Ezekiel 30 - Maung A Balita Biblia

Dusaen na Katawan so Egipto

¹ Say Katawan akisalitad siak lamet.

² Inkuanto, “Sika a toon ompatey, mampropisiya ka tan ibawag mo so ibabagak, siak a Katawan a Dios. Nepeg mon ikulyaot ira yan salita: Onsasabi lay agew a makapataktakot!

³ Asingger la so agew, say agew ya onggalaw so Katawan, Say agew a malorem tan magunigon iray bansa.

⁴ Walay nagawan bakal ed Egipto Tan walay baleg a kaermenan ed Sudan. Amayamay iray napatey ed Egipto; Nasamsam iray kayamanan na bansa Tan nataynan ya aderal-deral.

⁵ “Diad satan a bakal napatey met iray sondalon inuupaan a taga Sudan, Libia, Lidia, Arabia, Kub, tan anggan saray dilin totook.”

⁶ Say Katawan kuanto, “Amin da ray manangyagel na Egipto manlapud Migdol diad baybay ya anggad Aswan diad abalaten et napatey ira ed bakal. Siak a Katawan a Dios so nansalita.

⁷ Say dalin magmaliw a sankabegtewan ed intiron mundo, tan sigput a nataynan ya aderal-deral iray siudad to.

⁸ No poolan koy Egipto tan napatey iray amin a manangyagel to, naamtaan da a siak so Katawan.

⁹ “No asabi la tan ya agew tan aderal la so Egipto, mambapor iray ibakik a manaktakot ed saray ag nagugunigon a totood Sudan, et nataktakot ira lapud kaderal na Egipto. Onsasabi la tan ya agew!”

¹⁰ Say Katawan a Dios kuanto, “Ikanak si Ari Nabucodonosor na Babilonia a mangoput ed saray kayamanan na Egipto.

¹¹ Onsabi so ari tan saray maruksan sondalo to a manderal ed dalin na Egipto. Dogpaan da na ispada so Egipto, et napano na bangkay so dalin.

¹² Paekatan ko so Ilog na Nilo tan paoleyan kod saray maoges a totoo so Egipto. Deralen na saray sangkaili so intiron bansa. Siak a Katawan so nansalita.”

¹³ Say Katawan a Dios kuanto, “Deralen ko ray talintao tan saray tila-tilan diriyos ed Memfis. Anggapo lay manoley ed Egipto, tan taktakoten kon amin iray totoo.

¹⁴ Pagmaliwen kon begtebegtew so abalaten na Egipto tan poolan koy siudad na Zoan diad baybay. Dusaen koy manonan siudad na Tebes.

¹⁵ Ipaliknak so sulit na pasnuk ko ed siudad na Pelusium, say baleg a tirinsira na Egipto. Deralen ko so kayamanan na Tebes.

¹⁶ Poolan ko so Egipto, tan nairapan so Pelusium. Nageba ray padir na Tebes, tan nadelap so siudad.

¹⁷ Ompatey ed bakal iray mamalangwer a lalakin taga siudad na Hiliopolis tan Bubastis, tan saray arum a totoo ed nadakep ira.

¹⁸ Nakobutan na bilonget so Tafnes no ekalan koy pakayari so Egipto tan panganggaen koy biskeg ya ikikinon na saray totoo to. Nakobutan na lorem so Egipto, tan nadakep ya amin iray totoo ed saray siudad to.

¹⁹ No onya so panusak ed Egipto, nakabatan da a siak so Katawan.”

Say Apoter a Pakayari na Ari na Egipto

²⁰ Nen kumapiton agew na ononan bulan na kumalabinsakey a taon na inkibantak mid arum a bansa, say Katawan akisalitad siak.

²¹ Inkuanto, “Sika a toon ompatey, pinoter koy taklay na ari na Egipto. Anggapoy amerber odino angyan na sanlaoy to, pian onabig komun tan ombiskeg lamet a mangegna na ispada.

²² Natan sirin, sikato ya so ibabagak, siak a Katawan a Dios: Siak so kalaban na ari na Egipto. Poteren koy duaran taklay to—samay mabiskeg ni a taklay to tan samay apoter la—et napattak ed satan ed lima to so ispada.

²³ Itaytayak kod intiron mundo iray Egipsio.

²⁴ Insan ko pabiskegen iray taklay na ari na Babilonia tan ipabemben kod sikato so ispadak. Balet poteren ko ray taklay na ari na Egipto, et manayay tan ompatey ed arap da ray kalaban to.

²⁵ On, pakapoyen ko so ari na Egipto tan pabiskegen ko so ari na Babilonia. No iter kod sikato so ispadak tan itoro tod Egipto, naamtaan na balang too a siak so Katawan.

²⁶ Itaytayak kod intiron mundo iray Egipsio. Diad satan naamtaan da a siak so Katawan.”