Exodo 33 - Maung A Balita Biblia

Say Katawan Ingganggan to ray Israelita a Taynan day Palandey na Sinai

¹ Say Katawan kuantod kinen Moises, “Taynan yo yan pasen, sika tan saray totoo ya impaway mod Egipto, ta laka yod dalin a sinambaan kon iter ed kinen Abraham, Isaac, tan Jacob tan diad saray kabyangay boleg da.

² Ibakik a mangiwanwan ed sikayo so sakey ya anghil, tan pagiten ko ray Cananeo, saray Amorreo, saray Heteo, saray Pereseo, saray Heveo, tan saray Jebuseo.

³ Sikayoy onla ed sakey a mayaman tan mataban dalin. Balet aliwan siak a dili so mila ed sikayo lapud anawet so olo yon totoo, ompan naderal ta kayo ed dalan.”

⁴ Nen nadngel ya na saray totoo, ginapwan day nanermen tan ag la ran balut nanalahas.

⁵ Say Katawan kuantod sikara diad panamegley nen Moises, “Anawet so olo yon totoo. No siak so milad sikayo anggan maganon bekta labat, deralen ta kayon sigput. Okpus yo natan iray alahas yo, insan ko nunoten no antoy gawaen kod sikayo.”

⁶ Kanyan nen tinaynan na saray Israelita so Palandey na Sinai, ag la ra nankanay alahas.

Say Tuldan Ayamay Katawan

⁷ Kapag ilira na saray Israelita so kampo, si Moises alaen to may masanton Tulda tan ipaalagey to ed paway na kampo diad arawdawiy daiset. Tinawag to na Tuldan Ayamay Katawan, tan siopamay toon labay toy mangipanon ed Katawan, ompaway ya onlad Tulda.

⁸ Kapag si Moises et ompaway ya onlad man ed Tulda, saray totoo manalagey ira ed lolooban na katuldaan da tan bantagen day Moises ya anggad ag to iloob ed Tulda.

⁹ No akaloob lay Moises ed Tulda, onleksab imay lusek a lorem, tan manayam ed lolooban na Tulda, insan say Katawan mitongtong ed kinen Moises manlapud samay lorem.

¹⁰ No anengneng la na saray totoo so lusek a lorem dimad lolooban na samay Tulda, ondakmomo ran mangigalang ed Katawan.

¹¹ Say Katawan misalita sirin a lupa-lupaan ed kinen Moises, a singa pisalita na sakey a too ed kaaro to. Insan si Moises ompawil ed kampo. Balet say katulong ton tobun-balon laki a si Josue ya anak nen Nun et manayam ed dalem na Tulda.

Say Katawan Insipan to ya Ibaan to ray Totoo To

¹² Si Moises kuantod Katawan, “Tua ya imbagam ed siak ya ipangulok iray totoo ya onlad saman a dalin, balet ag mo imbagad siak no siopay ibakim a mangibad siak. Imbagam a kabat mo ak tan makaliliket kad siak.

¹³ No talagan makaliliket kad siak, ibagam pad siak so linawam, pian nalingkuran ta ka tan nituloy koy pamaliket kod sika. Ag mo pa met lilingwanan a pinilim yan bansa a kayaryan mo.”

¹⁴ Say Katawan kuanto, “Mila ak ed sikayo, tan panaloen ta kayo.”

¹⁵ Inmebat si Moises, “No ag ka milad sikami, ag mo kami patataynanen ed sayan pasen.

¹⁶ Panoy pakaamta na siopaman a makaliliket kad saray totoom tan diad siak, no ag ka milad sikami? Say kiwawalam ed sikami et mangipanengneng a doma kami ed saray arum a totoo diad tapew na dalin.”

¹⁷ Say Katawan kuantod kinen Moises, “Gawaen koy kerew mo, lapud kabkabat ta ka tan makaliliket ak ed sika.”

¹⁸ Insan kinerew nen Moises, “Pikasik pan ipanengneng mod siak so kagalangan mo.”

¹⁹ Inmebat so Katawan, “Ipadalan kod arap mo so amin a kaabigan ko tan ibawag koy ngaran ko a Yahweh. Aroen tan kasian ko ray pilien ko.

²⁰ Ag ko ipanengneng ed sikay lupak, ta anggapoy toon mambilay a makanengneng na lupak,

²¹ balet niay pasen ed abay ko a kawalaay sakey a baton baleg a pakapanalageyan mo.

²² No onlabas so kagalangan ko, iyan ta ka ed letak na bato tan sakuban ta ka na limak legan kon ondadalan.

²³ Insan ko ekalen so limak et beneg ko lad satay nanengneng mo, aliwan say lupak.”