Ezekiel 16 - Maung A Balita Biblia

Say Aliwan Matoor a Jerusalem

¹ Say Katawan akisalitad siak lamet.

² “Sika a toon ompatey,” kuanto, “ipaamtam ed Jerusalem iray makapaingungot a ginagawa to.

³ Ibagam ed Jerusalem so ibabagad sikato na Katawan a Dios: “Nianak ka ed dalin na Canaan. Sakey ya Amorreo so amam tan sakey a Heteo so inam.

⁴ Nen nianak ka, anggapoy amoseg ed sika, odino angoras ed sika, odino angosagos ed sika na asin, odino amalkut ed sika na abel.

⁵ Anggapoy anggan sakey ya angasi a nanggawad sika na anggan dinan ed saraya. Nen nianak ka, anggapoy angarod sika. Nibantak ka ed pegley na alog.

⁶ “Nen ondadalan ak anengneng kon pigar-pigar kad dilin dalam. Anggaman ya adala-dalaan so intiron laman mo, inyabuloy kon mambilay ka.

⁷ Pinabaleg ta kan singa malambut a tanaman. Binmaleg kan mabiskeg, atagey tan nagmaliw kan malangwer a marikit. Balibaliy impanpagew mo tan dinmokey so buek mo, balet lakseb-labus ka.

⁸ “Nen ondadalan ak lamet, anengneng kon sinmabi lay panaon na panibeg mo. Kinobutan ko na latup ko so laman mo tan insipan kon aroen ta ka. Akisipanan ak ed sikan asawaen ta ka, et sikay nagmaliw a kien ko.” Sikato yay imbaga na Katawan a Dios.

⁹ “Insan angala ak na danum tan inorasan koy dala ed laman mo. Pinoyukan ko na larak so baog mo.

¹⁰ Sinolungan ta kay nambordan kawes tan initdan ta kay sapatos a balibaliy katat to; initdan ta ka met na linen a bandana tan sidan kolibemben.

¹¹ Sinolungan ta ka na alahas, pulsiras, tan kuintas.

¹² Initdan ta ka na singsing a para eleng tan saray ikaw, ontan met na marakep a koronan itoon ed olom.

¹³ Wala ray alahas mon balituk tan pilak, tan akakawes ka lawas na nambordan linen tan sida. Tinapay a ginawad sankaabigan ya arina so kakanen mo, tan mamangan ka met na dilo tan larak na oliba. Nidoma-domay gangganam, tan nagmaliw kan riyna.

¹⁴ Lapud ayadyarin gangganam, nibantug ka ed amin a bansa, tan nibantug ka lapud siak so amagangganan maung ed sika.” Sikato ya so ibabaga na Katawan a Dios.

¹⁵ “Balet impoonan moy dilin gangganam tan inkabantug mo diad impipiakdul mod balang sakey ya ondalan.

¹⁶ Inkakanam a pamarakep ed saray pasen a panangigalangan mo iray arum a kawes mo tan, singa sakey a marotak a bii, inter moy laman mo ed anggan siopa.

¹⁷ Inaalam iray pilak tan saray balituk ya alahas ya iniiter kod sika, inkanam irad impanggawam na lalakin imahin, insan ka akikaloguran ed sikara.

¹⁸ Inalam imay kawes mon namborda ya inter kod sika, insan mo insolung ed saray imahin, tan insaklang mod saramay imahin ira may larak na oliba tan insinson iniiter kod sika.

¹⁹ Initdan ta ka na kakanen—say sankaabigan ya arina, larak na oliba, tan dilo—balet imbabagat mon pangalam na maung a linawa da ray talintaoy diriyos.” Sikato ya so ibabagay Katawan a Dios.

²⁰ “Insan mo ra inaalay anak mon lalaki tan bibii ya inaanak mo rad siak, insan mo ra imbabagat ed saray talintaoy diriyos. Ag ka ta ni apera ed pagmamaliw mon aliwan matoor ed siak,

²¹ kanyan inaalam iray anak ko tan imbabagat mo rad saray talintaoy diriyos?

²² Diad samay panaon a makapabaing so pambibilay mo a sakey a marotak a bii, ag mon balut anunotan so impanogaw mo—nen lakseb-labus ka a pigar-pigar kad dilin dalam.”

