Exodo 26 - Maung A Balita Biblia

Say Tuldan Ayamay Katawan

¹ “Igawaan mo so dalem na Tuldan Ayamay Katawan na samploran kurtina a pinon linen. Asul, purpura, tan ambalanga so tinebey da tan bordaan mo ra na saray kirubin.

² Gawam a nampapara so kabaleg da; labinapat a yarda so dokey da tan duaran yarda so benlag da.

³ Pansasaip mon daiten so limara tan ontan met so gawaen mod saray limara.

⁴ Manggawa kad gilig na samput na kapag saramay impansasaip mo na panagkawitan ya asul ya abel.

⁵ Peketan mo na limamplon panagkawitan so onaan a kurtina ya impansasaip tan limamplo met so samput a kurtina ed samay sakey; tan pampepetekan mo ra.

⁶ Manggawa ka na limamplon balituk a panagkawit a sikaray mamakasakey ed saramay duaran impansasaip a kurtina.

⁷ Labinsakey a kurtina a bagoy kanding so gawaen mo a sakbung na Tulda.

⁸ Gawam iran nampaparay kabaleg da, labinliman yarda so dokey da tan duaran yarda so benlag da.

⁹ Pansasaip mon daiten so limara, tan ontan met so gawaen mod saray anemira. Itopim ya idobli so kumanem a kurtina diad tagey na arap na Tulda.

¹⁰ Peketan mo na limamplon panagkawitan so gilig na samput a kurtina ed sakey ya impansasaip tan limamplo met so samput a kurtina ed samay sakey.

¹¹ Manggawa ka na limamplon gansan panagkawit tan ikawit mod saray panagkawitan, pian magmaliw a saksakey a sakbung ira may impansasaip.

¹² Ipaloyloy mo so soluk a kapalduan kurtina diad tagey na beneg na Tulda.

¹³ Say soluk a kapalduay yarda na dokey na samay sakbung et ipaloyloy mod kapag dapag na Tulda, pian nasakbungan to.

¹⁴ “Manggawa ka ni na duaran sakbung, sakey so pinabalanga tan pinamagan katat na karniron kalakyan, tan say sakey pinon katat; saraya so sakbung ed tapew.

¹⁵ “Manggawa ka na saray tablan akasia a pamaalagey na Tulda.

¹⁶ Limaran mitro so dokey na kapag tabla tan duamplo tan piton pulgada so lapar to.

¹⁷ Nepeg a walay duaran kagur to, pian makapantetekep ira yan tabla. Amin a tabla nepeg a wala ray kagur dan amin.

¹⁸ Manggawa kay duamplon tabla a para bandad abalaten na Tulda,

¹⁹ tan manggawa ka na apataplon pilak a dapan na tabla, duaran dapan ed silong na kapag sakey a tabla a peketan ira na saramay duaran kagur.

²⁰ Manggawa ka na duamplon tablan para bandad baybay na Tulda,

²¹ tan manggawa ka na apataplon pilak a dapan na tabla, duaran dapan ed silong na kapag sakey a tabla.

²² Manggawa kay anemiran tabla ed bandad sagur a beneg na Tulda.

²³ Manggawa ka na duaran tablan para saray sokung.

²⁴ Sarayan tabla ed sokung et asangal ira manlapud leksab ya anggad tagey. Nepeg ya onyay pakagawa na duaran tabla a sikaray duaran sokung.

²⁵ Ontan sirin, walay waloran tabla a walay labinanem a pilak a dapan da, duara ed silong na kapag tabla.

²⁶ “Manggawa ka na labinliman balewet ya akasia, limara so para saray tabla ed sakey a diking na Tulda,

²⁷ limara so para saray tabla ed sananey a diking tan limara so para saray tabla ed bandad sagur na Tulda diad beneg to.

²⁸ Nepeg a say karokey na pegley a balewet ya ilira ed pegley da ray tabla et manlapud sakey a samput ya anggad sakey a samput na Tulda.

²⁹ Okupan mo na balituk iray tabla tan peketan mo ra na saray balituk a liken a mangegnad saray balewet a naokupan met na balituk.

³⁰ Ipaalagey moy Tulda onung na samay planon impanengneng kod sika ed tagey na palandey.

³¹ “Manggawa ka na kurtina a pinon linen. Asul, purpura, tan ambalanga so tinebey da tan bordaan mo na saray kirubin.

³² Ibitin mo rad apatiran lusek ya akasia a naokupan na balituk, apeketan ira na saray panagkawit, tan nilira ra ed apatiran dapan a pilak.

³³ Sayan kurtina so ibitin mod saray panagkawit a nipeket ya arasig ed tarung na Tulda, tan iliram ed sanib to so Kaban na Sipanan a nankarga na duaran tapyak a bato. Say kurtina so ketegan na Masanton Pasen tan say Sankasantosan a Pasen.

³⁴ Iliram ed tapew na Kaban na Sipanan so sakub to.

³⁵ Diad paway na Sankasantosan a Pasen iliram ed pireg na baybay a dapag na Tulda so lamisaan tan iliram ed pireg na abalaten a dapag na Tulda so panangipatoonan na lamparaan.

³⁶ “Say lolooban na Tulda et igawaan mo na sakey a kurtina a pinon linen; asul, purpura, tan ambalanga so tinebey da tan bordaan mo.

³⁷ Para sayan kurtina manggawa ka na limaran lusek ya akasia ya inokupan na balituk tan wala ray nipeket a balituk a panagkawit; manggawa ka met na limaran gansan dapan a toonan na sarayan lusek.