Ezekiel 1 - Maung A Balita Biblia

SAY ONONAN PASINGAYEW NA DIOS ED KINEN EZEKIEL ( 1:1–7:27 ) Say Trono na Dios

¹ Siak, si Ezekiel a pari a lakin anak nen Buzi, et kaibak iray kaparak a Judion nibantak ed Babilonia. Diad kumaliman agew na kumapat a bulan na kumatalomplon taon na panaayam mi ed gilig na Ilog na Kebar, linmokas so tawen, et akanengneng ak na pasingayew a nanlapud Dios. (

² Kumalima lad saman a taon manlapu lad inkibantak nen Ari Joakin ed arum a bansa.)

³ Diman ed Babilonia diad gilig na Ilog na Kebar, nadngel koy Katawan ya akisalitad siak, tan aliknak so pakayari to.

⁴ Tinmangay ak, et anengneng koy alimbusabos a manlalapud baybay. Ompapaway a manlalapud makapal a lorem so kirmat, tan maliwliwaway tawen ed kaliber-liber to may lorem. Diad kawalaan to may kirmat, walay mankidyam a singa gansa.

⁵ Diad pegley to may alimbusabos anengneng koy singa apatiran mabilay a pinalsa a say nengneng da et too.

⁶ Apatiray lupa so balang sakey ed sikara tan saneepat iray payak.

⁷ Maptek so bikking tan ulpo ra, tan singa saray kokoy bakan kalakyan so koko ra. Mankidyam iran singa gansa.

⁸ Balang sakey ed sikara ed walaan met na apatiran limay too, tan say kapag sakey a lima et walad silong na kapag payak da.

⁹ Akaonat so duaran payak na balang sakey ed sikara, kanyan kuadradoy porma ra tan nandidiwitan so ngoro na saray payak da. No onggalaw ira mambabansag ira tan ag da la nepeg ya ipeyes so laman da.

¹⁰ Balang sakey ed saramay pinalsan mabilay et walay apatiran nandoroman lupa to; lupay too ed arap, lupay lion ed kawanan, lupay bakan kalakyan ed kawigi, tan lupay agila ed beneg.

¹¹ Akaonat ya akatagey so sankaparis a payak na balang sakey ed samay mabilay a pinalsa tan nandidiwitan so ngoroy payak na sanaabay. Saraman balet so duaran payak na balang sakey ed sikara et akasakbung ed kalamanan da.

¹² Akaarap so balang sakey ed sikara ed balang dapag, kanyan makakar ira ed labay da ya ag la ra ompigar.

¹³ Diad kawalaan da ra may mabilay a pinalsa, walay bengatlan singa manliub ya apoy a nipotan, tan ag makareen. Marmarlang so apoy to tan mampaway diman so kirmat.

¹⁴ Mampawil-pawil ira may mabilay a pinalsa tan singa peles na kirmat so peles da.

¹⁵ Nen nengnengnengen ko ra may apatiran pinalsa, anengneng koy apatiran dalig ya akasagar irad dalin tan balang sakey a dalig akaabay ed balang sakey ed saramay pinalsa.

¹⁶ Nampapara ira may dalig; mankidyam a singa mabmablin bato so balang sakey ed sikara, tan balang dalig walay akasolung a dalig ya akaarap ed sananey a dapag.

¹⁷ Kanyan saramay dalig nayarin ontelek ed anggan dinan ed saray apatiran dapag.

¹⁸ Akobutan na mata so rim na balang sakey ed saramay dalig.

¹⁹ Kapag onggalaw ira may pinalsa, onggalaw met a kaiba ra ira may dalig, tan no ontagey a manlapud mundo ira may pinalsa, ontagey met ira may dalig.

²⁰ Linmad labay dan laen ira may pinalsa, tan milmila ed sikara ira may dalig, lapud ooleyan na saramay pinalsa ira may dalig.

²¹ Kanyan kapag ginmalaw, tinmonda, o inmatagey ira may pinalsa, ontan to met so ginawa na saramay dalig.

²² Walay bengatlan singa tambubong a mankidyam a kristal ed tagey na olo na saramay pinalsa.

²³ Manalalagey ira may pinalsa ed silong na samay tambubong; akaonat ed saray kaabay to so duaran payak na balang sakey ed sikara tan akasakbung ed laman to iray duara nin payak to.

²⁴ Nen tinmikyab ira nadngel koy banesbes na saray payak da; singa ungol na dayat imay banesbes, singa tanul na amayamay a sondalo, singa bosis na Makapanyarin-amin a Dios. Nen tinmonda ra, kinopit da ra may payak da,

²⁵ balet wala nin siansiay tanul a nanlapud tagey na tambubong a walad tagey na olo ra.

²⁶ Diad tagey na tambubong walay bengatlan singa tronon sapiro, tan manyodyorung diman ed trono so singa too.

²⁷ Samay singa too et singa mankidyam a gansan walad pegley na apoy. Niliwawaan to na masnag so intiron kaliber-liber to,

²⁸ tan walad sikatoy amin a kolor na bunlalakaw. Sikato yay mankidyam a liwawan mangipapanengneng na kiwawala na Katawan.