Esdras 7 - Maung A Balita Biblia

Sinmabid Jerusalem si Esdras

¹ Linmabas so amayamay a taon. Nen impirador na Persia si Artajerjes, walay sakey a lakin manngaran na Esdras ya anak nen Seraya a lakin anak nen Azarias, a lakin anak nen Helcias.

² Si Helcias et lakin anak nen Sallum, a lakin anak nen Sadoc, a lakin anak nen Ahitob.

³ Si Ahitob et lakin anak nen Amarias, a lakin anak nen Azarias, a lakin anak nen Merayot.

⁴ Si Merayot et lakin anak nen Zeraya, a lakin anak nen Uzi, a lakin anak nen Buki.

⁵ Si Buki et lakin anak nen Abisue, a lakin anak nen Finees, a lakin anak nen Eleazar. Si Eleazar et lakin anak nen Aaron a Pangulon Pari.

⁶ Sakey ya iskriba si Esdras tan kabkabat toy Ganggan ya inter na Katawan a Dios na Israel ed kinen Moises. Lapud walad kinen Esdras so bindision na Dios, inter na ari ed sikato so antokaman a kerewen to. Manlapud Babilonia

⁷ Iinmay Esdras ed Jerusalem a kaiba toy sakey a grupo na saray Israelita, a pati saray papari, saray Levita, saray tumugtogtog tan saray kumakanta ed Timplo, saray guardiay Timplo, tan saray kumikimey. Agawa ya nen kumapitoy taon na panooley nen Ari Artajerjes.

^8-9 Tinaynan day Babilonia nen ononan agew na ononan bulan, et diad pananulong na Dios akasabi rad Jerusalem nen ononan agew na kumaliman bulan.

¹⁰ Inapasakey la nen Esdras so bilay to diad panaral tan pangonur tod Ganggan, tan diad pangibangat tod saray Israelita na saray bilin tan saray totontonen a walad Ganggan.

Inter nen Ari Artajerjes ed kinen Esdras so Kaletan

¹¹ Say onggendan a kaletan et inter nen Impirador Artajerjes ed kinen Esdras, say pari tan iskriba a kabkabat to ray ganggan tan saray bilin ya inter na Katawan ed Israel:

¹² “Nanlapu yan kaletan ed Impirador Artajerjes diad kinen Esdras a pari a kabkabat toy Ganggan na Dios na Tawen.

¹³ “Igaganggan ko ya amin da ray Israelitan walad sakop na panooleyan ko, saray papari, tan saray Levitan malabay a milad sika ed Jerusalem et naabuloyan ira.

¹⁴ Siak tan saray pitoran sumisimbawak so mangibabakid sika, pian nanengneng moy kipapasen na Jerusalem tan Juda. Nengneng mo no panon so pakakaonur diman ed nimatalek ed sikan Ganggan na Dios mo.

¹⁵ Sikay mangawit na saray pilak tan balituk a labay ko tan saray sumisimbawak ya ibagat ed Dios na Israel a walad Jerusalem so Timplo to.

¹⁶ Sika met so mangawit ed amin da ray natipon mon pilak tan balituk ed luyag na Babilonia, tan saray bagat a manlapud mabulos a linawa ya iter na saray Israelita tan saray papari ed Timplo na Dios da a walad Jerusalem.

¹⁷ “Apiger mon isaliw yan kuarta na saray bakan kalakyan, saray karniron kalakyan, saray kordiro, say trigo, tan say alak. Isaklang mo ra ed tapew na altar ed Timplod Jerusalem.

¹⁸ Nayarian mon ikana so nakeraan a pilak tan balituk ed antokaman a labay mo tan saray kabansaan mo onung ed linawa na Dios yo.

¹⁹ Iparontal mod arap na Dios diad Jerusalem iray amin ya ikakanan niiter ed sika para panlingkur ed Timplo.

²⁰ Saray arum nin nakaukolan mon para Timplo et nayarian mon alaen ed kayamanay palasio.

²¹ “Siak, si Impirador Artajerjes, igaganggan ta kayon amin a makaoley ed kayamanan na Luyag na Sagur na Eufrates ya iter yon tampol iray amin a kerewen nen Esdras a pari a kabkabat toy Ganggan na Dios na Tawen.

²² Mangiter kayo, balet et ag onsoluk ed talon libo tan apat a lasus a kilon pilak, liman lasus a boksut a trigo, duan libo tan anemaplon litron alak, tan duan libo tan anemaplon litron larak na oliba. Balet no asin so kerewen da iter yoy amin a nakaukolan da.

²³ Apiapiger yon iter iray amin a nakaukolan na Dios na Tawen ya onkanad Timplo to, pain ag to ak balut napampasnukan odino saray ontombuk ed siak a manoley.

²⁴ Sebel ed sikayo so mangala na saray buis ed saray papari, saray Levita, saray tumutogtog tan saray kumakanta, saray guardia, saray kumikimey, odino siopaman nin manlilingkur ed Timplo.

²⁵ “Sika, Esdras, ikanam so kakabatan ya inter ed sika na Dios mo diad panorom na saray opisyal tan saray huis a manoley ed amin da ray totoo ed Sagur na Eufrates a mambibilay ira onung ed Ganggan na Dios mo. Nepeg yon ibangat itan a Ganggan ed siopaman a toon ag makaamta.

²⁶ Nepeg a nadusan tampol so siopaman ya ag mangonur ed saray ganggan na Dios mo odino saray ganggan na impirio. Say iter a dusa nayarin say patey, odino say pangibantak ed arum a bansa, odino say pangalad kayaryan to, odino say pangipriso.”

Indayew nen Esdras so Dios

²⁷ Inkuanen Esdras, “Nadayew so Katawan a Dios na saray lalaki tayo! Ginawa ton maabuloy so impirador a pagalangan to na onya so Timplo na Katawan ed Jerusalem.

²⁸ Lapud ag mangoman a panangaro na Dios nalak so maung a linawa na impirador, saray sumisimbawa to, tan amin da ray makapanyarin opisyal to. Say Katawan a Dios initdan to ak na biskeg na linawa, et ayarian kon atanggoyur a milad siak ya ompawil iray amayamay a pangulo na saray boleg da ray Israelita.”