Ezekiel 40 - Maung A Balita Biblia

SAY PASINGAYEW A NIPAAKAR ED TIMPLOD ARAPEN A PANAON ( 40:1–48:35 ) Niakar ed Jerusalem si Ezekiel

¹ Nen kumaplon agew na balon taon a sikatoy kumaduamplo tan liman taon na inkibantak mid arum a bansa tan sikato met so kumalabinapat a taon na inkadakep na Jerusalem, aliknak so pakapanyari na kiwawalay Katawan, insan to ak inyakar ed arawi.

² Diad sayan pasingayew say Dios inyakar to ak ed dalin na Israel tan inggaton to ak ed toktok na atagey a palandey. Diad bandad arap ko, anengneng koy grupo na saray paalagey a singa ra sakey a siudad.

³ Inyasingger to ak, et anengneng koy sakey a lakin mankidyam a singa gansa. Sankabembenan toy sakey ya abel a panagsukat tan bislak a pangsukat tan manalalagey ed abay na dalan na puirta.

⁴ Inkuantod siak, “Mambantay ka, sika a toon ompatey. Mandengel kan maung tan apiger mon imanoen ya amin iray ipanengneng kod sika, ta sikato tan so makasengeg na angyakaran kod sika dia. Nepeg mon ibagad saray totood Israel iray amin a nanengneng mo.”

Say Puirtad Bokig

⁵ Say anengneng ko et say Timplo ya apaliberan na padir. Inala na samay laki imay panagsukat ton bislak a taloran mitro so karokey to, insan to sinukat imay padir. Taloran mitro so kaatagey to tan taloran mitro so kakapal to.

⁶ Insan linmad dalan na puirtan akaarap ed bokig. Amaatagey a tinmakayan, tan diad toktok sinukat to so lolooban; taloran mitro so kaaralem to.

⁷ Diad labas to ya, walay sakey a dalan a walay taloran kuarton panagguardiaan diad kapag dapag. Kuadrado so balang sakey ed saramay kuarto, taloran mitro so kapag dapag, tan duara tan kapalduan mitro so kalapar na saray padir ed nanleleetan da. Diad labas na saramay kuarton panagguardiaan walay lolooban a taloran mitroy karokey to tan mamaarap ed lolooban a kuarton akaarap ed Timplo.

^8-9 Sinukat to yan kuarto, et apatiran mitro so kaaralem to. Sayan kuarto so pansamputan na samay dalan na puirtan sankaasinggeran ed Timplo, tan diad kasamputan na dalan, sakey a mitro so kakapal na saray padir. (

¹⁰ Saramay kuarton panagguardiaan a walad balang dapag na samay dalan et nampaparay kabaleg da, tan nampaparay kakapal na saray padir a nanleleetan da.)

¹¹ Kayari to ya, sinukat na samay laki so kaawang na samay dalan. Pitoran mitro ya amin so kaawang to tan say liwang na nanleetan na duaran akalokas a puirta et limaran mitro so sukat to.

¹² Diad arap na kapag kuarton panagguardiaan walay abeban padir a masoluk a kapalduay mitro so kaatagey to tan ontan met so kakapal to. (Saramay kuarto et taloran mitro so karokey tan kaawang na balang dapag dan amin.)

¹³ Insan to sinukat so kaarawi na manlapud beneg na sakey a kuarto ya anggad beneg na kuarton kapetekan to no ombeltang ed dalan, et labintalon mitro so karokey to.

¹⁴ Say kuarton walad bandad samput et ompaway ed patio. Sinukat to man a kuarto, et samploran mitro so kaawang to.

¹⁵ Duamplo tan anem a mitro so karokey na samay dalan manlapud paway na padir na puirta ya anggad samput a dapag na kaonuran a kuarto.

¹⁶ Wala ray ankelag a bintana ed saray padir diad bandad paway na saramay kuarto tan ontan met ed saramay padir ed nanleleetan da. Wala ray nikortin kiew a palmira diad saray padir ya akaarap ed samay dalan.

