Ezekiel 25 - Maung A Balita Biblia

Say Propisiya a Sumpad Ammon

¹ Say Katawan akisalitad siak.

² Inkuanto, “Sika a toon ompatey, mansalita ka sumpad saray totoo ed bansa na Ammon.

³ Ibagam ed sikaran ondengel irad ibabagak, siak a Katawan a Dios: Akaliket kayon akanengneng ed inkadotakan na Timplok, say inkaderal na dalin ya Israel, tan say inkibantak na saray taga Juda.

⁴ Lapud akaliket kayo, abuloyan kon taloen kayo na saray tribu ed nibokig a kalawakan. Ipasen dad bansa yo iray kampo ra tan manayam irad man. Kanen da ray bungay tanaman yo tan inomen da ray kayaryan yon gatas.

⁵ Pagmaliwen kon pastolan na saray asno so siudad na Rabba, tan magmaliw so intiron bansa na Ammon a pastolan na saray karniro, pian naamtaan yo a siak so Katawan.

⁶ “Sikato ya so ibabaga na Katawan a Dios: Nantitipak tan nanlulugtot kayod liket. Binabalaw yoy dalin na Israel.

⁷ Lapud onmay ginawa yo, ipalima ta kayod pakaoley da ray bansa a mangala tan manamsam ed saray kayaryan yo. Sigput ta kayon deralen, pian magmaliw kayon aliwa lan bansa tan ag kayo la nawalaan na dilin bansa a panayaman yo. Diad satan nakabatan yo a siak so Katawan.”

Say Propisiya a Sumpad Moab

⁸ Say Katawan a Dios kuanto, “Lapud imbaga na Moab a say Juda et singa labat saray arum a bansa,

⁹ abuloyan kon saray siudad a mangyaagel na ketegan na Moab et nadogpaan, a pati saray manona a siudad to a Bet-jesimot, Baal-meon, tan Kiryataim.

¹⁰ Abuloyan ko ray tribu ed nibokig a kalawakan a taloen day Moab, a pati say Ammon, pian magmaliw ya aliwa lan bansa so Moab.

¹¹ Dusaen ko so Moab, et naamtaan na saray totoo a siak so Katawan.”

Say Propisiya a Sumpad Edom

¹² Say Katawan a Dios kuanto, “Saray totood Edom et alablabas so imbawi rad Juda tan, lapud sayan imbawi ra, nagmaliw so Edom a makasalanan ya anggad angga.

¹³ Ibabawag ko natan a dusaen koy Edom tan pateyen kod may balang too tan ayep. Pagmaliwen kon dalin ya andi-kakanaan, manlapud siudad na Taman ya anggad siudad na Dedan, tan napatey ed bakal iray totoo.

¹⁴ Ibawian ak na saray totook ya Israelita ed Edom, tan ipalikna rad Edom so sulit na pasnuk ko. Naamtaan na Edom no anto so kipapasen na balesen kon bansa.” Say Katawan a Dios so nansalita.

Say Propisiya a Sumpad Filistia

¹⁵ Say Katawan a Dios kuanto, “Saray Filisteo et alablabas so imbawi rad saray gendat lan kalaban da tan diad gaway pambosul da dineral da ra.

¹⁶ Kanyan ibabawag ko a dogpaan ko ray Filisteo tan paandipaten ko ra. Deralen koy balang too ya atilak a manaayam ed Patar na Filistia.

¹⁷ Mapalaloy panusak ed sikara tan iyoput koy anggaay nayarian kon ombales ed sikara. Nalikna ra so pasnuk ko. Diad satan naamtaan da a siak so Katawan.”