Exodo 10 - Maung A Balita Biblia

Saray Dorun

¹ Insan inkuan na Katawan ed kinen Moises, “Laka, ta miarapan kad ari. Pinaawet koy puso to tan saray opisyal to, pian nagawaan kod imatun da ira yan milagro.

² Ontan met ginawak ira yan milagro, pian nayarian yon salitaen ed saray anak yo tan saray apo yo so impamaabebak ed saray Egipsio nen nanggagawa ak na saray milagro. Naamtaan yo a siak so Katawan.”

³ Kanyan di Moises tan Aaron linma rad ari tan kuandad sikato, “Say Katawan a Dios na saray Hebreo kuanto, ‘Anggad kapigay ag mo itoluk ed siak? Abuloyan mo lan ontaynan iray totook, pian nigalang da ak.

⁴ No ag mo ni ran siansia abuloyan, paonlaen ko nabwas ed bansam iray dorun.

⁵ Dakerakel iran tuloy, kanyan nakayatan day intiron dalin. Kanen day amin a bengatlan ag dineral na saramay kristal, ya anggan saray nakdaan a kakiewan.

⁶ Panoen da ray palasiom tan saray kaabungan na saray opisyal mo tan amin a totoom. Mapalaloy panderal da; anggan saray lalaki yo et ag ira akanengneng na onyan panagderal da.’” Insan imbeneg nen Moises so ari tan linma la.

⁷ Saray opisyal na ari kuandad sikato, “Kapigay pangangga na panggunigon na sayan too ed sikatayo? Abuloyan mo la ray Israelitan lalaki ya ontaynan, pian nigalang day Katawan a Dios da. Ag mo ta nanenengneng ya aderal lay Egipto?”

⁸ Kanyan pinapawil da ra di Moises tan Aaron ed ari tan kuantod sikara, “Nayarian yo lay onla a mangigalang ed Katawan a Dios yo. Balet siopa ray talagan onla?”

⁹ Inmebat si Moises, “Onla kamin amin a pati saray anak mi tan saray mamatakken ed sikami. Awiten mi ray anak min lalaki tan bibii, saray karniro, saray kanding tan saray baka mi, lapud mampista kami a pamagalang mid Katawan.”

¹⁰ Say ari kuanto, “Sambaan kod Katawan ya ag kon balut paawit ed sikayo ray anak yon bibii tan saray ogogaw! Malinew a mankokomplut kayon onlaban ed sikami.

¹¹ Andi, ag yo ra aawiten! Saray lalaki labat so onlan mangigalang ed Katawan no sikatoy labay yo.” Lapud saya, apataynan ira di Moises tan Aaron ed arap na ari.

¹² Insan say Katawan kuantod kinen Moises, “Itorom ed intiron dalin na Egipto so limam, pian onla rad man iray dorun. Onsabi ra tan kanen day amin a tanaman ya ag aderal na oran a kristal.”

¹³ Kanyan intoro nen Moises so baston to tan sanagew tan sanlabin pinasiplug na Katawan so dagem a nanlapud bokig. Diad kaimbwasan awit na dagem iray dorun.

¹⁴ Mapalet iran sinmabi tan kinayatan day intiron bansa. Sankarakelan la man ya anengneng a dorun, tan anggapo lay mipara ed karakel da anggan kapigan a panaon nen saman tan diad arapen.

¹⁵ Kinobutan day intiron dalin ya anggad andeket so nengneng to; binuag day amin a bengatlan ag aderal na oran a kristal, pati amin a bungay kakiewan. Anggapoy atilak a birdi ed anggan dinan a kiew odino tanaman ed intiron dalin na Egipto.

¹⁶ Insan say ari impaawit ton tampol ira di Moises tan Aaron tan kuanto, “Nankasalanan ak ed Katawan a Dios yo tan diad sikayo.

¹⁷ Pirdona yo ak pan maminsan labat ni ed sayan kasalanan ko tan pikasi yod Katawan a Dios yo a paandien to lad siak yan makapatey a dusa.”

¹⁸ Tinaynan nen Moises so ari tan akikasid Katawan.

¹⁹ Say Katawan pinasiplug toy mabisbiskeg a dagem a nanlapud sagur; impalir na sayan dagem ira may dorun tan imbantak to ran amin ed Dayat ya Ambalanga. Anggapoy anggan sakey a dorun ya atilak ed intiron Egipto.

²⁰ Balet pinaawet na Katawan so puso na ari, kanyan ag to inabuloyan ya ontaynan iray Israelita.

Say Bilonget

²¹ Insan inkuan na Katawan ed kinen Moises, “Itorom ed tawen so limam, et nakobutan na mapalalon bilonget so intiron dalin na Egipto, a diad kinabilonget to nalikna na katoowan.”

²² Si Moises intoro tod tawen so lima to, tan binmilbilonget ed loob na taloran agew so intiron dalin na Egipto.

²³ Ag makapannenengnengan iray Egipsio, kanyan anggapoy anggan sakey a pinmaway ed abung to ed loob na taloy agew. Balet walay liwawa ed pasen a panaayaman na saray Israelita.

²⁴ Impaawit na ari si Moises tan kuanto, “Nayarian yo lay onla a mangigalang ed Katawan; nayarian yo lan awiten iray bibii tan saray ogogaw. Balet itilak yo dia ray karniro yo, saray kanding yo, tan saray baka yo.”

²⁵ Inmebat si Moises, “Ontan sirin, sikay mangiter ed sikami na saray ayayep a para ibagat tan saray bagat a popoolan ya isaklang mi rad Katawan a Dios mi.

²⁶ Andi, awiten mi ray ayayep mi; ag kamin balut mangitilak. Sikamin dili so nepeg a mampili na saray ayayep ya ikana mid pangigalang ed Katawan a Dios mi. No ag kami ni akasabid man, ag mi naamtaan no dinan iran ayep so ibagat mid sikato.”

²⁷ Pinaawet na Katawan so puso na ari, kanyan ag to abuloyan ya onla la ray Israelita.

²⁸ Inkuantod kinen Moises “Arawi ka diad arap ko! Ag ka la ompapanengneng ed siak! No nanengneng ta ka ni, andi-saew ya ompatey ka!”

²⁹ Inmebat si Moises, “No sikatoy kuan mo! Ag mo ak lan balut sirin nanengneng.”