Exodo 32 - Maung A Balita Biblia

Say Kalakyan a Baka a Balituk

¹ Nen anengneng na saray totoo ya ag ni inmakseb si Moises no ag ingen abaybayag lan wadmad tagey na palandey, kinumpog day Aaron tan kuandad sikato, “Ag tayo amta no antoy agawad saman a toon Moises ya angipaway ed sikatayod Egipto, kanyan igawaan mo kami na sakey a dios a mangiwanwan ed sikatayo.”

² Kanyan kuanen Aaron ed sikara, “Ekal yo ray balituk ya ikaw na kaasawaan yo, ikaw na saray anak yon lalaki tan bibii, ta iyakar yo ra diad siak.”

³ Kanyan amin da ray totoo ineekal da ray ikaw dan balituk tan inyakar da rad kinen Aaron.

⁴ Inala to ra nen Aaron, tinonaw to ra, inkalbo tod moldora, tan ginawa ton balituk a bakan kalakyan. Saray totoo kuanda, “Israel, sikato ya so dios tayo ya angipaway ed sikatayod Egipto.”

⁵ Insan si Aaron nanggawa na altar ed arap na samay balituk a bakan kalakyan tan imbawag to, “Nabwas walay pista a pamagalang ed Katawan.”

⁶ Diad kabkabwasan angyakar ira na pigaran ayep ya isaklang dan bagat a popoolan tan bagat a para kareenan. Nandorongon nampista iray totoo, tan say pista et agawa ya inoman tan liketan na laman.

⁷ Say Katawan kuantod kinen Moises, “Ganatan moy onakseb, ta saray totoom ya impaway mod Egipto et nankasalanan ira tan impolisay da ak.

⁸ Sinmian la rad dalan ya ingganggan kon tombuken da; nanggawa ray inmoldoran balituk a bakan kalakyan, igagalang da tan pangibabagatan da. Ibabaga ra a sikatoy dios da ya angipaway ed sikara manlapud Egipto.

⁹ Amtak so inkaawet na olo da ra yan totoo.

¹⁰ Natan, ag mo ak babanoen. Ampetang so olok ed sikara, kanyan deralen ko ra. Insan pagmaliwen ta ka, tan saray kabyangay boleg mo, a sakey a bansan matalonggaring.”

¹¹ Balet si Moises akikasi ed Katawan a Dios to tan kuanto, “Katawan, akin et mapalaloy pasnuk mod saray totoom ya impaway mod Egipto diad panamegley na baleg a pakayarim tan biskeg mo?

¹² Akin et abuloyan mon saray Egipsio et nayarian dan ibaga ya impaway mod Egipto iray totoom, ta getmam a pateyen ira ed kapalandeyan tan deralen iran sigput? Ag ka la kari mamapasnuk; mangoman ka lay kanunotan tan ag mo la komun ipapadalan so deral ed saray totoom.

¹³ Nunot mo pa ra di aripen mon Abraham, Isaac, tan Jacob. Nunot mo pa a sinambaan mo ya itdan iray amayamay a kabyangay boleg a singa karakel na bibitewen ed tawen, tan iter mod saray kabyangay boleg da so intiron dalin ya insipan mon kayaryanen da ed ando lan ando.”

¹⁴ Lapud saya say Katawan angoman na kanunotan tan ag to la impadalan ed saray totoo to so deral a ginetma to lan gawaen.

¹⁵ Inmakseb ed alusadsar na palandey si Moises tan sankaawit to ra may duaran tapyak a baton nantopag ya akaitatakan na saray ganggan.

¹⁶ Say Dios a dili so nanggawa ed saramay tapyak a bato tan intatak tod saraya iray ganggan.

¹⁷ Nadngel nen Josue a maneeyag iray totoo tan kuantod kinen Moises, “Narerengel koy eyag na bakal ed kampo.”

¹⁸ Si Moises kuanto, “Aliwan eyag na impanalo so narerengel ko, odino akis na inkatalo; sakey a tanul na panagkanta.”

¹⁹ Nen asingger lay Moises ed kampo tan nabantag to la may bakan kalakyan tan saray totoon mansasayaw-sayaw, mapalaloy impakapasnuk to. Dimad alusadsar na palandey imbantak to ra may awit ton tapyak a bato, et apisagpisag ira.

²⁰ Inala to may bakan ginawa ra, tinonaw to, tinemek ton singa pulbo, inlauk tod danum, insan to impainom ed saray Israelita.

²¹ Inkuantod kinen Aaron, “Antoy ginawa na sarayan totoo ed sika, et impanggawam ira na ontan lan belat na kasalanan?”

²² Inmebat si Aaron, “Ag ka kari mamapasnuk ed siak; amtam a sipaparaan la ran manggaway kaogsan.

²³ Inkuandad siak, ‘Ag tayo amta no antoy agawad saman a toon Moises ya angipaway ed sikatayod Egipto, kanyan igawaan mo kami na dios a mangiwanwan ed sikatayo.’

²⁴ Kinerew kod sikaran iyakar dad siak iray balituk ya alahas da, et amin da ray walay alahas ineekal da tan inter da rad siak. Imbuntok kod apoy ira may alahas da, et bakan kalakyan so pinawayan to.”

²⁵ Si Moises anengneng ton si Aaron et pinaolyan ton ag la nabano iray totoo tan ginawa ray sikaran dili a makulangkulang ed arap na saray kalaban da.

²⁶ Kanyan nanalagey ed puirta na kampo tan ineyag to, “Amin yon kagampi na Katawan, dago kayo dia!” Kanyan amin da ray Levita nantitipon irad kawalaan to,

²⁷ tan kuantod sikara, “Say Katawan a Dios na Israel igaganggan to kayon amin ya isalokbit yoy ispada yo tan manliber kayod kampo manlapud sayan puirta ya anggad sananey, tan patey yo ray agagi yo, saray kakaaro yo, tan saray kakaabay yo.”

²⁸ Saramay Levita inmonur ira, kanyan pinapatey day sakey a talon libon lalaki ed saman ya agew.

²⁹ Si Moises kuantod saray Levita, “Natad sayan agew insaklang yoy sikayon dili a manlingkur a papari ed Katawan diad impamatey yod saray lalakin anak tan agagi yo, kanyan say Katawan binindisionan to kayo ed sayan agew.”

³⁰ Diad ontombuk ya agew si Moises kuantod saray katoowan, “Ambelat a tuloy so kasalanan a ginawa yo. Balet onkalab ak lamet ed palandey ta laen koy Katawan; angangko nagamuran koy pakapirdona na kasalanan yo.”

³¹ Si Moises pinmawil sirin ed Katawan tan kuanto, “Ambelat a tuloy so kasalanan a ginawa na saraman a totoo. Nanggawa ray dios a balituk tan inggalang da.

³² Pirdonam pa ray kasalanan da; balet no ag mo ra pirdonaen, boral mo lay ngaran ko ed libro ya angisulatan mod kangaranan na saray totoom.”

³³ Say Katawan inmebat, “Say kangaranan na saramay nankasalanan ed siak so boralen kod librok.

³⁴ Laka la, ta ipangulom iray totoo ya onla ed pasen ya imbagak a laen yo. Say anghil ko so mangiwanwan ed sikayo, balet onsabiy oras a dusaen ko ra man a totoo lapud kasalanan da.”

³⁵ Kanyan say Katawan angipadalan na salot ed saray totoo, lapud impanggawa ray Aaron na balituk a bakan kalakyan.