Ester 10 - Maung A Balita Biblia

Say Inkatalonggaring di Asuero tan Mardokeo

¹ Pinasoot nen Ari Asuero ya impanbayar na buis iray totoon manaayam ed gilig na dayat tan saray manaayam ed bandad loob na impirio to.

² Nikorit ed saray panagsulatan da ray arari ed Persia tan Media iray amin a matalonggaring tan makapakelaw a ginagawa to tan say impangipasen tod kinen Mardokeo ed atagey a betang.

³ Si Mardokeo a Judio so onkumadwad kipapasen nen Ari Asuero. Pinapagalangan tan labalabay na saray kapara ton Judio. Ginagawa toy pankaabigan na saray totoo to tan say kiarawid kaatapan na amin da ray kaybangay boleg da.