Exodo 38 - Maung A Balita Biblia

Say Impanggawad Altar a Panagpoolay Bagat

¹ Nanggawa na altar ya akasia a panagpoolan na saray bagat. Kuadrado yan altar; duara tan kapalduan mitro so karokey to, tan duara tan kapalduan mitro so kaawang to tan sakey tan kapalduan mitro so kaatagey to.

² Nanggawa na saray pinagkasaklur ed toktok na apatiran suyok, tan akatekep ira ed samay altar. Inokupan to ra na gansa.

³ Nanggawa met na saray amin a kagawaan na altar: saray palangganan pananginay dapul, saray karyo, saray yaung, saray tinidor, tan saray palangganan pananginay ngalab. Gansa ra yan amin a kagawaan.

⁴ Nanggawa na gansan parilya tan inlira tod silong na pinagkakuadro na altar, et asabi to so kapaldua na altar.

⁵ Nanggawa na apatiran liken tan impeket to rad apatiran suyok.

⁶ Nanggawa na saray tiken ya akasia a panagsakbatan, inokupan to ra na gansa,

⁷ tan insolung to rad saray liken, sakey ed kapag diking na altar. Tabla so inkana ed impanggawad samay altar, tan longugan.

Say Impanggawad Gansan Talyasi

⁸ Nanggawa na gansan talyasi a panagorasan tan say gansan ansagan to. Say inkana tod impanggawad saraya et saray gansan ispiho na saray bibiin nanlilingkur ed lolooban na Tuldan Ayamay Katawan.

Say Pinagkaalar na Tuldan Ayamay Katawan

⁹ Saray pinon linen a kurtina so ginawa ton pinagkaalar na Tuldan Ayamay Katawan. Diad dapag ya abalaten say karokey na kurtina et limamplon yarda,

¹⁰ nisabit ira ed duamplon gansan lusek a nipatoon ed duamplon dapan a gansa, tan wala ray pilak a panagkawit tan sangal to.

¹¹ Onya met so ginawa ton pinagkaalar ed bandad baybay.

¹² Diad dapag a sagur say karokey na saray kurtina et duamplo tan liman yarda; wala ray samploran lusek, samploran dapan, saray pilak a panagkawit, tan saray sangal da.

¹³ Diad dapag a bokig a kawalaay lolooban say benlag na pinagkaalar to et duamplo tan liman yarda.

^14-15 Diad kapag diking na lolooban say benlag na pinagkaalar et pitora tan kapalduan yarda; wala ray taloran lusek tan taloran dapan.

¹⁶ Pinon linen iray amin a kurtina na pinagkaalar.

¹⁷ Gansa ray dapan na saray lusek; pilak iray panagkawit, saray sangal, tan say okup na toktok na balang lusek. Amin da ray lusek na pinagkaalar et atoop ira na saray sangal a pilak.

¹⁸ Say kurtina na lolooban na Tulda et pinon linen; asul, purpura, tan ambalanga so tinebey to tan abordaan. Samploran yarda so benlag to tan duara tan kapalduan yarda so ondoy to, a singa saray kurtina na pinagkaalar.

¹⁹ Nibitin ya ed apatiran lusek a gansa ya apatira so dapan da. Pilak iray panagkawit da, saray okup na toktok da, tan saray sangal da.

²⁰ Gansa ray amin a palpal na Tulda tan amin a palpal na pinagkaalar.

Saray Mital a Nikana ed Tuldan Ayamay Katawan

²¹ Saya so listaan na belat na saray mital ya inkana ed Tuldan Ayamay Katawan, a kawalaan na duaran tapyak a bato ya akaitatakan na Samploran Ganggan. Si Moises so angiganggan a gawaen yan listaan tan ginawa na saray Levita a mankikimey diad panangiwanwan nen Itamar a lakin anak nen Aaron a pari.

²² Si Bezalel a lakin anak nen Uri tan apo nen Hur a kabyangay boleg nen Juda so nanggawa na amin ya ingganggan na Katawan ed kinen Moises.

²³ Say katulongan to a si Oholiab a lakin anak nen Ahisamac tan kabyangan na boleg nen Dan et marunong a managtatak na arti, managgolis na arti, tan managinaramey na pinon linen tan asul, purpura, tan ambalangan lana.

²⁴ Amin a balituk a nisaklang ed Katawan ya inkana rad impamaalagey na Tulda et mambelat na siam a lasus tan siamaplo tan anem a kilo, onung na panagsimbang ed santuario.

²⁵ Say pilak ya inter na totoo nen binilang ira et mambelat na talon libo, apat a lasus tan talomplon kilo, onung na panagsimbang ed santuario.

²⁶ Sayan belat et katiponan na amin ya imbayar na amin a totoon binilang; balang sakey a too nambayar na nakaukolan a bayar onung na panagsimbang ed santuario. Say karakel na lakin mantaon na duamplo a mampaatagey a sikaray binilang et anem a lasus tan talon libo liman lasus tan limamplo.

²⁷ Talon libo, apat a lasus tan siamiran kilo so pilak a nikana ed impanggawa na sanlasus a dapan na Tuldan Ayamay Katawan tan say kurtina, talomplo tan apat a kilo so kapag dapan.

²⁸ Say akeraan a duamplo tan talon kilon pilak si Bezalel ginawa to ran sangal, saray panagkawit na saray lusek, tan say okup na toktok na balang lusek.

²⁹ Say belat na amin a gansan nisaklang ed Katawan et duan libo, apat a lasus tan labinapat a kilo.

³⁰ Inkana to ya ed impanggawa to na saray dapan na lolooban na Tulda, say gansan altar a pati gansan parilya to, amin a kagawaan na altar,

³¹ saray dapan na pinagkaalar tan say lolooban to, tan amin a palpal na Tulda tan say pinagkaalar.