Exodo 27 - Maung A Balita Biblia

Say Altar

¹ Manggawa ka na altar ya akasia. Nepeg a kuadrado; duara tan kapalduan mitro so karokey to tan duara tan kapalduan mitro so kaawang to, tan sakey tan kapalduan mitro so kaatagey to.

² Manggawa ka na saray pinagkasaklur ed toktok na apatiran suyok to. Mitekep ira ed altar tan naokupan na gansa.

³ Manggawa ka na saray palangganan pananginay dapul, tan manggawa ka na saray karyo, saray yaung, saray tinidor, tan saray palangganan pananginay ngalab. Gansa ra yan amin a kagawaan.

⁴ Manggawa ka na gansan parilya tan peketan mo na apatiran gansan liken iray suyok to.

⁵ Iliram ed silong na pinagkakuadro na altar so parilya, pian nasabi to so kapaldua na altar.

⁶ Manggawa ka na saray akasian tiken a panagsakbatan, okupan mo ra na gansa,

⁷ tan no sakbaten so altar, isolung mod saray liken a nipeket ed saray diking to.

⁸ Saray tabla so ikanam ed panggawam ed altar, tan gawam a longugan, onung na planon impanengneng kod sika diad tagey na palandey.

Say Pinagkaalar na Tuldan Ayamay Katawan

⁹ “Say Tuldan Ayaman na Katawan et igawaan mo na saray pinon linen a kurtina a pinagkaalar to. Diad dapag ya abalaten say karokey na kurtina et limamplon yarda,

¹⁰ isabit ira ed duamplon gansan lusek a nipatoon ed duamplon dapan a gansa, tan wala ray pilak a panagkawit tan sangal da.

¹¹ Gawam met so onya ed baybay a dapag na pinagkaalar.

¹² Diad dapag a sagur say benlag na saray kurtina et duamplo tan liman yarda; wala ray samploran lusek tan samploran dapan.

¹³ Diad dapag a bokig a kawalaay lolooban, say benlag na pinagkaalar to et duamplo tan liman yarda met.

^14-15 Diad kapag diking na lolooban say benlag na saray kurtina et pitora tan kapalduan yarda; wala ray taloran lusek tan taloran dapan.

¹⁶ Diad lolooban say karokey na kurtina to et samploran yarda a pinon linen; asul, purpura, tan ambalanga so tinebey to tan bordaan mo. Apatiray lusek to a nipatoon ed apatiran dapan.

¹⁷ Amin da ray lusek na pinagkaalar et nepeg ya atoop ira na saray sangal a pilak, say panagkawit da et pilak, tan saray dapan da et gansa.

¹⁸ Say pinagkaalar et limamplon yarda so karokey to, duamplo tan liman yarda so kaawang to, duara tan kapalduay yarda so kaatagey to. Saray kurtina et nepeg a pino ran linen tan gansa ray dapan na lusek.

¹⁹ Amin a kagawaan ya ikanad dalem na Tulda tan amin a palpal na Tulda tan saray palpal na pinagkaalar et nepeg a gansa ra.

Say Panasikasod Lamparaan

²⁰ “Iganggan mo ray Israelita a mangyakar irad sika na sankaabigan a larak na oliba ya onkanad lamparaan, pian akaselsel lawas.

²¹ Di Aaron tan saray anak ton lalaki et sikaray mangasikaso na lamparaan ed dalem na Tuldan ayaman ko diad paway na kurtina a walad arap na Kaban na Sipanan. Diad arap ko, say lamparaan et nepeg a mandarlang manlapud labi ya anggad kabwasan. Sayan ganggan et nepeg a sumpalen ya anggad angga na saray Israelita tan saray kabyangay boleg da.