Ezekiel 24 - Maung A Balita Biblia

Say Latiyan a Kaldiro

¹ Nen kumaplon agew na kumaplon bulan na kumasiam a taon na inkibantak mi, say Katawan akisalitad siak.

² Inkuanto, “Sika a toon ompatey, isulat mo yan pitsa, lapud sikato yay agew ya igapo na ari na Babilonia so panlakob tod Jerusalem.

³ Ibagam ed saray mananumpan totook so sayan alimbawa, a siak a Katawan a Dios kuankod sikara: Itoon yo so kaldiro tan pano yo na danum.

⁴ Kargaan yo na saray sankaabigan a tegteg na karni— saray ulpo tan saray sali— kargaan yo met na pinili ran pokel.

⁵ Ikana yo so karni na sankaabigan a karniro; sungloran yo na kiew so akatoon a kaldiro. Palwag yo so danum; ilambung yo so pokel tan say karni.”

⁶ Sikato ya so kuan na Katawan a Dios: “Pakaskasi so siudad a kawalaan da ray totoon managpatey na too! Kapara toy latiyan a kaldiro ya ag balut naorasan. Sansakey a nanaala so tegteg na karni tan anggapoy akeraan a karga to.

⁷ Walay impanpapatey na too ed siudad, balet aliwan diad dalin so akaibungan na dala a komun natabunan na dabuk; dia ingen ed tapew na baton-dampay so akaibungan to.

⁸ Intilak kod saman a pasen so dala a diman ag nasaniban, et diad ontan onsabiy pasnuk kon ombawi.”

⁹ Sikato yay ibabaga na Katawan a Dios: “Pakaskasi so siudad a kawalaan da ray managpatey na totoo! Siak a dili so mangisimbun na kiew ya itutungo.

¹⁰ Mangyakar kayo ni na kiew! Parlangan yo nin maung! Luto yoy karni! Palwag yo lan palwag ya anggad naoput so sabaw! Parlangan yon maung ya anggad napoolan so pokel.

¹¹ Natan igaton yod ngalab so anggapoy kargan kaldiron gansa tan paolyan yon ombalbalanga. Diad satan nalinisan lamet imay kaldiro onung ed ganggan no napagpag la ray lati to lapud petang,

¹² anggaman ya ag naandipat ed apoy so amin a lati to.

¹³ Jerusalem, dinotakan ka na ginagawam ya immoralidad. Anggaman a sinalik a linisan ta ka, nansiansia kan marotak. Ag ka magmaliw a malinis lamet ya anggad naliknam so sulit na pasnuk ko.

¹⁴ Siak a Katawan so nansalita. Sinmabiy oras a siak so onggalaw. Ag ko palabasen iray kasalanan mo odino kasian odino abageyen ta ka. Nadusa ka lapud saray ginagawam.” Say Katawan a Dios so nansalita.

Say Impatey na Asawa na Propita

¹⁵ Say Katawan akisalitad siak.

¹⁶ Inkuanto, “Sika a toon ompatey, diad sakey labat a waswas alaen koy toon inararom. Anggaman onyay nagawa ag ka manririklamo odino onaakis odino onlulua.

¹⁷ Ag mo ikakasil so panngesnges mo. Ag ka ompapaway ya anggapoy turban mo odino kasali-sali a pangipanengneng moy ermen mo. Ag mo sasakbungay lupam; ag ka met mamangan na kakanen da ray maneermen.”

¹⁸ Kabkabwasan, akitongtong ak ed saray totoo. Diad saman a labi inatey so asawak, tan diad ontombuk ya agew ginawak imay nibagad siak.

¹⁹ Tinepet ed siak na saray totoo, “Akin et ontay gagawaen mo?”

²⁰ Kanyan inkuankod sikara, “Akisalitad siak so Katawan tan imbaga tod siak

²¹ a salitaen ko yad sikayon Israelita: Ikikinon yoy biskeg na Timplo. Labalabay yon nengnengen tan laen, balet dotakan na Katawan. Napatey ed bakal iray malangwer nin kabyangay pamilya yon atilak ed Jerusalem.

²² Diad satan gawaen yoy singa ginawak. Ag yo sakbungan so kalupaan yo odino mangan na kakanen da ray maneermen.

²³ Ag kayo ompaway ya anggapoy turban yo odino kasali-sali; ag kayo manermen odino onakis. Onebeng kayo lapud saray kasalanan yo, tan manaakisan kayo.

²⁴ Diad satan magmaliw ak a sakey a tanda ed sikayo: aligen yo ray amin a ginagawak. Imbaga na Katawan a no nagawa ya, naamtaan yo a sikato so Katawan a Dios.”

²⁵ Inkuan na Katawan, “Natan, sika a toon ompatey, dengel moy ibagak. Ekalen kod sikara so Timplo ya ikikinon da tan pakaliliketan da; labalabay dan nengnengen tan laen. Ekalen ko met iray anak dan lalaki tan bibii.

²⁶ Diad agew na panggawak ed saya, walay toon nibatikan toy deral ya onlad sika tan salitaen toy agawa.

²⁷ Diad satan met ya agew, makapansalita ka lamet, tan mitongtong kad sikato. Diad onya magmaliw kan sakey a tanda ed saray totoo, tan nakabatan da a siak so Katawan.”