Ezekiel 4 - Maung A Balita Biblia

Si Ezekiel Manggaway Sakey a Tanda na Kalakob na Jerusalem

¹ Inkuan na Dios, “Sika a toon ompatey, mangala kay laryo, iyan mod arap mo, tan igulis mod tapew to so siudad na Jerusalem.

² Insan igulis mo met so panakep ed siudad; igulis mod kaliber-liber na siudad iray tirinsira, saray bunton na dalin, saray kampo, tan saray mason ankakabaleg.

³ Mangala ka met na kawalin balatyang tan iliram a singa padir ed nanleetan mo tan say siudad. Arap ka ed siudad. Alakob la so siudad, tan sika so manlalakob. Sikato ya so sakey a tanda ed bansa na Israel.

^4-5 “Insan ka ondokul ya akadiking ed kawigi, tan ipelag kod sikay kasalanan na bansa na Israel. Mansiansia kad man na talon lasus tan siamaplon agew tan manlikna kay kairapan lapud kasalanan da. Sinintinsiaan ta ka na sanagew para kapag sakey taon a dusa ra.

⁶ No nasumpal mo ya, pigar kad nikawanan a diking mo tan manlikna kay kairapan lapud kasalanan na Juda diad loob na apataploy taon—sanagew para kapag sakey taon a dusa ra.

⁷ “Ag mo iyaalis so matam ed kalakob na Jerusalem. Ayagan moy poniti so siudad tan mampropisiya ka sumpad sikato.

⁸ Baluren ta ka, pian ag ka makaarap ed anggan dinan a diking mo, anggad nasumpal so kalakob na siudad.

⁹ “Natan mangala ka na pigaran trigo, sibada, agayep, lintil, milit, tan ispilti. Pankakames mod sakey a pananginan, insan ka manggaway tinapay. Sikato so kanen mo legay talon lasus tan siamaplon agew ya akarokul kan akadiking ed nikawigim.

¹⁰ Nayarian moy mangan a maminsan na waloran onsa na tinapay ed loob na sanagew.

¹¹ Agetaran met so inomen mo, duaran kupa ed sanagew.

¹² Mamarlang ka na amagan tai na too tan panlutoan mo na tinapay, insan mo kanen so tinapay a sankanengneng ka na balang sakey a too.”

¹³ Say Katawan kuanto, “Onya naani so pangan na saray Israelita ed saray kakanen ya isesebel na Ganggan, no itaytayak ko rad saray arum a bansa.”

¹⁴ Balet inmebat ak, “Andi, Katawan a Dios! Ag ko ni dinotakan so siak a dili onung ed Ganggan. Nanlapu lad impanogaw ko ag ak nin balut angan na karniy ayep a basta inatey odino pinatey na ayep ed katakelan. Ag ak nin balut angan na kakanen a marotak onung ed Ganggan.”

¹⁵ Inkuan na Dios, “Marakep itan. Abuloyan ta ka sirin a mangikana na amagan taiy baka, tan saya so panggawaan mo na tinapay mo.”

¹⁶ Inkuanto nid siak, “Sika a toon ompatey, patondaen koy pangitolur na tinapay ed Jerusalem. Saray totood man maermen tan mapaga ran mansukat na tagano a kanen da tan say danum ya inomen da.

¹⁷ Onkulang ira na tagano tan inomen; naekalan ira na ilalo, tan makapasinagem so panirap da lapud saray kasalanan da.”