Ecclesiastes 1 - Maung A Balita Biblia

Andi-kakanaan so Bilay

¹ Sikara yay salita na Managpulong, say lakin anak nen David, tan ari na Jerusalem.

² Tuan andi-kakanaan, andi-kakanaan, kuay Managpulong. Andi-kakanaan so bilay, andi-kakanaan ya amin.

³ Antoy nagunggonay too, anggaman a mankimey lan mankimey legan na bilay to?

⁴ Mansosoblay so kailalakan ya onsabi, balet anggapo niy angomanan na mundo.

⁵ Ombubutay tan onseselek so agew, tan ompapawil ed nanlapwan to.

⁶ Onsisiplug so dagem ed abalaten, onsisiplug ed baybay—ontetelek tan ompapawil tan pawil-pawil labat ya onsiplug.

⁷ Amin da ray ilog onaagos ed dayat balet siansian ag ni ra napno, ompawil ed sengeg na saray ilog so danum, insan onagos lamet ed dayat.

⁸ Amin a bengatla mansusumpal ed kapagaan—kapagaan ya ag nayarin ibalikas. Ag napepenek so mata ed inenengneng to; ag met napepenek so layag ed idedengel to.

⁹ No antoy agawa la nen saman nagawa lamet. Naolit-olit labat so nagagawa. Anggapoy antokaman a balo diad tapew na dalin.

¹⁰ Kuanda, “Nengneng yo! Nia so bengatlan balo!” Balet andi, agawa la nen saman, abayag la kasakbayan a nianak itayo.

¹¹ Anggapoy toon makanununot no anto so agawa ed linmabas, tan anggapo so toon makanunot no anto so nagawa manlapud natan ya anggad arapen iran agew.

Say Asalsali na Managpulong

¹² Siak, say Managpulong, nanari ak ed intiron Israel diad Jerusalem.

¹³ Ginetmak a sukiten tan aralen ya amin iray nagagawa diad tapew na dalin. Say Dios impasen to itayod makapasinagem a kipapasen.

¹⁴ Anengneng kon amin iray agawa diad mundo, et nengneng yo, andi-kakanaan ya amin. Singa oosilan mo so dagem.

¹⁵ Ag mo nayarin peteken so pikewet; ag mo nayarin bilangen so anggapo.

¹⁶ Inkuankod siak a dili, “Nagmaliw ak a matalonggaring a too; lalon makabat ak nen say siopaman ya akaonan nanoley ed Jerusalem. Amtak no anto so tuan kakabatan tan pakatalus.”

¹⁷ Ginetmak ya aralen so pandomaan na pakatalus tan inkakulang-kulang, say kakabatan tan say kaambagelan. Balet naamtaan ko a singa ak onoosil ed dagem.

¹⁸ No dakel so kakabatan mo, dakel met so kapagaan mo; no kaonungay amtam, ontan met so panermenan mo.