Say Bilay na Jerusalem a Sakey a Marotak a Bii

²³ Inkuan na Katawan a Dios, “Pakaskasi ka! Pangaskasiyay kipapasen mo, Jerusalem! Ginagawam la ra man ya amin a kaogsan, insan

²⁴ diad gilig na amin a dalan nanggagawa ka na saray pasen a panangigalangan ed saray talintaoy diriyos tan piaakdulan mod saray arum a lalaki.

²⁵ Insasagar mod pitek so gangganam. Inter moy sikan dili ed balang toon dinmalan, tan inagew-agew alabas ka ni nen say marotak a bii. Amimpiga-pigam yan ginagawa.

²⁶ Akikiakdul ka met ed saray Egipsio, saray kaabay mon maarod liket na laman, tan lapud impanbibilay mon marotak impanpasnuk mo ak.

²⁷ “Natan, inayag koy ponitik a manusad sika tan ekalen koy apag mo ed bindision ko. Impalima ta ka ed saray Filisteo a mamobosul ed sika tan nanaingungotan irad mabanday a kagagawam.

²⁸ “Lapud ag ka ni apenek ed saray arum, inmasingger ka nin akikiakdul ed saray taga Asiria. Balet siansia nin ag ka apenek ed sikara.

²⁹ Akikiakdul ka met ed saray taga Babilonia a nigosianti, balet siansian ag ka ni apenek ed sikara.”

³⁰ Sikato yay ibabaga na Katawan a Dios: “Ginagawam ira yan amin, ta sakey kan anggapoy kababaingan a marotak a bii.

³¹ Diad amin a dalan nanggagawa ka na saray pasen a panangigalangan ed saray talintaoy diriyos tan piaakdulan mod saray arum a lalaki. Balet aliwan kuartay gagalam a singa biin marotak a nayarin egnaay karaklan.

³² Singa ka sakey a biin akikaloguran ed saray sangkailin lalaki, anta nepeg mo komun ya aroen so asawam.

³³ Say marotak a bii babayaran da, balet sika ririgaloan mo ray kainarowan mo tan papasoksokan mo ra, pian ondago ran manlapud anggan iner a pasen a miakdul ed sika.

³⁴ Nidoma-doma kan marotak a bii. Anggapoy amasoot ed sikan magmaliw a marotak a bii. Ag ka angawat na bayar; binabayaran mo ra ingen! Nidoma kan tua.”

Say Sintinsia na Dios ed Jerusalem

³⁵ Natan sirin, Jerusalem, sikan marotak a bii! Dengel moy ibabaga na Katawan:

³⁶ “Nanlakseb ka tan, singa sakey a marotak a bii, inter moy sikan dili ed saray kainarowan mo tan diad saray amin a makapaingungot a talintaom, tan pinapatey mon imbabagat ed saray talintaoy diriyos iray anak mo.

³⁷ Lapud saya, pantitiponen kon amin iray kainarowan mo nen saman—saramay labalabay mo tan saramay kabosul mo. Paliktub ta ka ed sikara, insan ko ekaley kawes mo tan ipanengneng kod sikaray inkalakseb-labus mo.

³⁸ Dusaen ta ka lapud pikakaloguran mo tan lapud panagpatey moy too, tan diad mapalalon pasnuk ko dusaen ta ka na patey.

³⁹ Paoleyan ta kad sikara, tan temek-temeken da ray pasen ya akikiakdulan mod saray arum tan angigagalangan mod saray talintaoy diriyos. Alaen dad sika ray kawes mo tan saray alahas mo, insan da ka taynan a labus-lakseb.

⁴⁰ “Sogsogan day karaklan a manupak ed sika, tan bingbingkasen da ka ed panamegley na saray ispada ra.

⁴¹ Poolan da ray kaabungan mo tan ipanengneng dad saray amayamay a bibii so kadudusam. Patondaen ta kad pipiakdul mod saray arum a lalaki tan ag ta ka la pangiteren na rigalo ed saray kainarowan mo.

⁴² Diad satan onkepa lay pasnuk ko tan mandeen ak la. Ag ak la mampasnuk odino mangimon.

⁴³ Alingwanan moy impangasikasok ed sika nen ogaw ka ni, tan impanpasnuk mo ak lapud saray amin a ginagawam. Lapud saya siningil ta kad sarayan amin. Akin et inyarum moy marotak ya impipiakdul mod arum ed saray ginagawam a makapaingungot a bengatla?” Say Katawan a Dios so nansalita.

