Ezekiel 33 - Maung A Balita Biblia

Say Dios Tinoro ton Managbantay si Ezekiel

¹ Say Katawan akisalitad siak.

² Inkuanto, “Sika a toon ompatey, ibagam ed saray totoo so nagawa no mangyakar ak na bakal ed sakey a dalin. Saray totood saman a bansa mamipili rad sikara na sakey a managbantay.

³ No nanengneng ton ondadago ray kalaban, paknulen toy trumpita a pamasakbay tod balang sakey a too.

⁴ Siopamay toon makadngel ed samay pasakbay, balet et ag to ingalngalep tan onsabiy kalaban a mamatey ed sikato, sikaton dili so natetel ed ipatey to.

⁵ Kasalanan toy impatey to, lapud ag to inngalngalep so pasakbay. No dinengel to may pasakbay, akabatik komun.

⁶ No nanengneng na managbantay ya ondadago ray kalaban, et ag to paknulen so trumpita, onsabi ed satan iray kalaban tan pateyen da ray makasalanan, balet samay managbantay so natetel tan singilen kod sayan impatey da.

⁷ “Natan, sika a toon ompatey, gawaen ta ka a managbantay na bansa na Israel. Nepeg mon ipasabid sikara iray pasakbay ya iiter kod sika.

⁸ No imbawag kon ompatey so toon maoges, balet et ag mo pinasakbayan a mangoman ed maoges a panagbilay to, sikatoy ompatey a makasalanan, balet sikay tetelen ko ed impatey to tan singilen ta ka.

⁹ No pasakbayan moy sakey a toon maoges, et ag ontondan mankasalanan, sikatoy ompatey a makasalanan, balet nilaban moy bilay mo.”

Say Kanepegan na Balang sakey a Too

¹⁰ Say Katawan akisalitad siak. Inkuanto, “Sika a toon ompatey, olit mon ibagad saray Israelita so sasalitaen da: ‘Nabebelatan kami lapud saray kasalanan tan saray kaogsan mi. Onkakapoy kami lan onkakapoy. Panon niy pambilay mi?’

¹¹ Ibagam ed sikara a legan a siak so mabilay a Katawan a Dios, ag ko panliketan so ipatey na toon makasalanan. Labay ko ingen a magbabawid saray kasalanan to tan mambilay. Israel, tondaan mo lay kaogsan a gagawaen mo. Akin et labay moy ompatey?

¹² “Natan, sika a toon ompatey, ibagam ed saray Israelita a no mankasalanan so matonung a too, ag nilaban na maung iran ginagawa to. No ontondan manggaway kaogsan so toon maoges, ag la nadusa. Balet no mankasalanan so maung a too, ag nipaliis ed patey so bilay to.

¹³ Nayarin isipan kon mambilay so maung a too, balet no nunoten ton masarag la ray ginagawa ton kamaungan insan igapo toy mankasalanan, ag ko nunoten so antokaman a ginagawa ton kamaungan. Ompatey lapud saray kasalanan to.

¹⁴ Nayarin pasakbayan koy toon maoges a sikatoy ompatey, balet no ontondan mankasalanan tan gawaen toy kaptekan tan kamaungan—

¹⁵ singa bilang ipawil toy impotika na akautang ed sikato odino ipawil toy tinakew to—no ontondan mankasalanan tan onuren to ray ganggan a mangiter na bilay, sikatoy ag ompatey no ag ingen mambilay.

¹⁶ Pirdonaen ko ray ginagawa ton kasalanan tan mambilay lapud nanggawa na kaptekan tan kamaungan.

¹⁷ “Balet, ibabaga na saray totoom ya aliwan matonung so gagawaen ko! Aliwan tua tan, no ag ingen say kagagawa ra so aliwan matonung.

¹⁸ No itonda na matonung a too so manggaway kamaungan tan igapo toy manggaway kaogsan, ompatey lapud saya.

¹⁹ No ontondan mankasalanan so toon maoges tan manggawa lay kaptekan tan kamaungan, mambilay lapud saya.

²⁰ Balet Israel, ibabagam ya aliwan matonung so gagawaen ko. Sintinsiaan ta ka onung na gagawaen mo.”

Say Balitan Nipaakar ed Kapelag na Jerusalem

²¹ Nen kumaliman agew na kumaplon bulan na kumalabinduan taon na inkibantak mid arum a bansa, walay sakey a toon akabatik a nanlapud Jerusalem tan imbaga tod siak a naplag la so siudad.

²² Diad samay labi kasakbayan na insabi to, aliknak so biskeg na pakapanyari na kiwawalay Katawan. Nen sinmabi may too ed samay kaimbwasan, impawil na Katawan ed siak so pakapansalita lamet.

Saray Kasalanan na saray Totoo

²³ Say Katawan akisalitad siak.

²⁴ Inkuanto, “Siak a toon ompatey, saray totoon manaayam ed saray aderal-deral a siudad na dalin na Israel et ibabaga ra: ‘Saksakey a too si Abraham, et niiter ed sikatoy intiron dalin. Amayamay itayo la, kanyan natan kayaryan tayo la yay dalin.’

²⁵ “Ibagam ed sikara so ibabagak, siak a Katawan a Dios: Mangakan kayoy karnin nandala. Mangigagalang kayod saray talintaoy diriyos. Mampapatey kayo na saray totoo. Panoy pangibabaga yon kayaryan yoy dalin?

²⁶ Manmamatalek kayo ed saray ispada yo. Makapaingungot iray kagagawa yo. Mikakaloguran so balang sakey ed sikayo. Panoy pangibabaga yon kayaryan yoy dalin?

²⁷ “Ibagam ed sikara a siak a Katawan a Dios papasakbayan ko ra a legan a mabilay ak andi-duaruwan ompatey iray totoon manaayam ed saray aderal-deral a siudad. Kanen na saray ayayep ed katakelan iray manaayam ed saray bario. Ompatey ed salot iray manaamut ed saray kapalandeyan tan diad saray ongib.

²⁸ Pagmaliwen kon begtebegtew tan andi-kakanaan so dalin na Israel tan panganggaen koy inkikinon dan pakayari. Pagmaliwen kon anggapoy onkitakitaw iray kapalandeyan to, pian anggapoy malabay ya ondalan diman.

²⁹ No dusaen ko ray totoo lapud saray kasalanan da tan pagmaliwen kon andi-kakanaan so dalin da, naamtaan dad satan a siak so Katawan.”

Ag Onuren na saray Totoo iray Salita na Propita

³⁰ Say Katawan kuanto, “Sika a toon ompatey, mantotongtong iray totoom na nipaakar ed sika no mantitipon irad abay na saray padir na siudad odino diad saray dalan ya ompogtad kaabungan da. Ikuandad sakey tan sakey, ‘Itila, ta dengelen tayo ray salitan nanlapud Katawan natan.’

³¹ Kanyan saray totook mantitipon iran ondengel na ibagam, balet ag da susumpalen so ibagam a gawaen da. Walad bibil da ray salitan napnoy aro, balet itutuloy day panagagom da.

³² Para sikara anggapoy pidomaan mod saray managpaliket na karaklan diad panamegley na kansion para arowan odino panagtogtog na arpa. Dedengelen da ray amin a sasalitaen mo, balet anggapoy anggan sakey ya oonuren da.

³³ Balet no ontua ray amin a salitam—et talagan ontua ra—naamtaan dad satan a walay sakey a propitan nanayam ed pegley da.”