Say Patio ed Paway

¹⁷ Samay laki inlabas to ak ed dalan na puirta nen inyakar to ak ed patio. Walay talomplon kuarto a nisiping irad bandad paway na padir, tan diad arap na sarayan kuarto walay liwang a batoy datal to,

¹⁸ a manliber-liber ed patio. Sayan patiod paway et niabeba ed samay patio ed dalem na Timplo.

¹⁹ Walay dalan na puirta ed niatagey a pasen a mamaarap ed patio ed dalem. Sinukat na samay laki so karokey na nanleetan na saramay duaran dalan na puirta, et limamplo tan duan mitro so karokey to.

Say Puirta ed Baybay

²⁰ Insan sinukat na samay laki so dalan na puirtan walad baybay a dapag a mamaarap ed patio ed paway.

²¹ Say sukat na amin da ray kuarton panagguardiaan ed kapag dapag na dalan, saray padir ed nanleleetan da, tan say lolooban a kuarto et kaparay sukat da ra may walad dalan na puirtad bokig. Duamplo tan anem a mitro so karokey to tan labintalon mitro so kaawang to.

²² Say lolooban a kuarto, saray bintana, tan saray nikortin kiew a palmira et singa saramay walad puirtad bokig. Apatiran balitang dia so mamaarap ed puirta, tan say lolooban a kuarto et walad bandad samput a sankaarap toy patio.

²³ Diad kabasil na patio manlapud sayan dalan na puirtad baybay et walay sananey a dalan na puirta a mamaarap ed patiod dalem, a singa samay walad bokig a dapag. Samay laki sinukat toy karokey na nanleetan na sarayan duaran dalan na puirta, et walay limamplo tan duan mitro.

Say Puirtad Abalaten

²⁴ Kayari to man, samay laki inyakar to ak ed abalaten a dapag, tan anengneng mid man so sakey nin dalan na puirta. Sinukat to et miparad saramay arum a puirta so kabaleg na saray padir ed dalem tan say lolooban ton kuarto.

²⁵ Wala ray bintana ed saray kuarto ed sayan dalan na puirta a singa saramay arum. Duamplo tan anem a mitro so karokey to tan labintalon mitro so kaawang to.

²⁶ Pitoran balitang so mamaarap ed saya, tan say lolooban a kuarto to et wala met ed bandad samput a sankaarap toy patio. Wala ray nikortin kiew a palmira diad saray padir ya akaarap ed samay dalan.

²⁷ Wala dia met so dalan na puirtan mamaarap ed patio ed dalem. Samay laki sinukat to so kaarawi ya anggad sayan kumadwan dalan na puirta, et walay limamplo tan duan mitro.

Say Patio ed Dalem: Say Puirta ed Abalaten

²⁸ Samay laki inlabas to ak ed dalan na puirtad sagur nen inyakar to ak ed patio ed dalem. Sinukat to may dalan na puirta, et kapara na kabaleg na arum iran puirtad paway na padir.

^29-30 Say kabaleg na saray panagguardiaan ton kuarto, say lolooban ton kuarto, tan saray padir tod dalem et kapara na kabaleg na saramay walad arum a dalan na puirta. Wala met iray bintana na sayan dalan na puirta. Say karokey to et duamplo tan anem a mitro tan say kaawang to et labintalon mitro.

³¹ Say lolooban a kuarto to et sankaarap toy sananey a patio, tan nikorti ray palmiran kiew diad saray padir na dalan. Waloran balitang so mamaarap ed sayan puirta.

Say Patio ed Dalem: Say Puirta ed Bokig

³² Samay laki inlabas to ak ed dalan na puirta ed bokig nen inyakar to ak ed patio ed dalem. Sinukat to may dalan na puirta, et kapara na kabaleg na saray arum.

³³ Say kabaleg na saray panagguardiaan ton kuarto, say lolooban ton kuarto, tan saray padir to ed dalem et kapara na kabaleg na saramay walad arum a dalan na puirta. Aliber na saray bintana tan anggan samay lolooban a kuarto. Duamplo tan anem a mitro so karokey to tan labintalon mitro so kaawang to.