Say Ina Kapara toy Anak ton Bii

⁴⁴ Inkuan na Katawan, “Jerusalem, ikana na saray totoo ira yan probirbio a nipaakar ed sika: ‘Say ina kapara toy anak ton bii.’

⁴⁵ Atawir mon talagay inam. Kinabosul toy asawa to tan saray anak to. Sika tan saray agagim a siudad et walay Heteon ina yo tan Amorreo ya ama yo.

⁴⁶ “Say pangulowan ya agim a bii et say Samaria diad baybay, a pati saray bario to. Say yogtan ya agim a bii et say Sodoma diad abalaten, a pati saray bario to.

⁴⁷ Apenek ka la ed pangaalig mod kabibilay da tan diad saray makapaingungot a gagawaen da? Andi, agano ni maoges ka nen sikara ed amin a gagawaen mo.

⁴⁸ Say Katawan a Dios kuanto, “Andi-duaruwa a siak so mabilay a Dios; ontan met ya andi-duaruwa ya ag balut ginawa na agim a Sodoma tan saray bario to iray ginagawam tan saray bariom.

⁴⁹ Say Sodoma tan saray anak ton bibii et mapasirayew ira lapud daakan so tagano ra nen saman tan nambibilay iran mareen, balet ag da inaasikaso iray mairap-bilay tan saray walad pankaukolan.

⁵⁰ Onung na kabkabat mo, dineral ko ra lapud mapaatagey ira, anawet so olo ra tan ginagawa ray ag ko labay.

⁵¹ “Ag akapalduad kasalanan mo so kasalanan na Samaria. Makapaingungot ni ray ginagawam nen say sikato. Singa anggapoy kasalanan da ray agagim no ipara so kaogsan mo ed kaogsan da.

⁵² Natan nepeg mon itepel so inkaplag mod kababaingan a bunga na kaogsan mo. Lapud mapalalo ray kasalanan mo nen saray agagim, ompapaway a singa anggapoy kasalanan da ra yan agagim a kaampar mo. Natan baing ka tan itepel moy kababaingan mo, lapud ipaparontal mon singa anggapoy kasalanan da ray agagim.”

Napasimbalon Ipaalagey iray Sodoma tan Samaria

⁵³ Say Katawan kuantod Jerusalem, “Paaligwasen ko lamet so Sodoma tan saray bario to, say Samaria tan saray bario to. On, paaligwasen ta ka met.

⁵⁴ Ombaing ka tan say kababaingan mo et mangipanengneng a maung niy kipapasen da nen say sika.

⁵⁵ Onaligwas ira lamet; ontan met, onaligwas ka lamet tan saray bariom.

⁵⁶ Ag mo ta nilelemlemew so Sodoma nen panaon na panagpaatagey mo,

⁵⁷ tan kasakbayan na inkiparontal na kaogsan mo? Natan nagmaliw kan singa sikato—sikay lelemlemewen na saray Edomita, saray Filisteo, tan saray arum a kakaabay mon mamobusol ed sika.

⁵⁸ Nepeg moy manirap lapud saray mabambanday tan makapabaing a ginagawam.” Say Katawan so nansalita.

Say Magnayon a Sipanan

⁵⁹ Say Katawan a Dios kuanto, “Gawaen kod sika so kapetekan na saray ginagawam, ta ag mo sinumpal iray sipan mo tan dineral moy sipanan.

⁶⁰ Balet ag ko lingwanan imay impisipanan kod sika nen ogaw ka ni, tan migawaan ak ed sika na sipanan a magnayon.

⁶¹ Nanunotan mo ray ginagawam, tan ombaing ka no napapawil mod sika so pangulowan tan yogtan ya agim a bibii. Pagmaliwen ko ran singa anak mon bibii, anggaman ya aliwan kabyangan ya na impansipanan ta.

⁶² Pasimbaloen koy impisipanan kod sika, et naamtaan mo a siak so Katawan.

⁶³ Pirdonaen kon amin iray gawam a maoges, balet nanunotan mo ra tan diad mapalalon kababaingan mo ag mo nabiswat so sangim.” Say Katawan a Dios ta so nansalita.