Ezekiel 27 - Maung A Balita Biblia

Sakey a Kantan para Tolur na Tiro

¹ Say Katawan inkuantod siak,

² “Sika a toon ompatey, kantaan mo na para tolur so Tiro,

³ samay siudad a walad bungangay dayat tan manninigosio ed saray totoon manaayam ed kapag gilig na dayat. Ibagam ed sikato no anto so ibabagak, siak a Katawan a Dios: “Tiro, inkinon mo so nagnap a gangganam.

⁴ Say dayat so abung mo. Saray nanggawad sika ginawa da kan singa marakep a barko.

⁵ Inkana da ray saleng a nanlapud Palandey na Hermon. Say inkana ran palom et sakey a sengeg na sidro a nanlapud Libano.

⁶ Kiew iran robli a nanlapud Basan iray ginawa ran begsay; Saleng a nanlapud Chipre iray inkana ra ed impanggawa rad kuartoy barkom, Inokupan da na garing.

⁷ Linen iray layag mo, Abordaan iran linen a nanlapud Egipto, Mainomay iran nabirbir anggan diad arawi. Sankaabigan ya abel so tarung mo, Ya ambalbalangan abel a nanlapud isla na Chipre.

⁸ Taga siudad na Sidon tan Arvad iray sumasakay mo. Saray marunong a lalakin totoom iray marinirom.

⁹ Saray karpintiro na barko Et saray marunong a lalakin taga Biblos. Saray marinirod balang barkon mambiabiahid dayat Et manninigosio rad saray tindaan mo.

¹⁰ “Taga Persia, Lidia, tan Libia iray sondalom. Insasabit dad kampom iray samper tan saray hilmit da. Sikaray lalakin angiter ed sika na kagalangan.

¹¹ Saray sondalon taga Arvad so nangguardiad saray padir mo, tan saray lalakin taga Gamad so nangguardiad saray torim. Insasabit dad saray padir mo iray samper da. Sikaray lalakin nampagangganad sika.

¹² “Nannigosio ka ed Espanya tan nansempet ka na pilak, balatyang, lata, tan ismay a bayar na saray dakel a lakom.

¹³ Nannigosio ka ed Grecia, Tubal, tan Mesec tan insumbat mo na saray aripen tan saray kagawaan a gansa iray bengatlan lakom.

¹⁴ Say nanlakuan mod saray lakom et insasaliw mo na saray kabayon para kimey, saray kabayon para bakal, tan saray mulon nanlalapud Bet-togarma.

¹⁵ Saray totood Rodes et akinigosio rad sika; saray totood saray dalin a walad gilig na dayat et insusumbat dad saray lakom iray garing tan pasingil na ilipanti ra.

¹⁶ Sinaliw na saray totood Siria iray amayamay a lakom. Imbabayar dad saray kagawaan mo iray ismiralda, saray purpuran abel, saray binordaan ya abel, saray pinon linen, saray baton koral, tan saray baton rubi.

¹⁷ Saray taga Juda tan Israel et imbayar dad saray lakom iray trigo, dilo, larak na oliba, tan saray rikado.

^18-19 Saray taga Damasco et imbayar dad saray lakom tan saray bunga na saray tanaman mo, iray alak a nanlapud Helbon tan say abel a lana a nanlapud Sahar. Insumbat dad saray bengatlan lakom iray kagawaan a balatyang tan saray rikado.

²⁰ Saray taga Dedan et insumbat dad saray bengatlan lakom iray abel a sapin na beneg na kamilyo tan asno.

²¹ Saray taga Arabia tan saray manoley ed dalin na Kedar et imbayar dad saray lakom iray kordiro, karniro, tan kanding.

²² Saray nigosiantin taga Seba tan Raama et insumbat dad saray bengatlan lakom iray alahas, balituk, tan saray sankaabigan a rikado ra.

²³ Akinigosio ed sika iray siudad na Haran, Cannel, Eden, Seba, Assur tan Kilmad.

²⁴ Angilako rad sika na saray mabmablin kawes, saray purpuran abel, saray binobordaan a kawes, saray alpombra a malmaltaw so kolor da, tan saray malet a lobir tan kordon.

²⁵ Nilogan ed saray sankabalgan a barko iray bengatlan lakom. “Aliling mo nen saman so sakey a barko ed dayat A napno na saray ambebelat a karga.

²⁶ Nen saray managbegsay mo et inyakar da kad pegley na dayat, Dineral ka na dagem a nanlapud bokig.

²⁷ Nen aderal ed dayat so barkom, Abalang ya amin ed dayat Iray amin a kayamanan mod bengatlan lakom, Amin da ray marinirom ya ontotoon ed barkom Saray karpintiro na barkom tan saray nigosiantim Tan balang sondalon akalogan ed barko.

²⁸ Makbaw a nadngel ed gilig na dayat So eyag da ray nalelener a marinirom.

²⁹ “Ataynan la ya amin natan so barko Sinmakbit lan amin iray mariniro.

³⁰ Ampait so impanermen da ed sika, Tinupak day dabuk so kaolowan da tan nantitiblak irad dapul.

³¹ Lapud sika kinikiskisan day olo ra Tan nankakawes iray sako. Maninget so pagew da legan dan onaakis.

³² Kinantaan da ka na sayan kanta a para tolur: ‘Siopay mipara ed Tiro ya aderal ed pegley na dayat?

³³ Nen imbiahim ed dayat iray bengatlan lakom, Inter moy nakaukolan dan amin iray bansa. Minmayaman iray arari lapud kayamanan na saray bengatlan lakom.

³⁴ Natan aderal-deral ka ed pegley na dayat; Linmereg kad kaaralman na dayat. Kaibam a naandipat ed dayat Iray bengatlan kayaryan mo tan amin da ray kumikimey mo.’

³⁵ “Nikelawan ed inkagawam so balang toon manaayam ed gilig na dayat. Ataktakot iray anggan arari ra, tan mapatpatnag ed lupa ra so takot da.

³⁶ Naandipat ka ya anggad angga; ataktakot ya amin iray nigosianti ed intiron mundo, natatakot ira ompan nadamay irad makapasinagem a nansumpalan mo.”