Ezekiel 43 - Maung A Balita Biblia

Pinmawil ed Timplo so Katawan

¹ Samay laki inyakar to ak ed puirtan akaarap ed bokig,

² et anengneng kod man a manlalapud bokig so mankidyam a liwawa na kiwawala na Dios ed Israel. Singa ungol na dayat so bosis na Dios, tan mankidyam so liwawa na mundo.

³ Sayan pasingayew et singa samay pasingayew ya anengneng ko nen sinmabi so Dios ya aneral ed Jerusalem, tan samay pasingayew ya anengneng kod gilig na Ilog na Kebar. Insan ko intiblak ed dalin.

⁴ Samay mankidyam a liwawa et dinmalan ed samay puirtad bokig insan linmoob ed Timplo.

⁵ Inyatagey ak na ispiritu na Katawan, insan to ak inyakar ed samay patiod dalem, a diay akanengnengan kon napno na kagalangan na Katawan so Timplo.

⁶ Nanalagey diman ed abay ko imay laki, tan nadngel kon akitongtong ed siak so Katawan manlapud man ed Timplo:

⁷ “Sika a toon ompatey, sikatoya so tronok. Manayam ak dia a kaibak iray totood Israel tan oleyan ko ra ya anggad angga. Saray totoo tan saray arari ra et ag da lan balut ipelag ed kababaingan so masanton ngaran ko diad pangigalang dad saray arum a diriyos odino diad asingger a kiwawala na saray bangkay da ray inaatey ya arari ra.

⁸ Saray arari inyabay dad puirta na Timplok so puirta na palasio ra, kanyan padir labat so nanleetan mi. Lapud saray makapaingungot a ginagawa ra, impelag dad kababaingan so masanton ngaran ko, kanyan diad gaway pasnuk ko dinederal ko ra.

⁹ Natan nepeg a tondaan da lay pangigagalang dad arum a diriyos tan ekalen da la ray bangkay na arari ra. No ontoluk ira, anggad anggan kaibak ira ed ayaman ko.”

¹⁰ Intuloy na Katawan ya inkuan, “Sika a toon ompatey, ibagam ed saray totood Israel so nipaakar ed Timplo, tan paaral mod sikara so plano to. Pagmaliw mo ran ombaing lapud saray maoges a gagawaen da!

¹¹ Et no ombaing ira lapud saray ginagawa ra, ipaliwawam ed sikara so plano na Timplo: say inkagawa to, saray lolooban tan saray papawayan to, say alagey to, say inkilira na amin a bengatla, tan amin da ray ganggan tan saray pananontonan to. Isulat mo ra yan amin a para sikara pian nanengneng da so inkilira na amin a bengatla tan natombuk da ray amin a totontonen.

¹² Sikato ya so ganggan na Timplo: Masanto ya amin iray pasen ed liber-liber na Timplo diad toktok na palandey.”

Say Altar

¹³ Saraya so sukat na altar, onung ed sukat ya inkana ed impanukat ed samay Timplo. Diad liber-liber na sengeg na altar walay paagosan a duamplon pulgada so kaaralem to tan duamplon pulgada so kaawang to. Samploran pulgada so kaatagey na sangab to.

¹⁴ Say sankaabebaan a parti na altar, manlapud tapew na sengeg et apataplo tan walon pulgada so kaatagey to. Say kumadwan parti et nilira ed duamplon pulgada diad liber-liber na tambib na samay ononan parti, tan duaran mitro so kaatagey to. Say omtombuk a parti et nilira met ed duamplon pulgada diad liber-liber na tambid na samay kumadwan parti.

¹⁵ Sayan parti na altar a diay pamopoolan na saray bagat et duaran mitro met so kaatagey to. Saray pinagkasaklur na apatiran soyuk et atagey ira nen say intiron tapew na altar.

¹⁶ Kuadrado so tapew na altar, tan anemiran mitro so karokey na balang dapag.

¹⁷ Kuadrado met imay pegley a parti, pitora tan kapalduan mitro so balang dapag, tan walay sangab to diad paway na tambib a say kaatagey to et samploran pulgada. (Duamplon pulgada so kaawang na samay paagosan.) Diad bandad bokig so kawalaan na takayan a mamaatagey ed samay altar.

Say Impankonsagra ed samay Altar

¹⁸ Say Katawan a Dios kuantod siak, “Sika a toon ompatey, dengel moy ibagak ed sika. No asumpal lan agawa so altar, nepeg mon isaklang ed Dios diad pamool mod tapew to na saray bagat tan diad pangiwalsik mod altar na dala da ray ayayep ya imbagat.

¹⁹ Saray papari labat a kabyangan na tribu nen Levi a say sengeg da et si Sadoc so onlad kawalaan ko a manlingkur ed siak. Siak a Katawan a Dios so nangganggan ed saya. Itdan mo ra na sakey a kilaw a bakan kalakyan ya isaklang dan bagat a para kasalanan.

²⁰ Nepeg a mangala kay dala to, insan mo iyan ed samay pinagkasaklur na tapew na altar, diad saray sokung na samay pegley a parti na altar, tan diad liber-liber na tambib to. Diad onya, nalinisan mo so altar tan nisaklang mod Dios.

²¹ Nepeg mon alaen imay bakan kalakyan a nisaklang a bagat a para kasalanan, insan mo poolan ed sakey a niganan pasen diad paway na solar na Timplo.

²² Diad ontombuk ya agew nepeg moy mangala na sakey a kanding a kalakyan ya anggapon balut so deral na laman to, insan mo isaklang a bagat a para kasalanan. Linisan moy altar diad panamegley na dala to a singa samay ginawam ed bakan kalakyan.

²³ Kayarim a nagawa ra ya, mangala kay sakey a kilaw na bakan kalakyan tan sakey a karniron kalakyan ya anggapon balut so deral na laman da,

²⁴ insan mo ra iyakar ed siak. Saray papari pokopukan da ra na asin, insan da ra isaklang ed siak a sakey a bagat a popoolan.

²⁵ Inagew-agew ed loob na pitoran agew nepeg a mangisaklang ka na sakey a kanding, sakey a bakan kalakyan, tan sakey a karniron kalakyan a bagat iran para kasalanan. Amin da nepeg ya anggapon balut so deral na laman da.

²⁶ Diad loob na pitoran agew saray papari isaklang dad Dios so altar tan iparaan da pian nikana la.

²⁷ Kalabas na satan a sakey simba, nepeg ya igapo la na saray papari so mangisaklang ed tapew na altar na saray bagat a popoolan tan saray bagat a para kareenan. Diad satan pakaliketan ta kayo ya amin. Siak a Katawan a Dios so nansalita.”