³⁴ Say lolooban na baleg a kuarto et sankaarap toy patio ed paway. Nikorti ray kiew a palmira ed saray padir diad lolooban. Waloran balitang so mamaarap ed sayan puirta.

Say Patio ed Dalem: Say Puirta ed Baybay

³⁵ Insan samay laki inyakar to ak ed dalan na puirta ed baybay. Sinukat to, et kapara na kabaleg na arum iran dalan na puirta.

³⁶ Singa saramay arum a puirta, wala met iray panagguardiaan ton kuarto, saray adikoraan a padir ed dalem, say lolooban a kuarto, tan saray nipaliber a bintana. Duamplo tan anem a mitro so karokey to tan labintalon mitro so kaawang to.

³⁷ Akaarap ed patio ed paway so lolooban a kuarto. Nikorti ray kiew a palmira ed saray padir ed paway ya akaarap ira ed lolooban. Waloran balitang so mamaarap ed sayan puirta.

Saray Paalagey ed Abay na Puirtad Baybay

³⁸ Diad patio ed paway walay paalagey ya akasiping ed dalan na puirtad dalem diad baybay a dapag. Akalokas ya ed lolooban a kuarto ya akaarap ed patio, tan dia da oorasan iray lamay ayayep ya ibagat dan popoolan.

³⁹ Diad sayan lolooban a kuarto walay apatiran lamisaan, duara ed kapag dapag na kuarto. Diad sarayan lamisaan so pamapapateyan na saray ayayep ya ibagat, a nayarin bagat a popoolan odino bagat a para kasalanan odino bagat a pambayar.

⁴⁰ Diad paway na samay kuarto wala met so apatiran lamisaan a kapara na saramay walad dalem, duara ed kapag dapag na lolooban na puirtad baybay.

⁴¹ Waloran amin iray lamisaan a panagpateyan ed saray ayayep ya ibagat: apatira so wala ed dalem na samay kuarto tan apatira so walad paway diad samay patio.

⁴² Tinabas a bato ira may apatiran lamisaan ed samay nisiping a paalagey ya ikakanad pangiparaan na saray bagat a popoolan. Kapalduay mitro so kaatagey da, tan talomplon pulgada so lapar na tapew dan kuadrado. Nisisinup ed sarayan lamisaan iray amin a kagawaan a pamatey ed saray ayayep ya ibagat.

⁴³ Taloran pulgada so kalapar na nitapal a nipaliber ed tambib na saramay lamisaan. Nitatapew ed saramay lamisaan iray amin a karnin ibabagat.

⁴⁴ Insan samay laki inyakar to ak ed patio ed dalem. Walad may duaran kuarto, say sakey akaarap ed baybay diad abay na samay dalan na puirtad baybay tan say sakey a kuarto akaarap ed baybay diad abay na dalan na puirtad abalaten.

⁴⁵ Imbagad siak na samay laki a samay kuarton akaarap ed abalaten et para saray paparin manlilingkur ed Timplo,

⁴⁶ tan samay kuarton akaarap ed baybay et para saray paparin manlilingkur ed altar. Si Sadoc so sengeg na amin da ray papari; sikara labat so kabyangay tribu nen Levi a naabuloyan ya onlad kawalaan na Katawan, ta manlingkur irad sikato.

Say Patio ed Dalem tan say Timplo

⁴⁷ Sinukat na samay laki imay patio ed dalem, et limamplo tan duan kuadrado. Walad bandad sagur so Timplo, tan diad arap to say altar.

⁴⁸ Insan to ak inyakar ed kuarton lolooban na Timplo. Sinukat to may dalan na lolooban; taloran mitroy kaaralem to tan pitoran mitroy kaawang to tan sakey tan kapalduan mitro so kakapal na saray padir tod kapag dapag.

⁴⁹ Wala ray balitang a mamaarap ed samay kuarton lolooban a samplora tan kapalduan mitro so kaawang to tan anemiran mitro so kaaralem to. Walay duaran lusek ya akaalagey iran sansakey ed balang dapag na samay lolooban.