Ezekiel 36 - Maung A Balita Biblia

Say Bindision na Dios ed Israel

¹ Say Katawan kuanto, “Sika a toon ompatey, mansalita kad kapalandeyan na Israel tan ibagam ya ondengel ira ed ibabagak ed sikara,

² siak a Katawan a Dios: Saray kalaban na Israel kuanda, ‘Maung, anggan sarayan abaybayag lan kapokdulan et kayaryan tayo la ra!’

³ “Mampropisiya ka, sirin, tan ibawag mo so ibabagak, siak a Katawan a Dios. Nen adakep tan asamsaman na saray kaliber-liber a bansa so kapalandeyan na Israel, niluludlurey na balang sakey a too so Israel.

⁴ Natan sirin dengel yoy ibabagak, siak a Katawan a Dios, ed sikayo ran kapalandeyan tan kapokdulan, sikayo ran kolus tan patar, sikayo ran pasen ya ataynan ya aderal-deral, sikayo ran ataynan tan asamsaman a siudad tan binabalaw na amin da ray kaliber-liber a bansa.

⁵ “Diad gaway pasnuk ko, siak a Katawan a Dios, nansalita ak na sumpad saray kaliber-liber a bansa, nagkalalo lad Edom. Diad ontan lan liket tan panagbalaw da, dinakep day dalin ko tan kinayaryan da ray pastolan to.

⁶ “Kanyan mampropisiya ka ed dalin na Israel; salitam ed saray kapalandeyan, saray kapokdulan, saray kolus, tan saray patar so ibabagak, siak a Katawan a Dios diad maimon a pasnuk ko, lapud saramay impanpapabaing tan impanleleglemew na saray bansa ed sikara.

⁷ Siak a Katawan a Dios sinambaan kon ipelag ed kababaingan iray bansan walad kaliber-liber.

⁸ Balet mambulong lamet iray kakiewan ed kapalandeyan na Israel tan mambunga ra a para sikayon totook ya Israel. Magano la so isempet yo.

⁹ Wala ak ed diking yo, tan andi-duaruwa a nabaka lamet so dalin yo tan nataneman.

¹⁰ Parakelen koy bilang yo. Manayam kayod saray siudad tan pasimbaloen yon ipaalagey iray aderal-deral a bengatla.

¹¹ Parakelen koy bilang da ray totoo tan saray ayayep. Magmaliw a dakel niy bilang yo nen say karakel yo nen saman, ta nawalaan kayo na amayamay ya anak. Panayamen ta kayod man a singa samay impanayam yo nen saman, ta paaligwasen koy bilay yo a mapalalo nen say bilay yo nen saman. Diad satan naamtaan yo a siak so Katawan.

¹² Papawilen ta kayo, sikayon totook ya Israelita, a manayam lamet ed dalin yo. Magmaliw a dilin dalin yo, tan ag to lan balut paerasen iray anak yo.

¹³ “Siak a Katawan a Dios kuanko: Tua a saray totoo ibabaga ra a manangay too so bansa na Israel, tan tatakewen to ray anak na bansa.

¹⁴ Balet manlapud natan, aliwa lan manangay too a bansa tan managtakew na saray anak to. Siak a Katawan a Dios so nansalita.

¹⁵ Say dalin ag to la nepeg a dengelen iray bansan manluludlurey ed sikato odino onnengneng ed saray totoon mamapabaing ed sikato. Say dalin ag to la takewen iray anak to. Siak a Katawan a Dios so nansalita.”

Say Balon Bilay na Israel

¹⁶ Say Katawan akisalitad siak.

¹⁷ Inkuanto, “Sika a toon ompatey, nen manaayam ed dalin da iray Israelita, dinotakan da may dalin da lapud maoges a kabibilay tan kagagawa ra. Impasen kon samay kagagawa ra et marotak onung ed ganggan a singa biin naliliberan.

¹⁸ Impaliknak ed sikara so sulit na pasnuk ko lapud saray impanpapatey dad saray totoo ed bansa tan lapud saray talintaoy diriyos a sikaray makasengeg na impandotak dad dalin.

