Ezekiel 48 - Maung A Balita Biblia

Say Inkaapag na Dalin ed saray Tribu

^1-7 Say ketegan ed bandad baybay na dalin et mampabokig a manlapud Dayat na Mediteraneo ya anggad siudad na Hetlon, anggad Dalan na Hamat, anggad Siudad na Enon, anggad ketegan diad nanleetan na nanarian na Damasco tan Hamat. Kapag tribu mangawat na sakey a parti na dalin ya onlaknab a manlapud ketegan ed bokig ya anggad sagur a nasabi toy Dayat na Mediteraneo. Saraya so mantotombukan a mangawat manlapud baybay ya anggad abalaten: Dan, Aser, Neftali, Manases, Efraim, Ruben, tan Juda.

Say Nidoman Parti diad Pegley na Dalin

⁸ Say onsoblay a parti na dalin et ibiig a nidoma-domay pangikanaan. Labinduan kilomitro so kaawang to manlapud baybay ya anggad abalaten, tan say karokey ton manlapud bokig ya anggad sagur et singa karokey na niiter ed balang tribu. Nipaalagey ed sayan parti so Timplo.

⁹ Diad pegley to yan parti, isaklang ed Katawan so pasen a labinduan kilomitro so karokey to tan samploran kilomitro so kaawang to.

¹⁰ Naitdan na betang ed sayan masanton parti iray papari. Labinduan kilomitro so karokey na betang da, manlapud bokig ya anggad sagur, tan limaran kilomitro so kaawang to manlapud baybay ya anggad abalaten. Nipaalagey ed pegley to yan parti so Timplo na Katawan.

¹¹ Sayan masanton pasen et para saray papari a say sengeg da et si Zadoc. Matoor iran nanlingkur ed siak tan ag ira akibabali ed saray arum ya Israelita diad impanggagawa ray kaogsan; aliwa ran singa saray kabyangay tribu nen Levi ya akibabali ra.

¹² Kanyan nepeg a nawalaan ira na nidoma-doman parti ya onketeg ed partin kayaryan na saray Levita, tan sankasantosan ed amin da ray arum a parti.

¹³ Nepeg a saray Levita et nawalaan met ira na nidoma-doman pasen, diad niabalaten na parti da ray papari. Nakaukolan met a labinduan kilomitro so karokey to manlapud bokig ya anggad sagur, tan limaran kilomitro so kaawang to manlapud baybay ya anggad abalaten.

¹⁴ Sankaabigan a parti ed intiron dalin so pasen a nisaklang ed Katawan, tan anggapoy antokaman a parti na sayan pasen a nilako, nisalat, odino nialis ed siopaman. Masanto yan pasen tan kayaryan na Katawan.

¹⁵ Say akeraan ed samay nidoma-doman parti, salanti say labinduan kilomitro so karokey to tan duara tan kapalduan kilomitro so kaawang to, et aliwan masanto, balet ikana na karaklan. Nayarin manayam irad man tan ikana ra. Diad pegley so nepeg a kawalaan na siudad,

¹⁶ tan nepeg a kuadrado, a duan libo tan apatalasus tan pitomplon mitro so karokey na balag dapag.

¹⁷ Diad kaliber-liber na siudad ed balang dapag et walay liwang a sanlasus tan talomplo tan sakey a mitro so benlag to.

¹⁸ Say dalin ya akeraan kayarin nipaalagey so siudad diad niabalaten na masanton pasen—limaran kilomitro so karokey tan duara tan kapalduan kilomitro so kaawang to diad bandad bokig tan limaran kilomitro so karokey tan duara tan kapalduan kilomitro so kaawang to diad bandad sagur—et pandalusan na saray totoon manaayam ed siudad.

¹⁹ Siopamay manaayam ed siudad, anggan anton tribu so sengeg to, et nayarian toy ondalus ed saman a dalin.

²⁰ Ontan sirin, say intiron kabaleg na samay pasen a walad pegley na samay nibiig a parti et kuadradon labinduan kilomitro so karokey na balang dapag, tan saya et sakopen to so pasen a kawalaan na siudad.

^21-22 Kayarin nibiig so dalin ya anggad bokig tan anggad sagur a sakop toy pangiletnegan na Timplo, say dalin na papari, say dalin da ray Levita, tan say siudad, say keran dalin et kayaryan na manoley a prinsipi. Nasabi na sayan dalin so ketegan ed bokig tan sabien tod sagur ya anggad Dayat na Mediteraneo, tan diad baybay miketeg ed dalin a kayaryan nen Juda tan diad abalaten miketeg ed dalin a kayaryan nen Benjamin.

Say Dalin a Para Arum a Tribu

^23-27 Diad niabalaten na sayan nidoma-doman parti, balang sakey ya atilak nin tribu nepeg a mangawat na sakey a parti na dalin ya onlaknab a manlapud ketegan ed bokig ya anggad sagur diad Dayat na Mediteraneo. Saraya so mantotombukan a mangawat manlapud baybay ya anggad abalaten: Benjamin, Simeon, Isacar, Zabulon tan Gad.

²⁸ Diad niabalaten na partin niiter ed tribu nen Gad, say ketegan et mampaabalaten a sagur manlapud Tamar ya anggad sabangan na Cades, insan mampabaybay a sagur a tontonen toy ketegan na Egipto ya anggad Dayat na Mediteraneo.

²⁹ Say Katawan a Dios inkuanto, “Ontan so pakaapag-apag na dalin a kayaryanen na saray tribu na Israel.”

Saray Puirta na Jerusalem

^30-34 Walay labinduan lolooban a mamaarap ed siudad na Jerusalem. Kapag sakey ed apatiran padir na siudad walay duan libo tan apat a lasus tan pitomplon mitro so karokey to tan walay taloran puirta to, a balang sakey ningaran ed kapag tribu. Saray puirtan walad bandad baybay a padir ningaran ira ed kindi Ruben, Juda, tan Levi; diad bandad bokig, ningaran ira ed kindi Jose, Benjamin, tan Dan; diad bandad abalaten a padir ningaran ira ed kindi Simeon, Isacar, tan Zabulon; tan diad bandad sagur a padir ningaran ira ed kindi Gad, Aser, tan Neftali.

³⁵ Say intiron karokey na samay padir diad apatiran dapag et siam a libo, walon lasus tan walomplon mitro. Manlapud natan say nepeg a ngaran na siudad et “Wadya-so Katawan!”