Ezekiel 38 - Maung A Balita Biblia

Say Pangikana na Dios ed Gog

¹ Say Katawan akisalitad siak.

² Inkuanto, “Sika a toon ompatey, mansalita ka na sumpad Gog a manonan manoley na saray bansa na Mesec tan Tubal diad dalin na Magog. Mansalita ka na sumpad sikato

³ tan ibagam ed sikato a siak a Katawan a Dios et kalaban to.

⁴ Papoliktaren ko, insan ko tagaan so songut to, tan igayugoy kon iyarawi a pati amin a sondalo to. Sarayan sondalo ton amayamay a kaiba ray kabayo ra et akasamper tan akaispada so balang sakey ed sikara tan wala ray akakabayo a nampaparay kawes dan para bakal.

⁵ Kaiba to ray lalakin taga Persia, Sudan, tan Libia ya akasamper tan akahilmit ira.

⁶ Kaolup to met ya amin iray mibabakal a lalakin taga saray dalin na Gomer tan Bettogarma diad baybay; ontan met a kaiba to ray lalakin taga amayamay a bansa.

⁷ Ibagam ed sikato a mamparaan tan pamparaanen to ray sondalo ton ipangulo to.

⁸ Kalabas na amayamay a taon iganggan kon looban toy sakey a bansan saray totoo to et pinmawil iran nanlapud saray amayamay a bansa tan manaayam iran arawid kaatapay bakal. Looban to ray kapalandeyan na Israel ya abayag iran apaolyan tan ataynan, balet panaayaman la ra na amin da ray totoon arawid kaatapan.

⁹ Sikato tan saray amayamay a sondalo to a pati saray amayamay a bansa et dogpaan dan singa ra kaloreman ya onlaknab ed saman a dalin.”

¹⁰ Sikato yay kuan na Katawan a Dios ed kinen Gog: “No onsabiy tan a panaon igapom so mannunot na sakey a maoges a plano.

¹¹ Getmaen moy onloob ed sakey a bansan ag to niagel so sikaton dili, a mambibilay iray totoo ed kareenan tan arawi rad kaatapan diad saray baley ya anggapoy padir tan makapangyagel.

¹² Samsaman yo ray totoon manaayam ed saray siudad a nen saman aderal-deral. Nen saman atiptipon irad nanlapud saray bansa, tan natan manaayam irad pegley na mundo a wala ray ayayep tan arum a kayaryan da.

¹³ Saray totoon taga Seba tan Dedan tan saray nigosiantin taga baley na Espanya et tepeten dad sika, “Tinipon mo ray sondalom ta ondogpa kayo tan mansamsam kayo, anto? Gagalam so manala na saray pilak tan balituk, saray baka tan saray kayaryan, insan mo ibatik ira yan asamsam mo anto?”

¹⁴ Kanyan say Katawan a Dios imbaki to ak a mangibagad Gog na sayan labay ton ibagad sikato: “Natan legan a saray totook ya Israel et mambibilay iran arawid kaatapan, mamparaan kan

¹⁵ ondago manlapud arawin pasen mo diad baybay, ta ipangulom iray amayamay a makapanyarin sondalon taga amayamay a bansa ya akakabayo ran amin.

¹⁶ Dogpaan mo ray totook ya Israel a singa ka bagyon ondadalan ed dalin. No onsabiy tan a panaon, ibaki ta kan onloob ed dalin ko, pian nipanengneng kod saray bansa no siopa ak, pian nipanengneng koy kasantosan ko diad panamegley mo.

¹⁷ Sika so sinalitak la nen abayag lan panaon, nen imbawag ko diad panamegley na saray aripen kon propita ed Israel, ya onsabi ray agew a mangibaki ak na toon ondogpad Israel.” Say Katawan a Dios so nansalita.

Dusaen na Dios so Gog

¹⁸ Say Katawan a Dios kuanto, “Diad agew a looban nen Gog so Israel, mampasnuk ak na mapalalo.

¹⁹ Ibabawag ko a diad gaway pasnuk ko, nagawad satan ya agew so mabiskeg a yegyeg ed dalin na Israel.

²⁰ Balang sira tan manok, balang ayep, baleg may melag, tan balang too onggiwgiw ed takot tod siak. Nakusbo iray kapalandeyan, nabosbos iray pandel, kelas, tan nageban amin iray padir.

²¹ Taktakoten koy Gog diad panamegley na saray nandoroman desyang. Siak a Katawan a Dios so nansalita. Mandodoyukan na ispada iray totoo to.

²² Dusaen ko diad panamegley na salot tan pateyan. Say makmaksil ya oran a nantarok na yilo, apoy, tan asupri, et ipelag kod sikato, saray sondalo to, tan saray amayamay a bansan akigampid sikato.

²³ Diad onya ipanengneng kod amin a bansa a siak so matalonggaring tan masanto. Diad satan naamtaan da a siak so Katawan.”