Ezekiel 31 - Maung A Balita Biblia

Niparad Sakey a Kiew a Sidro so Egipto

¹ Nen ononan agew na kumatlon bulan na kumalabinsakey a taon na inkibantak mid arum a bansa, say Katawan akisalitad siak.

² Inkuanto, “Sika a toon ompatey, ibagam ed ari na Egipto tan diad amin a totoo to: Agaylay biskeg yo! Antoy pangiparaan kod sikayo?

³ Singa kayo sakey a kiew a sidro ed Libano, A marakerakep iray masalumpapak a sanga-sanga to, Sakey a kiew ya atagtagey a nasasabi toy kaloreman.

⁴ Walay danum a mamapabaleg ed sayan kiew, Wala ray sobul ed dalem na dalin a manatagano ed samay kiew. Sinalog da may pasen a tutubuan to may kiew. Tan angipaagos iray danum na kolus ed amin da ray kiew ed takel.

⁵ Lapud asalusalug imay kiew, Binmalbaleg nen saray arum a kiew, Sinmalumpapak tan dinmokey iray sanga to.

⁶ Amin a klasiy manok et nanobung ed saray sanga to; Saray ayayep ed takel et nananaanak irad silong to; Nanayam ed silong to iray bansa na intiron mundo.

⁷ Agaylay dakep to man a kiew— Atagtagey tan andorokey iray sanga to. Asabi na saray lamut to iray managagos a danum ed dalem na dalin.

⁸ Diad tanamanan na Dios et anggapoy sidro a makapipara ed sayan kiew. Anggapoy saleng a makapipara ed kasalumpapak na saray sanga to. Diad dilin tanamanan na Dios anggapoy kiew a makapipara ed inkarakep to.

⁹ Ginawak iman a kiew a marakep, tan masalumpapak iray sanga to. Amin da ray kiew ed Eden a tanamanan na Dios et makakaibeg irad sayan kiew.

¹⁰ “Natan sirin, siak a Katawan a Dios, ibagak ed sika no antoy nagawa ed sayan kiew a binmaleg ya anggad atokdul toy kaloreman. Diad imbaleg to pinmalalo met so panagpaatagey to;

¹¹ kanyan impolisay ko tan inabuloyan ko a naala na sangkailin manoley. Iter tod saman a kiew so kanepegan na inkaoges to.

¹² Saray maruksan sangkaili ibatang da man a kiew tan paolyan da. Natumba ed balang palandey tan balang patar iray sanga to tan saray aluplupak a pokel to. Ontaynan ira may bansan nanaayam ed silong to.

¹³ Ondago ray manok tan onpeket irad samay atumban kiew, tan ontonton ed saray sanga-sanga to iray ayayep ed katakelan.

¹⁴ Kanyan manlapud natan, anggapo la so kiew, anggaman anto lay pakasalog ed sikato, ya ombaleg a singa saman odino makasabid kaloreman so toktok to tan naparaan to man a kabaleg. Amin da asintinsiaan ya ompatey iran singa saray ompatey a totoo, asintinsiaan iran mikasakey ed saray oonla ed pasen a panaayaman da ray inaatey.”

¹⁵ Sikato yay kuan na Katawan a Dios: “No agew a samay kiew onlad pasen a panaayaman da ray inaatey, patabonan kod danum ed dalem na dalin a tanda na panermen. Saraan ko ray ilog tan ag ko paagosen iray kolus. Lapud inatey imay kiew, kobutan ko na bilonget iray Kapalandeyan na Libano tan palenesen kon amin iray kiew ed palandey.

¹⁶ No iyakar kod pasen a panaayaman da ray inaatey, nayegyeg iray bansa lapud biskeg na tanul na kapelag to. Manliket ed kapelag to iray amin a kiew ed Eden tan amin da ray pinili, a maung so inkasalug dan kakiewan ed Libano, a wala la rad pasen a panaayaman da ray inaatey.

¹⁷ Mila rad sikato ed pasen a panaayaman da ray inaatey, pian mikasakey irad saray wadman la. Amin da ra may nanayam ed silong to et nikaykayat irad saray bansa.

¹⁸ “Samay kiew et say Egipto tan amin da ray totoo to. Anggan saray kiew ed Eden ag ira ontalona ed kaatagey tan karakpan to. Balet natan, singa saray kiew ed Eden, onla may kiew ed pasen a panaayaman da ray inaatey tan mikasakey ed saray maoges tan saray inaatey ed bakal. Siak so nansalita,” kuay Katawan a Dios.