Exodo 16 - Maung A Balita Biblia

Saray Mana tan saray Pugo

¹ Manlapud Elim pinmikal ya amin iray Israelita, et diad kumalabinliman agew na kumadwan bulan kayari na impanaynan dad Egipto, akasabi rad kalawakan na Sin a nanleetan na Elim tan Sinai.

² Diman ed kalawakan, nanriklamod kinen Moises tan Aaron iray amin ya Israelita.

³ Inkuandad sikara, “Magmaung ni la laingen komun no say Katawan et pinapatey to kamid man ed Egipto. Nayarian mid may ondongo a mangan na karni tan arum ni ran kakanen ed anggaay nayarian mi. Balet inawit yo kami a pateyen ed eras diad kalawakan.”

⁴ Say Katawan kuantod kinen Moises, “Natan paoranen ko a manlapud tawen na kakanen a para sikayon amin. Saray totoo et nepeg ya ompaway iran inagew-agew a manala na kanen dan onduga ed sanagew. Diad onya nasubok ko no onuren da kasi iray bilin ko.

⁵ Diad kumanem ya agew nepeg a doblien da so alaen da, insan da iparaan.”

⁶ Kanyan si Moises tan si Aaron kuandad saray amin ya Israelita, “Diad sayan labi naamtaan yo a say Katawan so angipaway ed sikayo a manlapud Egipto.

⁷ Diad kabwasan nanengneng yoy kagalangan na Katawan. Nadngel to ray riklamo yo a sumpad sikato—on, sumpad sikato, ta susumpalen mi labat iray bilin to.”

⁸ Insan inkuanen Moises, “Diad labi say Katawan so mangiter ed sikayo na karnin kanen yo tan diad kabwasan, say tinapay ya anggan anto lay karakel na labay yo, lapud nadngel to no panoy impanriklamo yo sumpad sikato. Say katwaan to, no manriklamo kayo sumpad sikami manririklamo kayo sumpad Katawan.”

⁹ Si Moises kuantod kinen Aaron, “Ibagam ed saray amin a totoo ya ondago ra tan manalagey ira ed arap na Katawan, lapud nadngel to ray riklamo ra.”

¹⁰ Nen mansasalitay Aaron ed amin a katoowan linmingaw ira ed kalawakan, et kabebekta pinmatnag ed lorem so kagalangan na Katawan.

¹¹ Say Katawan kuantod kinen Moises,

¹² “Nadngel ko ray riklamo da ray Israelita. Ibagam ed sikara ta diad kapansironget nawalaan ira na karnin siraen, tan diad kabwasan nawalaan ira na tinapay ya anggan antoy karakel na labay da. Diad satan, naamtaan da a siak so Katawan a Dios da.”

¹³ Diad labi walay olup na amayamay a pugo a mantikyab iran sinmabi tan apanatan day kampo, tan diad kabwasan walay linaew ed kaliber-liber na kampo.

¹⁴ Nen naandipat lay linaew, wala ray atilak ed dalin a bengatlan tirampiak tan maimpis. Singa ra kinmigtel a linaew.

¹⁵ Nen anengneng ira na saray Israelita, ag da amta no anto ra man kanyan nantetepetan ira, “Anto ya?” Si Moises kuantod sikara, “Sikato yay kanen yo ya inter na Katawan.

¹⁶ Say Katawan ingganggan to a manala so balang sakey ed sikayo na dugan nakaukolan to; sakey ya litro so para balang sakey a kabyangan na pamilya to.”

¹⁷ Ginawa ya na saray Israelita. Saray arum et masoluk so inala ra tan saray arum, kulang;

¹⁸ balet nen sukaten day inala ra, saray angala na masoluk anggapoy soluk da, tan saray angala na kulang anggapoy kulang da. Nantipon na dugan nakaukolan to so balang sakey ed sikara.

¹⁹ Si Moises kuantod sikara, “Nepeg ya anggapod sikayo so mangisinup na natipon to para ontombuk ya agew.”

²⁰ Balet wala ray pigaran ag dinmengel ed kinen Moises tan angisinup ira. Balet diad kaimbwasan abigis imay insinup da tan binmanget. Et si Moises akapasnuk ed sikara.

²¹ Kapag kabwasan balang sakey a too nanala na dugan nakaukolan to; tan no ampetang lay agew, natonaw iray atilak ed dalin.

²² Diad kumanem ya agew say alaen da mamidwad karakel na samay aalaen dan kakanen ya inagew-agew; duaran litro so para sakey a too. Amin da ray pangulo na katoowan dinmago rad kinen Moises tan imbaga ray nipaakar ed samay kakanen.

²³ Inkuantod sikara, “Say Katawan ingganggan to a nabwas et masanton agew na panagpainawa, say agew a nisaklang ed Katawan. Iyorno yo lan amin natan so labay yon ornoen, tan ilambung yo lay labay yon lambungen. Isinup yoy antokaman ya ikera yon para nabwas.”

²⁴ Onung na ingganggan nen Moises, insinup day akeraan ya anggad ontombuk ya agew; ag aboluk odino abigis so insinup da.

²⁵ Inkuanen Moises, “Akan yo ya natan, lapud Agew na Panagpainawa natan, say agew a nisaklang ed Katawan. Anggapo natay narumog yon kakanen ed paway na kampo.

²⁶ Nepeg a manala kayo na kakanen ed loob na anemiran agew, balet diad kumapiton agew, say agew na panagpainawa, anggapo so naala yon kakanen.”

²⁷ Diad kumapiton agew wala ray pigaran totoon pinmaway a manala na kakanen, balet ag ira akalmo.

²⁸ Insan say Katawan kuantod kinen Moises, “Kapigan mangangga so isusumlang na saray totoo ed saray ganggan ko?

²⁹ Ag mo lilingwanan a siak a Katawan et initdan ta kayoy sakey ya agew a panagpainawa, kanyan diad kumanem ya agew itdan ta kayo lawas na kakanen ya ondugad loob na duay agew. Balang sakey nepeg a manayam ed kawalaan to no agew na panagpainawa tan ag to onalis ed abung to.”

³⁰ Kanyan nampainawa ed kumapiton agew iray totoo.

³¹ Saray Israelita tinawag da na mana imay kakanen. Sayan mana singa melag ya ampotin bokel na tanaman, tan say taway to singa taway na tirampiak a kanen ya ininay dilo.

³² Inkuanen Moises, “Say Katawan ingganggan to a mangisinup itayo na pigaran mana a para saray mantombuk a kabyangay boleg tayo, pian nanengneng da so kakanen ya inter tod sikatayod kalawakan nen impaway to itayod Egipto.”

³³ Si Moises kuantod kinen Aaron, “Mangala kay sakey a banga, kargaan mo na kapalduay litro a mana, insan mo iyan ed arap na Katawan, ta isinup a para saray mantombuk a kabyangay boleg tayo.”

³⁴ Onung na ingganggan na Katawan ed kinen Moises, si Aaron inyan tod arap na Kaban na Sipanan imay mana, pian nisinup.

³⁵ Saray Israelita nantagano ra na mana ed loob na apataploy taon, ya anggad asabi ray dalin na Canaan a dimay nanayaman da. (

³⁶ Say kapalduay litro et kakaplo na panagsukatan nen saman.)