Exodo 1 - Maung A Balita Biblia

Say Kairapan ya Inako na saray Israelita ed Egipto

¹ Saray anak nen Jacob tan saray pamilya ra a kaiba to ran linmad Egipto et saraya:

² Ruben, Simeon, Levi, Juda,

³ Isacar, Zabulon, Benjamin,

⁴ Dan, Neftali, Gad, tan Aser.

⁵ Pitomplo ya amin iray anak tan apo nen Jacob, a pati si Jose a wadman la ed Egipto.

⁶ Diad impankurang na panaon si Jose, saramay agagi to, tan amin a totoo ed saman a kailalakan et inaatey ira.

⁷ Balet amayamay iray anak tan apo na saman a kailalakan, a salanti saray Israelita; dinmakerakel ira tan nagmaliw iran makapanyarin tuloy, kanyan kinmayat iran nanayam ed intiron bansa na Egipto.

⁸ Sinmabiy panaon a walay balon ari na Egipto ya ag to kabat si Jose.

⁹ Sayan ari inkuantod saray totoo to, “Makapataktakot la ra yan Israelita, ta dakerakel tan makapanyari la ra nen say sikatayo.

¹⁰ Gawaen tayoy kasiliban a pamatonda na idadakel da, ta no walay onsabi-sabin bakal, ag la pigan migampi rad saray kalaban tayo. Onlaban irad satan ed sikatayo, insan da taynan so bansa tayo.”

¹¹ Kanyan angipasen iray Egipsio na saray opisyal a mamairap ed saray Israelita. Impankikimey da ra na ambelat diad impamaalagey dad saray siudad na Pitom tan Rameses a panangisempenay abasto na ari.

¹² Balet no panoy impanpapairap na saray Egipsio ed saray Israelita, lalon ondarakel ira tan onaawang so pasen a panaayaman da. Apagaan ed satan iray Egipsio ed saray Israelita,

^13-14 kanyan impagmaliw dan masegsegang so bilay da. Pinapasoot da ran inaripen. Impankikimey da rad panagmasa na dalin tan diad panaggawa na laryo; impankikimey da met ni rad kaalogan da. Ag da ran balut kinasian.

¹⁵ Insan say ari na Egipto akisalitad kindi Sifra tan Pua, saray duaran manamianak a Hebrea.

¹⁶ Inkuantod sikara, “No mamaanak kayod saray bibiin Hebrea, patey yo so ogaw no laki, balet ag yo papateyen no bii.”

¹⁷ Balet sarayan manamianak, lapud walay takot dad Dios, ag da inonur imay ingganggan na ari ed sikara; ag da pinatey iray ogogaw a lalaki.

¹⁸ Impatawag to sirin ira yan manamianak tan tinepet tod sikara, “Akin et onyay gagawaen yo? Akin et ag yo papateyen iray ogogaw a lalaki?”

¹⁹ Inmebat ira may manamianak, “Aliwan singa saray bibiin Egipsia iray bibiin Hebrea, ta mainomay iran mananak; ag ni sinmabiy manamianak et akapananak la ra.”

^20-21 Lapud sarayan manamianak et walay takot dad Dios, tinumangan ira na Dios tan initdan to ray anak da. Ag tinmonda so indakel na saray Israelita tan nagmaliw iran makapanyarin tuloy.

²² Diad satan, say ari angipaakseb na sakey a ganggan ed saray amin a totoo to: “Ipaanur yod Ilog na Nilo so balang Hebreon laki a kapangyanak, balet ag yo papateyen iray kapangyanak a bibii.”