Ezekiel 29 - Maung A Balita Biblia

Say Propisiya a Sumpad Egipto

¹ Nen kumalabinduan agew na kumaplon bulan na kumaplon taon na inkibantak mi, say Katawan akisalitad siak.

² Inkuanto, “Sika a toon ompatey, mansalita ka sumpad ari na Egipto. Ibagam ed sikato no panon so kadusa to tan say intiron dalin na Egipto.

³ Ibagam a sikato yay ibabaga na Katawan a Dios ed ari na Egipto: Siak so kalaban mo, sika a dragon a buaya a walad ilog. Ibabagam a kayaryan moy Ilog na Nilo, tan sika so nanggawa.

⁴ Tagaan ko so sangim tan papeketen kod sika ray sira ed ilog mo. Insan ta ka isakbit ed pandel na ilog, pati saray amin a siran akapeket ed sika.

⁵ Ibantak ta kad kalawakan, pati saray amin a sira. Nabaldak ed dalin so laman mo tan natilak diman ya ag la nikotkot. Iter ko lan siraen na saray manok tan saray ayayep.

⁶ Diad santan nakabatan na amin da ray Egipsio a siak so Katawan.” Say Katawan kuanto, “Saray Israelita et nanmatalek irad sikayod tulong yon Egipsio, balet singa kayo labat sakey a lopuk a bastun.

⁷ Nen intalimeg day laman dad sikayo, apoter kayo, dineyeng yoy kilikili ra, tan ayesyes so tenten da.

⁸ Natan sirin, siak a Katawan a Dios, ibabagak a mangyakar ak na saray lalakin totoon ondogpad sika a walay awit dan ispada, tan pateyen da ray totoom tan saray ayayep mo.

⁹ Magmaliw ya andi-kakanaan tan begtebegtew so Egipto. Naamtaan mod satan a siak so Katawan. “Lapud imbagam a kayaryan moy Nilo tan sikay nanggawad sayan ilog,

¹⁰ siak so kalaban mo tan say kalaban na Nilom. Pagmaliwen kon andi-kakanaan tan begtebegtew so intiron dalin na Egipto, manlapud siudad na Migdol diad baybay ya anggad siudad na Aswan diad abalaten, a talosen toy anggad ketegan na Sudan.

¹¹ Anggapoy too odino ayep a manakar-akar ed saman a dalin. Apataploy taon ya anggapoy manayam diman.

¹² Pagmaliwen koy Egipto a sankabegtewan a bansa ed intiron mundo. Apataploy taon a mansiansian aderal-deral iray siudad na Egipto, ag miparad arum a siudad so inkaderal da. Gawaen kon pappaiyagel ed arum a bansa iray Egipsio. Ombatik irad nandoroman bansa tan miayam irad saray arum a totoo.”

¹³ Say Katawan a Dios kuanto, “Kalabas na apataploy taon papawilen ko ray Egipsio manlapud saray bansan nikayatan da,

¹⁴ insan ko ra abuloyan a manayam ed abalaten na Egipto, say gendat a panaayaman da. Manayam irad man a sakey a mugmon nanarian,

¹⁵ say sankakapoyan ed amin da ray nanarian, tan ag iran balut la makasakop na arum a bansa. Pagmaliwen ko ran singa anggapon nanarian, pian ag la ra makapanoley ed arum a bansa.

¹⁶ Ag lan balut manmatalek ed tulong na Egipto so Israel. Say nagawad Egipto et mangipanunot ed Israel a baleg a lingo so manmatalek ed saray Egipsio. Naamtaan dad satan a siak so Katawan a Dios.”

Dakepen nen Ari Nabucodonosor so Egipto

¹⁷ Nen ononan agew na ononan bulan na kumaduamplo tan piton taon na inkibantak mi, say Katawan akisalitad siak.

¹⁸ Inkuanto, “Sika a toon ompatey, si Ari Nabucodonosor na Babilonia et dinogpaan toy Tiro. Impanagto to ray sondalo to na ambebelat, kanyan ayangyangan ira tan diad impansakbat da naobakan so takeb da, balet anggapo lamlamang so agunggona na ari tan saramay sondalo to ed saraman ya impansasagput da.

¹⁹ Kanyan saya natan so ibabagak, siak a Katawan a Dios: Iiter koy dalin na Egipto ed Ari Nabucodonosor. Samsaman toy Egipto tan awiten toy amin a kayamanan to tan iter ton bayar na saray sondalo to.

²⁰ Iter koy Egipto a bayar kod sagput to, ta ikikimeyan ak na saray sondalo to. Siak a Katawan a Dios so nansalita.

²¹ “No nagawa la ya, pagmaliwen kon mabiskeg iray totood Israel tan sika, Ezekiel, pansalitaen ta ka a narengel na balang sakey ed sikara, pian naamtaan da a siak so Katawan.”