Ecclesiastes 6 - Maung A Balita Biblia

¹ Naimanok diad sayan mundo so mapalalon kaogsan a nagagawad katoowan.

² Say Dios itdan toy sakey a too na kayamanan, kagalangan, tan kayaryan, on, amin a labay to, balet ag to abuloyan a panliketan to ra. Say sakey a sangkaili la laingen so manliket. Sakey yan andi-kakanaan tan sumlang ed katonungan.

³ Ibilang kon magmaung niy kipapasen na sakey ya ogaw ya inatey a nianak nen say toon sanlasus iray anak to tan mambilay na andokey, balet aliwan maliket ed bilay to tan ag napagalangan no ipompon.

⁴ Anggapoy kaabigan a nagamuran to yan ogaw ed kianak to; naandipat lan onlad kabilongetan tan diman la nalingwanan.

⁵ Ag to la anengneng so liwaway agew odino naamtaan so kabaliksan na bilay, balet agamuran toy inawa—

⁶ mainawa nen say samay toon aliwan maliket so impanbilay to, anggaman a nayarin mambilay na duan liboy taon. Ag ta saksakey met lamlamang so laen dan dua?

⁷ Mankimey so too pian walay tagano to, balet siansian ag napenek.

⁸ Antoy panmaungan na toon makabat ed toon makulang-kulang? Antoy kaabigan a nagunggona na toon mairap-bilay a naamtaan toy mambilay?

⁹ Sakey yan andi-kakanaan; singa ka onoosil ed dagem. Maung niy panliketan moy antokaman a walad sika nen say mansasalat so pampilalekan mo.

¹⁰ Amin a nagagawa natan et abayag lan nigetar nen saman nin panaon, tan amta tayo a say too et ag nayarin misangsangan ed mabiskeg nen say sikato.

¹¹ No andokey so pisangsangan mo lalon anggapoy kana to, tan anggapoy nagunggonam.

¹² Siopay makaamta no antoy sankaabigan a para sakey a too ed sayan andi-kakanaan tan antikey a bilay ed tapew na dalin—sakey a bilay a naandipat a singa anino? Siopay makapangibaga no antoy nagawad mundo kapatey to?