Ezekiel 14 - Maung A Balita Biblia

Sinumpa na Dios so Panangigalang ed Talintaoy Diriyos

¹ Pigaran pangulo da ray Israelita so dinmagon angipanon ed siak na nipaakar ed linawa na Katawan.

² Insan say Katawan akisalitad siak.

³ “Sika a toon ompatey,” kuanto, “inter na sarayan totoo so puso ra ed saray talintaoy diriyos tan aabuloyan dan iwanwan irad kasalanan na saray talintao. Abaloan da sirin ya ebatan ko ra?

⁴ “Natan misalita kad sikara tan ibagam so ibabagak ed sikara, siak a Katawan a Dios: Balang Israelita ya inter toy puso tod saray talintaoy diriyos tan aabuloyan to ran iwanwan dad kasalanan, insan onlan mangipanon ed sakey a propita, makaawat na ebat a manlapud siak—ebat a kanepegan na saray amayamay a talintao to!

⁵ Lapud saratan a talintao imbeneg ak na saray Israelita, balet ompawil komun so inkatoor dad siak diad panamegley na ebat ko.

⁶ “Natan sirin, ibagam ed saray Israelita so ibabagak, siak a Katawan a Dios: Magbabawi kayo tan taynan yo la ray makapaingungot a talintaoy diriyos.

⁷ “Kapag sakey ed saray Israelita odino sakey ed saray sangkailin manaayam ed panaayaman da ray Israelita et ibeneg to ak tan mangigalang ed saray talintaoy diriyos, insan onlan mangipanon ed sakey a propita, sikatoy ebatan ko, siak a Katawan!

⁸ Sikatoy sumlangen ko. Gawaen kon panmadmaran na karaklan. Ekalen kod poluk da ray totook, pian naamtaan yo a siak so Katawan.

⁹ “No apalikdo so sakey a propita diad pangiter toy tilan ebat, siak a Katawan so amalikdod sikato. Sikatoy ekalen kon kabyangan na saray totood Israel.

¹⁰ Namparay dusan niiter ed propita tan say angipanon ed sikato.

¹¹ Gawaen ko ya, pian ontonda a mangikaindan ed siak iray Israelita tan tondaan day pandotak dad sikaran dili lapud saray kasalanan da. Sikara so nepeg a totook, tan siak so nepeg a Dios da.” Say Katawan a Dios so nansalita.

Di Noe, Danel, tan Job

¹² Akisalitad siak so Katawan,

¹³ “Sika a toon ompatey,” kuanto, “no mankasalanan so sakey a bansa tan magmaliw ya aliwan matoor ed siak, dusaen ko tan deralen koy panlalapwan na tagano na saray totoo to. Mangipadalan ak na eras ed satan a bansa tan pateyen ko ray totoo tan saray ayayep to.

¹⁴ Anggaman a manaayam bilang irad man di Noe, Danel, tan Job, say kamaungan da ilaban to labat so bilay dan talo.” Say Katawan a Dios so nansalita.

¹⁵ “Nayarin mangibaki ak na saray ayayep ed katakelan a mamatey ed saray totoo, tan pagmaliwen dan maatap so dalin, kanyan anggapoy manakar-akar a too;

¹⁶ et anggan bilang manaayam diman ira may taloran lalaki—legan a siak so mabilay a Katawan a Dios—anggapoy duaruwa ya ag da niagel iray dilin anak da. Say bilay dan talo labat so nilaban da, tan magmaliw a kalawakan so bansa.

¹⁷ “Nayarin mangipadalan ak na bakal ed saman a bansa tan mangibaki ak na saray armas a mamaandid saray totoo tan saray ayayep to;

¹⁸ et anggan bilang manaayam diman ira may taloran lalaki—legan a siak so mabilay a Katawan a Dios—anggapoy duaruwa ya ag da niagel iray anggan dilin anak da. Say bilay dan talo labat so nilaban da.

¹⁹ “No mangipadalan ak na salot ed saman a bansa tan diad pasnuk ko mamatey ak na amayamay a totoo tan ayayep,

²⁰ et manaayam irad man bilang di Noe, Danel, tan Job—legan a siak so mabilay a Katawan a Dios—anggapoy duaruwa ya ag da niagel iray dilin anak da. Say bilay dan talo labat so nilaban na kamaungan da.”

²¹ Sikato ya so ibabaga na Katawan a Dios: “Mangipadalan ak na mapalalon dusa ed Jerusalem—bakal, eras, ayayep ed katakelan, tan salot—a maneral ed saray totoo tan saray ayayep.

²² No walay akapaliis ed patey tan nilaban to ray anak to, imanom ira no onla rad sika. Nengneng mo so ontan lan kaogsan da, pian ag ira manduaruwa a manepenepeg so pangiiter koy dusa ed Jerusalem;

²³ naamtaan mod satan a walay maung a makasengeg na panggagawak ed antokaman.” Say Katawan a Dios so nansalita.