¹⁹ Sinintinsiaan ko ray dusa lapud maoges so impanbilay da tan saray ginagawa ra, kanyan inkaykayat ko rad nandoroman bansa.

²⁰ Diad inerman a niakaran da, impelag dad kagalangan so masanton ngaran ko, lapud imbabaga na saray totoo, ‘Totoo ra ya na Katawan, balet nakaukolan a taynan day dalin to.’

²¹ Sikato yay makasengeg no akin et ninunot koy para masanton ngaran ko, bangta impelag na saray Israelita ed kababaingan diad inerman a pasen a nila ra.

²² “Natan sirin, salitam ed saray Israelita yan ibabagak ed sikara, siak a Katawan a Dios: Say gawaen ko et aliwan sikayoy makasengeg, Israelita, no ag ingen say masanton ngaran ko ya impelag yod kababaingan diad iner man a bansan nila yo.

²³ No iparontal kod saray bansa so kasantosan na mablin ngaran ko—say ngaran ya impelag yod kababaingan diad pegley da—nakabatan dad satan a siak so Katawan. Siak, a Katawan a Dios, so nansalita. Ikana ta kayo a mangiparontal ed saray bansa a masanto ak.

²⁴ Alaen ta kayo ed balang bansa tan ipawil ta kayo ed dilin dalin yo.

²⁵ Walsikan ta kayoy malinis a danum tan linisan ta kayod saray amin a talintaoy diriyos yo tan diad amin a bengatlan nandotak ed sikayo.

²⁶ Itdan ta kayo na balon puso tan balon isip. Ekalen kod sikayoy inmawet a puso yon singa bato tan itdan ta kayo na maonur a puso.

²⁷ Iyan kod sikayo so ispirituk tan patoluken ta kayod saray ganggan ko tan saray bilin kod sikayo.

²⁸ Insan manayam kayod dalin ya inter kod saray lalaki yo. Magmaliw kayon totook tan siak so Dios yo.

²⁹ Iyagel ta kayod antokaman a pakadotakan yo. Iganggan ko ray trigo a mamparakel ira, pian ag kayo la nadalan na eras.

³⁰ Parakelen koy bunga na saray kakiewan yo tan say naani ed kaalogan yo, pian anggapo la ray ondalan ya eras a makasengeg na pakapelagan yod kababaingan ed saray bansa.

³¹ Nanunotan yod satan ira may maoges a ginagawa yo tan saray makapoy a kagagawa yo, et diad ontan kabosulen yoy sikayon dili lapud saray kasalanan yo tan saray kaogsan yo.

³² Israel, labay kon ipaamtad sika ya aliwan sikay makasengeg na panggagawaan kod saya. Labay kon nabaingan tan napaabeba ka lapud saray gagawaen mo. Siak a Katawan a Dios so nansalita.”

³³ Say Katawan a Dios kuanto, “No alinisan ta kayo lad saray kasalanan yo, panayamen ta kayo lamet ed saray siudad yo tan paapiger kod sikayo iray aderal-deral.

³⁴ Saray ondadalan nen saman ed saray alog yo et anengneng dan apaolyan tan matakel la ra, balet padalusan ko rad sikayo lamet.

³⁵ Salitaen na balang sakey no panon a sayan siudad, a nen saman sakey a kalawakan, et nagmaliw a singa Tanamanan na Eden, tan no panon a panaayaman la tan apaliberan la na padir iray siudad ya ageba-geba, ataynan, tan aderal-deral nen saman.

³⁶ Diad satan saray siudad ed kaliber-liber ya ag aderal et naamtaan da a siak a Katawan so amasimbalon amaalagey ed saray aderal-deral a siudad tan amatanem ed saray apaolyan a kaalogan. Siak a Katawan so angisipan a gawaen koy onya—et tuan gawaen ko.”

³⁷ Say Katawan a Dios kuanto, “Abuloyan ko lamet iray Israelita ya onkerew irad siak na tulong, tan parakelen koy bilang da a singa poluk na karniro.

³⁸ Saray siudad ya aderal-deral ira natan et napano ra na saray totoo a singa inkapano na Jerusalem nen saman na saray karniron imbabagat no pista. Naamtaan dad satan a siak so Katawan.”