Esdras 2 - Maung A Balita Biblia

Say Listaan na saray Pinmawil ed Jerusalem

¹ Dakerakel ed saray nibantak ed luyag na Babilonia so pinmawil ed Jerusalem tan diad Juda; pinmawil so balang sakey ed sikara diad dilin baley to. Saray pamilya da ra ya et nanaayam la ran nibantak ed Babilonia nanlapu lad impanakep nen Ari Nabucodonosor ed sikara.

² Saray pangulo ra et di Zorobabel, Josue, Nehemias, Seraya, Reelaya, Mardokeo, Bilsan, Mispar, Bigvai, Rehum, tan Baana. Sikato yay listaan na saray boleg na Israel a kataruk toy bilang na saray pinmawil:

^3-20 Paros—duan libo, sanlasus tan pitomplo tan dua Sefatias—talon lasus, pitomplo tan dua Arah—piton lasus, pitomplo tan lima Pahat-moab—(kabyangan iray boleg nen Jesua tan Joab)—duan libo, walon lasus tan labindua Elam—sanlibo, duan lasus, limamplo tan apat Zatu—siam a lasus, apataplo tan lima Zacai—piton lasus tan anemaplo Bani—anem a lasus, apataplo tan dua Bebai—anem a lasus, duamplo tan talo Azgad—sanlibo, duan lasus, duamplo tan dua Adonicam—anem a lasus, anemaplo tan anem Bigvai—duan libo, limamplo tan anem Adin—apat a lasus, limamplo tan apat Ater (atawag met na Ezekias)—siamaplo tan walo Bezai—talon lasus, duamplo tan talo Jora—sanlasus tan labindua Hasum—duanlasus, duamplo tan talo Gibar—siamaplo tan siam

^21-35 Pinmawil met ira yan totoo a saray lalaki ra et nanayam ed saray onggendan a baley: Betlehem—sanlasus, duamplo tan talo Netofa—limamplo tan anem Anatot—sanlasus, duamplo tan walo Azmavet—apataplo tan dua Kiryat-jearim, Cefira tan Beerot—piton lasus, apataplo tan talo Rama tan Geba—anem a lasus, duamplo tan sakey Micmas—sanlasus, duamplo tan dua Betel tan Ai—duan lasus, duamplo tan talo Nebo—limamplo tan dua Magbis—sanlasus, limamplo tan anem Say sananey ya Elam—sanlibo, duan lasus, limamplo tan apat Harim—talon lasus tan duamplo Lod, Hadid, tan Ono—piton lasus, duamplo tan lima Jerico—talon lasus, apataplo tan lima Senaa—talonlibo, anem a lasus tan talomplo

^36-39 Sikato yay listaan na saray boleg na paparin pinmawil: Jedaya (kabyangay boleg nen Jesua)—siam a lasus, pitomplo tan talo Imer—sanlibo, limamplo tan dua Pasur—sanlibo, duan lasus apataplo tan pito Harim—sanlibo tan labimpito

^40-42 Saray boleg na Levita a pinmawil: Jesua tan Cadmiel (kabyangay iray boleg nen Hodavias)—pitomplo tan apat Saray tumutogtog tan saray kumakanta ed Timplo (Kabyangan iray boleg nen Asaf)—sanlasus, duamplo tan walo Saray guardiad Timplo (kabyangan iray boleg di Sallum, Ater, Talmon, Acub, Hatita, tan Sobai)—sanlasus, talomplo tan siam

^43-54 Saray boleg da ray kumikimey ed Timplo a pinmawil: Ziha, Hasufa, Tabaot Keros, Siaha, Padon Lebana, Hagaba, Acub Hagab, Samlai, Hanan Gidel, Gahar, Reaya Rezin, Nekoda, Gazam Uza, Pasea, Besai Asna, Meunim, Nefusim Bacbuc, Hacufa, Harhur Hazlut, Mehida, Harsa Barcos, Sisara, Tema Nezia, tan Hatifa

^55-57 Saray boleg da ray aripen nen Solomon a pinmawil: Sotai, Soferet, Peruda, Jaala, Darcon, Gidel, Sefatias, Hatil, Pokeret-hazebaim, tan Ami

⁵⁸ Talon lasus, siamplo tan dua ya amin so bilang da ray kabyangay boleg na saray kumikimey ed Timplo tan saray kabyangay boleg da ray aripen nen Solomon a pinmawil.

^59-60 Anem a lasus, limamplo tan dua ray kabyangay boleg di Delaya, Tobias, tan Necoda a pinmawil ira manlapud saray baley na Tel-mela, Tel-harsa, Kerub, Addan tan Imer; balet ag da napaneknekan a kabyangan iray boleg na saray Israelita.

^61-62 Saray onggendan a boleg na papari et ag ira makarumog na listaan a mamaneknek na sengeg na pamilya ra: Habaias, Haccoz, tan Barzillai. (Say laki na saray paparin kabyangay boleg nen Barzillai et angasawa na sakey a biin kabyangay boleg nen Barzillai a taga Galaad tan inala toy ngaran na boleg na katolangan to.) Ag ira naawat a papari, lapud ag da napaneknekan no siopa ray lalaki ra.

⁶³ Imbagad sikara na gobirnador na saray Judio ya ag ira makapangan na kakanen ya imbagat ed Dios, anggad walay sakey a parin makapangipanon ed Tummim tan Urim.

^64-67 Say bilang na amin da ray pinmawil et apataplo tan duan libo, talon lasus tan anemaplo Saray lalaki tan bibiin aripen da—piton libo, talon lasus talomplo tan pito Saray lalaki tan bibiin tumutogtog tan saray kumakanta—duan lasus Saray kabayo—piton lasus, talomplo tan anem Saray mula—duan lasus, apataplo tan lima Saray kamilyo—apat a lasus, talomplo tan lima Saray asno—anem a libo, piton lasus tan duamplo

⁶⁸ Nen saramay nanlapud Babilonia et sinmabi rad Timplo na Katawan diad Jerusalem, pigarad saray pangulo da ray boleg so angiiter na saray bagat a manlapud mabolus a linawa a pamaalagey lamet ed Timplo diad gendat a kawalaan to.

⁶⁹ Ginawa ray anggaay nayarian dan mangiter para sayan kimey; apat a lasus, anemaplo tan walon kilo a balituk, duan libo, anem a lasus tan waloran kilon pilak, tan sanlasus a kawes na papari.

⁷⁰ Nanayam ed Jerusalem odino diad abay to iray papari, saray Levita, tan pigarad saray totoo; nanayam ed saray asingger a baley iray tumutogtog tan saray kumakanta, saray guardiad Timplo, tan saray kumikimey ed Timplo; tan nanayam ed saray baley na saray lalaki ra iray arum ya Israelita.