Ezekiel 34 - Maung A Balita Biblia

Saray Managpastol ed Israel

¹ Say Katawan akisalitad siak.

² Inkuanto, “Sika a toon ompatey, mansalita ka na sumpa ed saray manoley ed Israel. Mampropisiya kad sikara tan ibagam ed sikara so ibabagak, siak a Katawan a Dios: Asintinsiaan kayo lan nadusa, sikayon pumapastol ed Israel! Aasikasoen yoy sikayon dili, balet ag yon balut ipapastol iray karniro.

³ Iinomen yoy gatas, isosolung yo ray lanan abel, papatasen tan kakanen yo ray sankaabigan a karniro. Balet ag yon balut ipapastol iray karniro.

⁴ Ag yo inasikaso iray makapoy, ag yo tinambal iray mansasakit, ag yo binerber so sugat da ray asugat, ag yo pinapawil iray akar-akar, odino inanap iray abalang. Pinapairap yo ra lalaingen.

⁵ Lapud anggapoy mamapastol ed saray karniro, nikaykayat ira tan pinapatey tan binubuag ira na saray ayayep ed katakelan.

⁶ Kanyan nanakar-akar ed kapokdulan tan diad kapalandeyan iray karnirok. Nikaykayat irad nandoroman pasen ed intiron mundo. Anggapoy anggan sakey a nananap ed sikara.

⁷ “Natan, sikayo a pumapastol, dengel yoy ibabagak ed sikayo, siak a Katawan.

⁸ Andi-duaruwa a siak so mabilay a Dios; dinmengel kayo komun ed siak. Dinogpaan, pinatey tan binuag na saray ayayep ed katakelan iray karnirok lapud anggapoy mampastol ed sikara. Saray pumapastol ko et ag da inanap iray karnirok. Say laman dan dili so inaasikaso ra, aliwan saray karniro.

⁹ Kanyan dengel kayod siak, sikayo ran pumapastol.

¹⁰ Ibawag ko a siak a Katawan a Dios so kalaban yo. Ekalen kod sikayo ray karnirok tan ag ta kayo lan balut pampastolen ed sikara; ag ko la iyabuloy a say laman yon dili labat so asikasoen yo. Iyagel kod sikayo iray karnirok tan ag ko iyabuloy a kanen yo ra.

Say Maung a Pumapastol

¹¹ “Siak a Katawan a Dios ibagak ed sikayo a siak a dili so mananap ed saray karnirok tan asikasoen ko ra

¹² a singa pangasikaso na pumapastol ed saray karniro to ran nikaykayat balet atiptipon ira lamet. Isempet ko ra a manlapud saray pasen a nikaykayatan da diad samay agew ya ambilonget tan maatap.

¹³ Alaen ko rad saray arum a bansa, pantitiponen ko ra, insan ko ra ipawil ed dilin dalin da. Iwanwan ko rad kapalandeyan tan kakolusan na Israel, tan pankabkaben ko rad malambut a pastolan.

¹⁴ Pankabkaben ko rad patar na kapalandeyan ya arawid kaatapan, diad saray patar tan diad amin a mabonan pastolan ed dalin na Israel.

¹⁵ Siak a dili so mampastol ed saray karnirok, tan iyanapan ko ray pasen a pampainawaan da. Siak a Katawan a Dios so nansalita.

¹⁶ “Anapen ko ray abalang, papawilen ko ray akaarawi, berberen ko ray asugat, tan tambalen ko ray mansasakit; balet deralen ko ray mataba tan mabiskeg, ta siak so pumapastol a manggagaway kaptekan.

¹⁷ “Natan sirin, karnirok ira, siak a Katawan a Dios ibabagak ed sikayo a sintinsiaan koy balang sakey ed sikayo tan ibiig koy maung ed makapoy, saray karniro ed saray kanding.

¹⁸ Saray arum ed sikayo et ag ni apenek ed saray sankaabigan a dika; ginagatinan yo ingen iray ag yo kakanen! Iinomen yo ray malinew a danum tan kikiloten yo ray ag yo iinomen!

¹⁹ Saray arum a karnirok et kaukolan a kanen da ra may dikan gagatinan yo tan inomen da ra may danum a kikiloten yo.

²⁰ “Kanyan natan, siak a Katawan a Dios ibabagak ed sikayo a sintinsiaan ta kayo ran mabiskeg a karniro tan saray makapoy a karniro.

²¹ Impapaliis yo ray mansasakit tan binubuno yo ran pinaarawid poluk.

²² Balet iyagel ko ray karnirok tan ag ko la iyabuloy a napairap ira lamet. Sintinsiaan ko so balang sakey ed saray karnirok ta ibiig koy maung ed maoges.

²³ Itdan ko ray sakey ya arin singa si aripen kon David tan sikatoy saksakey a mampastol ed sikara, tan asikasoen to ra.

²⁴ Siak a Katawan so magmaliw a Dios da, tan say manoley ed sikara et sakey ya arin singa si aripen kon David. Siak a Katawan so nansalita.

²⁵ Misipanan ak ed sikara tan sayan sipanan et mangyarawi ed sikara ed maoges. Paandien kod dalin iray maruksan ayayep, pian arawid kaatapan iray karnirok diad panayaman dad saray kaalogan tan diad iyogip dad katakelan.

²⁶ “Bindisionan ko ra tan abuloyan ko ran manayam ed kaliber-liber na masanton pokdul ko. Bindisionan ko rad man na saray ompelag ya oran no nakaukolan da.

²⁷ Mambunga ray kakiewan, wala ray bungay kaalogan, tan manayam ed dilin dalin to ya arawid kaatapan so balang sakey a too. No paksoten koy akagolunggolung ed saray totook tan ibolus ko rad saray angaripen ed sikara, naamtaan dad satan a siak so Katawan.

²⁸ Ag la ran balut samsaman na saray bansan anggapoy Dios da, tan ag la ra buagen na saray ayayep ed takel. Mambilay la ran arawid kaatapan, tan anggapo lay manaktakot ed sikara.

²⁹ Itdan ko ra na mataban kaalogan tan patondaen ko la so eras ed dalin. Ag la rad satan balbalawen na saray arum a bansa.

³⁰ Naamtaan na balang sakey ya iyaagel koy Israel tan sikara so totook. Siak a Katawan a Dios so nansalita.

³¹ “Sikayo ran karnirok, say poluk a papakanen ko, et sikayo ray totook, tan siak so Dios yo,” kuay Katawan a Dios.