Ezekiel 23 - Maung A Balita Biblia

Saray Makasalanan a Sanagin Bii

¹ Say Katawan akisalitad siak. Inkuanto,

² “Sika a toon ompatey, nen saman walay sanagin bii.

³ Nen malangwer ni ran manaayam ed Egipto, aderal so inkabirhin da tan nagmaliw iran marotak a bibii.

⁴ Say pangulowan manngaran na Ahola (ilalaman toy Samaria), tan say yogtan manngaran na Aholiba (ilalaman toy Jerusalem.) Inasawak iran dua tan wala ray anak kod sikara.

⁵ Anggaman ya asawak si Ahola, intuloy toy panagbilay ton marotak tan mapalaloy impikaloguran tod saray kainarowan ton taga Asiria.

⁶ Sondalo ran nampaparay kawes dan purpura, pangulo ran totoo tan atagey iran opisyal; guapo ran amin ya opisyal a managkabayo rad para bakal.

⁷ Sikatoy marotak a bii ya akikaloguranan na amin ya opisyal na Asiria, tan lapud kaliktan na laman to adotakan toy sikaton dili diad impangigagalang tod saray talintao na Asiria.

⁸ Intuloy toy inggapo to lan marotak a panagbilay to ed Egipto a dimay inkaderalay inkabirhin to. Nanlapu lad impanmarikit to, akikiakdul ed sikato ray lalaki tan impasen dan sakey a marotak a bii.

⁹ Kanyan impalimak ed saray taga Asiria kainarowan to a mapalaloy panlabay tod sikara.

¹⁰ Nilakseban tan nilabusan da, sinisingkat da ray anak ton lalaki tan bibii, insan da pinatey ed ispada. Amin da ray bibii ed inerman a pasen et tinatalabutob day inkagawa ed sikato.

¹¹ “Anggaman a si agi ton Aholiba et anengneng to yan inkagawa, mapalalo nin magantil tan marotak so panagbilay to nen si atsi ton Ahola.

¹² Mapalalo met so impikaloguran tod saray taga Asiria a pangulo tan opisyal—saray sondalon mankirlap so nampaparan kawes da—tan diad saray opisyal a managkabayo rad para bakal, amin da ray guapon babalolaki.

¹³ Anengneng kon sigput so inkaimmoralidad to, a sikatoy maoges a singa si atsi to.

^14-15 “Linmereg lan linmereg ed inkaimmoralidad to. Naayat ed saray imahin na saray manonan opisyal a taga ra Babilonia, a nikorti rad padir tan apintaan ira na ambalbalanga, abaliberan na marakep ya abel iray awak da tan walay konwarin turban ed kaolowan da.

¹⁶ Kanengneng tod sikara, sinmaboy dala tod panibeg, kanyan wala ray imbaki tod sikarad Babilonia.

¹⁷ Sinmabin akikiakdul ed sikato iray taga Babilonia. Inaakdulan da tan mapalaloy impandodotak dad sikato ya anggad kinabosul to ra.

¹⁸ Impanengneng toy sikaton dili a labus-lakseb, tan impaamta tod karaklan a sikatoy marotak a bii. Akapasnuk ak ed sikato a singa impakapasnuk kod atsi to.

¹⁹ Inkaloor toy inkamarotak ton bii, ginagawa toy singa ginagawa to nen malangwer ni, nen sikatoy marotak a bii diad Egipto.

²⁰ Mapalaloy insaboy dala to ed panibeg tod saray lalakin alabas so pampilalek dad liket na laman, a singa ra manariban asno odino kabayo.” (

²¹ Aholiba, nilabay mon oliten so nankasalanan mon immoralidad nen marikit ka ni diad Egipto, a pinipirit diman na saray lalaki so sosom tan aderal so inkabirhin mo.)

Say Sintinsia na Dios ed Yogtan ya Agin Bii

²² “Natan sirin, Aholiba, sikato yay ibabagak ed sika, siak a Katawan a Dios: Sinmawa ka ed saraman a kainarowan mo, balet papetangen koy olo ra ed sika tan awiten ko ra ya onlakob ed sika.

²³ Iyakar ko ra diay amin a taga Babilonia tan Caldea, saray lalakin taga Pecod, Soa, tan Koa tan amin a taga Asiria. Pantitiponen kon amin iray guapon mamalangwer a lalakin galgalangen tan opisyal, amin da ray manonan opisyal tan atagey a betang ya managkabayo rad para bakal.

²⁴ Manlapud baybay dogpaan da ka a sankaawit da ray amayamay a sondalon akakarwahi na para bakal tan saray arum akalogan irad kariton a pananginay abasto. Diad ilakob dad sika akasamper tan akahilmit ira. Ipalima ta kad sikara tan sintinsiaan da ka onung ed saray ganggan da.

