a kaogsan. Ibabaga ra a siak a Katawan et inkaindan koy bansa ra tan ag ko ra nanenengneng.

¹⁰ Balet ag ko ra kasian; gawaen kod sikaray ginawa rad arum a totoo.”

¹¹ Insan pinmawil imay lakin linen so kawes to tan inkuantod Katawan, “Sinumpal ko ray ganggan mod siak.”