Ecclesiastes 8 - Maung A Balita Biblia

¹ Say toon makabat labat so makaamta na tuan kabaliksan na saray bengatla. Say kakabatan so mamaimis ed makabat a too, tan mamaligsad lupa to.

Onuren so Ari

² Onur mo ray ganggan na ari, tan ag ka bengatbengat mansisipan ed Dios.

³ Nayarian na ari a gawaen so labay to, kanyan taynan kad arap to. Ag ka manaayam ed sayan maatap a pasen.

⁴ Walay pakaoley na antokaman a gawaen na ari, tan anggapoy nayarin mibabali.

⁵ Arawid kaatapan iray mangonur ed saray ganggan to. Say toon makabat amta to no panon tan no kapigan to ra onuren.

⁶ Walay manepeg a panaon tan manepeg a polaing a panggawad antokaman, balet dagdaiset so amta tayo!

⁷ Anggapod sikatayoy makapikabat no antoy nagawa ed arapen, tan no siopay mangibagad sikatayo.

⁸ Anggapoy toon makapaliis ed patey, odino makabaat ed isabi na agew na ipatey to. Sikato yay sakey a bakal ya ag tayo napaliisan; ag tayo nayarian ya ibatikan.

Say Maoges tan say Matonung a Too

⁹ Anengneng ko ra yan amin nen ninunot ko ray nagagawa ed sayan mundo, say mundo a wala ray totoon walay pakayari, tan nepeg a manirap iray totoon ooleyan da.

¹⁰ On, akanengneng ak na saray totoon maoges a nipompon tan wala rad saray lobuk da, balet diad kapapawil, manlapud kamposanto, idadayew ira na saray totoo ed dilin siudad a nanggagawaan day kaogsan. Sakey yan andi-kakanaan!

¹¹ Akin et maininomay a manggaway kaogsan iray totoo? Lapud ag nadudusan tampol so kaogsan.

¹² Anggaman a manggaway sanlasus a krimin so sakey a makasalanan, siansian mambilay. On, amtak so ibabaga ra, “No onuren moy Dios maung ya amin so kasumpalan na bilay mo,

¹³ balet ag ya nagawa ed saray totoon maoges, singa anino so bilay da, tan ompatey iran masakbay, lapud ag da oonuren so Dios.”

¹⁴ Balet andi-kakanaan ya. Imano yoy nagagawa ed mundo: no maminsan niiter ed saray matonung so dusa na saray totoon maoges, tan niiter ed saray totoon maoges so tumang na saray matonung a totoo. Kuanko a sakey yan andi-kakanaan.

¹⁵ Kanyan atibokel ed kanunotan ko a nepeg a manliket so sakey a too, ta say panliketan to labat ed sayan bilay et say pangan, say paninom to, tan say pamaliket tod laman ton dili. Nagawaan toy onya no mankikimey legan na inggetar na Dios a pambilay to diad tapew na dalin.

¹⁶ Kapag salien koy magmaliw a makabat, tan aralen koy nagagawa ed mundo, abirbir kon anggan sanlabi tan sanagew kan ag onogip,

¹⁷ ag mon balut natalusan so kabaliksan na gagawaen na Dios. Anggan antoy gawaen mo, ag mon balut nakabatan. Nayarin ibaga na saray makabat ya amta ray gagawaen na Dios, balet diad katwaan to ag da amta.