²⁵ Lapud petang na olok ed sika, ipadapok ed sika so sulit na pasnuk da. Ekalan da kay eleng tan layag tan pateyen da ray anak mo. On, alaen dad sika iray anak mon lalaki tan bibii, insan da ra poolan a mabilay.

²⁶ Bingbingkasen day kawes mo tan alaen da ray alahas mo.

²⁷ Patondaen koy pikakaloguran tan say makapabaing a gagawaen mo nanlapu la nen wala ka nid Egipto. Ag mo lan balut linggisen iray talintaoy diriyos odino nunoten so nipaakar ed Egipto.”

²⁸ Sikato yay ibabaga na Katawan a Dios: “Ipalima ta kad saray totoon kabosul tan pakakaingungotan mo.

²⁹ Et lapud kabosul da ka, alaen da ray amin a nansagputan mo tan taynan da kan lakseb-labus a singa marotak a bii. Onyay pansumpalan mo,

³⁰ lapud maoges a kaliktan na laman mo tan lapud panagkaloguran mo. Marotak a bii so pasen mod saray bansa tan dinotakan moy sikan dili lapud saray talintaoy diriyos da.

³¹ Inalig moy agim, kanyan itdan ta kayoy namparan kupa na dusan inomen yo.”

³² Say Katawan a Dios kuanto, “Oninom ka ed kupa nen atsim; baleg tan aralem so kupa to. Balawen tan lureyen ka na balang sakey;

³³ Saman a kupa et pagmaliwen to kan pangaskasiyan tan abuek, saman a kupa a mangiter na takot tan deral, say kupa nen agim a Samaria.

³⁴ Inomen mo tan oputen moy karga to, nasugat so pagew mo diad panamegley na saray misimisi to. Siak a Katawan a Dios so nansalita.”

³⁵ Natan sikato ya so ibabaga na Katawan a Dios: “Lapud nilingwanan tan imbeneg mo ak, manirap ka lapud maoges a kaliktan na laman mo tan say impikaloguran mo.”

Say Sintinsia na Dios ed saramay Sanagi

³⁶ Say Katawan kuantod siak, “Sika a toon ompatey, akaparaan ka lan manintinsia ed kinen Ahola tan si Aholiba? Akusam irad saray makapaingungot a ginagawa ra.

³⁷ Akikaloguran ira tan amatey ira—akikaloguran irad saray talintaoy diriyos tan pinatey da ray anak dad siak. Imbabagat dad saray talintaoy diriyos da iray anak kon lalaki.

³⁸ Et aliwan saraman labat so ginawa ra. Dinotakan day Timplok tan sinumlang day ganggan a nipaakar ed Agew na Panagpainawa ya inletneg ko.

³⁹ Diad samay agew na impamatey dad saramay anak kon imbagat dad saray talintao, linma rad Timplok tan dinotakan da!

⁴⁰ “Angibaki la ran angibaki na saray totoon angimbitan ondago iray totoon taga arawin pasen, et dinmago ra. Nanames ira may sanagi tan ginolisan da ray gilig na mata ra tan nampepeket ira na alahas ed laman da.

⁴¹ Inmirung irad balibalin kotsun, tan diad arap da walay lamisaan a napno na maabig a bengatla, a pati samay insinso tan larak na oliba ya inter kod sikara.

⁴² Sankarengel so tanul na olup na karaklan a magologolo, sakey ya olup na lalakin niyakar a nanlapu rad kalawakan. Insolung dad saray taklay da ra may bibii iray pulsiras tan intoon dad olo ra iray marakep a korona.

⁴³ Insan inkuankod siak a dili a miaakdul irad marotak a biin mapalaloy impikakaloguran to.

⁴⁴ Pinawil-pawil da ra yan bibiin marotak. Pinmawil ira ed kindi Ahola tan Aholiba, saray bibiin mankakasalanay immoralidad.

⁴⁵ Saray matonung a lalaki et sintinsiaan da ra yan bibii a nankasalanan iray panagkaloguran tan panagpatey, lapud akikaloguran ira tan amaterter iray dala.”

⁴⁶ Sikato yay ibabaga na Katawan a Dios: “Mangyakar kayo na sakey ya olup na saray totoon maoges a manaktakot tan manamsam na kayamanan na sarayan bibii.

⁴⁷ Patupak yo rad sarayan totoo, padogpaan yo ra na ispada, papatey yo ray anak da, tan papoolan yo ray kaabungan da.

⁴⁸ Patondaen kod intiron dalin so immoralidad, tan sikatoy sakey a pasakbay ed balang bii ya ag ira mikaloguran, ya ag da aligen so impikaloguran na saramay sanagin bibii.

⁴⁹ Et sikayon ran sanagin bii—dusaen ta kayo lapud inkaimmoralidad yo tan lapud kasalanan yod impangigalang yod saray talintaoy diriyos. Diad satan nakabatan yo a siak so Katawan a Dios.”